Almaty ekonomıkalyq ósýdi qalalyq ortany jaqsartýmen ushtastyra otyryp, qarqyndy damyp keledi. Megapolıste turǵyndardyń ómir sapasyn arttyrýǵa baǵyttalǵan ınfraqurylymdyq jáne áleýmettik jobalar belsendi túrde júzege asyrylyp jatyr. Bıyl qalada qandaı ózgerister bar?  Bul týraly Qamshy.kz aqparat agenttigi Almaty qalasynyń ákimdiginiń baspasóz qyzmetine silteme jasaı otyryp habarlaıdy.

Jyl sońyna deıinskver, aleıa jáne serýen aımaǵy syndy ondaǵan qoǵamdyq keńistikti abattandyrý jumysy tolyq aıaqtalady. Sonymen qatar kólik ınfraqurylymy jańartylyp jatyr: uzyndyǵy 264 km bolatyn 318 kóshede ortasha jóndeý bastaldy. Josparlanǵan 35 km jańa joldyń 25 km-i qoldanysqa berildi, al alty kóshede qurylys jumysy jalǵasyp jatyr.

Áleýmettik ınfraqurylym boıynsha bıyl jyldyń basynan beri 26 nysan paıdalanýǵa berildi, al jyl sońyna deıin taǵy 30 nysannyń qurylysy aıaqtalady.

Prezıdenttiń bastamasy boıynsha júzege asyrylyp jatqan «Keleshek mektepteri» ulttyq jobasy aıasynda 22 500 orynǵa arnalǵan 12 jańa mektep salynǵan bolatyn. Onyń jeteýi jańa oqý jylynda ashyldy, qalǵan beseýi ekinshi oqý toqsanynda paıdalanýǵa beriletin bolady.

2030 jylǵa deıin 32 jańa medısınalyq mekeme salynyp, 14 densaýlyq saqtaý nysanyn jańǵyrtý josparlanǵan. Qazirgi ýaqytta Almatyda 8 medısınalyq nysannyń qurylysy qolǵa alynǵan.