Bas áskerı prokýratýra Astanadaǵy Ulttyq ulannyń 21 jastaǵy sarbazy Qaısar Sultanovtyń ólimine qatysty tergeý barysy týraly habarlady.
Qaısar Sultanov 2023 jyly 9 qazanǵa qaraǵan túni qaıtys boldy. Ol Astanadaǵy 6636 áskerı bóliminde boryshyn ótegen. Marqumnyń anasy qaıǵyly oqıǵadan bir kún buryn ulyn kórgenin jáne kúdikti eshteńe baıqamaǵanyn aıtady.
Qaıǵyly oqıǵadan keıin tergeý organdary qylmys quramyn tappaı, isti úsh ret jaýyp tastaǵan. Endi tergeý Qylmystyq kodekstiń 105-baby ("Ózin-ózi óltirýge deıin jetkizý") boıynsha qaıta bastaldy. Alaıda Qaısardyń anasy Sáýle Tileýbergenova uly óltirilgenine, al kináliler áli de Ulttyq ulan qatarynda qyzmet etip júrýi múmkin ekenine senimdi.
Bas áskerı prokýratýra redaksıanyń saýalyna jaýap retinde Ortalyq óńirlik áskerı-tergeý basqarmasy áskerı qyzmetshiniń ólimi deregi boıynsha sotaldy tergeý júrgizip jatqanyn habarlady.
"Qazirgi ýaqytta jedel-tergeý is-sharalar kesheni júrgizilip, sot saraptamasy taǵaıyndaldy", – dedi vedomstvo ókilderi.
Prokýratýra ózge derekterdi tergeý qupıasyna baılanysty (QPK-niń 201-babyna sáıkes) jarıa etýden bas tartty.
Marqumnyń anasy uly mundaı qadamǵa barmaıtynyn aıtady. Ol sot-medısınalyq saraptamanyń nátıjelerine súıenip otyr.
"Mamandar birinshi oqtyń tómennen joǵary atylǵanyn, bas súıegi men mańdaıyndaǵy jaraqattan sarbaz mert bolǵanyn anyqtady. Qorytyndyǵa sáıkes, ekinshi oq alty mınýttan keıin atylǵan. Biraq birinshi jaraqattan keıin Qaısardyń sanaly túrde eshqandaı áreket jasaýǵa shamasy kelmegen", - dedi ol.
Advokat Inga Imanbaıdyń aıtýynsha, isti qaıta bastaǵannan keıingi úsh aı ishinde tergeý alǵa jyljymaǵan.
Marqumnyń otbasy isti "Kisi óltirý" babyna qaıta saralaýdy, bul jaıtqa qatysy barlardyń bárin jaýapqa tartýdy talap etip otyr.
