«Almaty Sý» jáne Koreıa Respýblıkasy sýmen jabdyqtaýdy sıfrlandyrý boıynsha birlesken jobalardy iske qosady. Almaty qalasy megapolıstiń sýmen jabdyqtaý jáne káriz júıesin jańǵyrtý maqsatynda halyqaralyq yntymaqtastyǵyn nyǵaıtyp keledi. Almaty qalasy Energetıka jáne sý sharýashylyǵy basqarmasyna qarasty «Almaty Sý» komýnaldyq memlekettik kásiporny Koreıa Respýblıkasynyń Ulttyq sý ónerkásibi klasterimen yntymaqtastyq týraly memorandýmǵa qol qoıdy. 

Koreıanyń jetekshi kompanıalarymen seriktestik Almatydaǵy sý sharýashylyǵyn sıfrlandyrýdy jedeldetýge, halyqaralyq tájirıbeni meńgerýge jáne sý resýrstaryn tıimdi basqarýǵa múmkindik beredi.

Koreıa Respýblıkasy «Almaty Sý» kásipornynyń «Sıfrlyq egiz» jobasyn júzege asyrýǵa atsalysady. Bul dachıkter, jasandy ıntellekt jáne sımýlásıa negizinde nysandardy naqty ýaqyt rejıminde baqylaýǵa, taldaýǵa jáne basqarýǵa múmkindik beretin vırtýaldy model.

Pılottyq joba retinde bas tazartý nysandaryna zamanaýı sý ólshegish quraldar ornatyldy. Aldaǵy ýaqytta «aqyldy» eseptegishterdi qoldaný boıynsha yntymaqtastyq aıasyn keńeıtý josparlanyp otyr. Sondaı-aq, energıa tıimdiligi men ekologıalyq turaqtylyqty arttyrýǵa baǵyttalǵan sý tazartý jáne sýmen qamtý júıelerin jańǵyrtý jónindegi jobalar qarastyrylǵan.
 
Bul seriktestik jańa sıfrlyq sheshimderdi engizýge, qyzmet kórsetý sapasyn arttyrýǵa jáne resýrstardy tıimdi basqarýǵa jol ashady.

Koreıa Respýblıkasynyń Ulttyq sý ónerkásibi klasteri sýmen jabdyqtaý, sý tazartý jáne sý resýrstaryn basqarý salasyndaǵy memlekettik qurylymdar, ǵylymı-zertteý uıymdary men jeke kompanıalardy biriktiretin uıym.

«Almaty Sý» — Qazaqstandaǵy sýmen jabdyqtaý jáne sý burý salasyndaǵy eń iri kásiporyn. Ol Almaty qalasyn ǵana emes, oǵan irgeles eldi mekenderdi de sýmen qamtamasyz etedi.