“Deklarasıanyń merzimi ótip ketken“: qazaqstandyqtarǵa alaıaqtyqtyń jańa túri týraly eskertildi. 

Alaıaqtar azamattarǵa qońyraý shalyp, ózderin memlekettik organdardyń qyzmetkerleri retinde tanystyrady jáne salyq deklarasıasyn ýaqytynda tapsyrmaǵanyn aıtady.

Olar azamattardyń shottary buǵattalatynyn aıtyp, "máseleni sheshý" úshin úsh kún ishinde áreket etý kerektigin jetkizedi. "Jeke tulǵany rastaý" úshin SMS arqyly kelgen kodty aıtýyn suraıdy. Osylaısha alaıaqtar azamattardyń bank shottaryna qol jetkizip, aqshalaryn urlap alady.

Polısıa eskertýi: memlekettik organdardyń qyzmetkerleri mundaı habarlamalarmen azamattarǵa qońyraý shalmaıdy jáne eshqashan rastaý kodtaryn suramaıdy.

"Eshqashan bógde adamdarǵa SMS-kodtardy, parólderdi, bank kartalarynyń derekterin jáne basqa da jeke málimetterdi aıtpańyz. Kúdikti qońyraýlar túsken jaǵdaıda áńgimeni dereý toqtatyp, 102 nómiri arqyly polısıaǵa habarlasyńyz", - delingen habarlamada.

Buǵan deıin qazaqstandyqtar onlaın-alaıaqtardyń qurbany bolyp, mıllıardtaǵan aqshasynan aıyrylyp jatqanyn jazǵan edik. Alaıaqtar únemi jańa sqemalar oılap tabady, al olardyń tuzaǵyna ınternetti belsendi paıdalanýshylar da, egde jastaǵy adamdar da túsip jatyr.