Almaty polısıasy áleýmettik jelidegi jarıalanym astynda jarylys jasaý kerek oryn týraly qorqytý mazmunynda pikir qaldyrǵan er adamdy ustady, dep habarlaıdy Qamshy.kz aqparattyq agenttigi.

Dinı birlestikterdiń qyzmetine qatysty jarıalanymnyń astyna belgisiz qoldanýshy jazba qaldyryp, bul derek boıynsha «102» púltine habarlama túsken. Oǵan qalalyq Polısıa departamentiniń Ekstremızmge qarsy kúres basqarmasynyń qyzmetkerleri jedel áreket etti.

«Jaryp jiberý kerek oryn», – dep jazǵan 2GIS-ke.

Júrgizilgen sharalar barysynda pikir avtorynyń jeke basy anyqtaldy. Ol – 2004 jyly týǵan Almaty turǵyny. Er adam ustalyp, polısıa bólimshesine jetkizildi.

«Internette jazylǵan bolsa da, kez kelgen qorqytý polısıa tarapynan qoǵamdyq qaýipsizdikke tónetin naqty qaýip retinde qaralady. Mundaı «ázilderdiń» aýyr saldary bolýy múmkin. Árbir habarlama muqıat tekserilip, kináliler zańǵa sáıkes jaýapkershilikke tartylady», – dedi Almaty qalasy PD Ekstremızmge qarsy kúres basqarmasynyń bastyǵy Asqat Dáýletıarov.

Polısıa áleýmettik jelilerdi paıdalanýda jaýapkershilik tanytýǵa, qorqytý nemese zańǵa qaıshy mazmundaǵy habarlamalardy jarıalamaýǵa shaqyrady.