Almatyda Respýblıka kúnine oraı úzdik polıseıler marapattaldy. Almaty qalasy polısıa departamentinde Respýblıka kúnine arnalǵan saltanatty jıyn ótti. 

Merekelik sharaǵa polısıa qyzmetkerleri, ishki ister organdarynyń ardagerleri jáne "Jas saqshy" synyptarynyń oqýshylary qatysty. Bul kún – qoǵamǵa adal qyzmet etýdi, azamattardyń tynyshtyǵy men qaýipsizdigin qamtamasyz etýdi óz boryshy sanaǵan jandar úshin erekshe mańyzǵa ıe mereke boldy.

Saltanatty jıynda Almaty qalasy polısıa departamenti bastyǵynyń birinshi orynbasary Qýatbek Naýatov quttyqtaý sóz sóılep, áriptesterine izgi tilegin jetkizdi.

– Respýblıka kúni – óz elin súıetin, onyń bolashaǵyna senetin árbir azamattyń merekesi. Al polısıa qyzmetkerleri úshin bul kún erekshe jaýapkershilikti bildiredi. Sebebi qoǵamnyń tynyshtyǵy men tártibi, azamattardyń erteńgi kúnge degen senimi kóp jaǵdaıda bizdiń kásibı boryshymyzǵa baılanysty, – dedi Qýatbek Naýatov.

 Ol turaqtylyq pen qoǵamdyq qaýipsizdik – myńdaǵan tártip saqshysynyń kúndelikti, kópshilikke baıqala bermeıtin, biraq asa mańyzdy eńbeginiń nátıjesi ekenin atap ótti.

– Biz óz qyzmetin adal atqaryp, erlik pen kásibı sheberliktiń úlgisin kórsetip júrgen áriptesterimizdi maqtan tutamyz. Búgin tabys etilgen marapattar – olardyń ortaq iske qosqan eńbeginiń jáne almatylyqtardyń senimi men qurmetiniń kórinisi, – dedi ol.

İs-shara barysynda Almaty polısıasynyń úzdik qyzmetkerleri men bólim basshylary marapattalyp, alǵys hattarǵa ıe boldy. Olardyń qatarynda aýyr qylmystardy ashýda, qoǵamdyq tártipti saqtaýda jáne quqyq buzýshylyqtardyń aldyn alýda erekshe kózge túsken ofıserler bar. Sóziniń sońynda Qýatbek Naýatov áriptesterine myqty densaýlyq, otbasynyń amandyǵyn jáne qyzmette tabys tiledi.

– Biz bul merekeni birlik pen jaýapkershilik rýhymen qarsy alamyz. Osy rýh ár isimizde serik bolsyn. Ár qyzmet kúni – myqty, qaýipsiz jáne senimdi Qazaqstan Respýblıkasyna aparar bir qadam bolsyn, – dep túıindedi ol.