Almaty qalasynyń polısıa qyzmetkerleri men Din isteri basqarmasynyń aqparattyq toby birlesip, ekstremızm men kıberqylmystyń aldyn alý taqyrybynda halyqpen profılaktıkalyq kezdesý uıymdastyrdy.

İs-sharanyń maqsaty - jastar arasyndaǵy quqyq buzýshylyqtardyń aldyn alý, kıberkeńistikte quqyqtyq saýattylyqty arttyrý, sondaı-aq ekstremızmniń, kıberbýllıngtiń jáne basqa da zamanaýı qaýipterdiń aldyn alý. Kezdesý barysynda jınalǵandarǵa ekstremızm men dinı-destrýktıvti aǵymdardyń zıany, ınternet keńistiginde balalar men jastardy qorǵaý, kıberbýllıngtiń saldary jáne onyń aldyn alý joldary týraly túsindirildi. Sala mamandary, dintanýshylar men polısıa qyzmetkerleri óz tájirıbelerimen bólisip, pikir almasty.

Sonymen qatar ata-analarǵa balalarynyń ınternettegi áreketterin baqylaý jáne jastardy durys tárbıeleý qajettiligi týraly usynystar berildi. Kezdesý ashyq dıalog formatynda ótti, ózekti máseleler talqylanyp, qoǵamdaǵy qaýipsizdikti arttyrý baǵyttary atap ótildi.