Sheteldik marketpleısterden tapsyrys beretinder úshin ereje ózgerdi. Eýrazıalyq ekonomıkalyq komısıanyń Keńesi 200 eýrolyq lımıtten asqan kez kelgen satyp alýǵa salyqty búkil somaǵa esepteý týraly sheshim qabyldady.

Ne ózgerdi?

Bajsyz shek 200 eýro deńgeıinde qaldy. Quny 200 eýroǵa deıingi tapsyrysty qazaqstandyqtar burynǵydaı kedendik tólemsiz ala alady.

Quny 200 eýrodan asqan tapsyrysqa 5% kedendik baj tólenedi, oǵan qosa QQS eldegi qoldanystaǵy mólsherleme boıynsha esepteledi. Eń tómengi shek retinde bajdy kılogrammǵa 1 eýrodan kem esepteýge bolmaıdy.

Mańyzdy ózgeris engizildi: buryn 200 eýrodan asqan bólikten ǵana tólem alynatyn, endi salyq pen baj tapsyrystyń tolyq qunynan esepteledi. 210 ne 300 eýrolyq sebet sol sebepti qymbatqa túsýi múmkin.

Salmaq boıynsha lımıt alynyp tastaldy, esepteýge tek taýardyń quny alynady. Rásimdeýdi satyp alýshy emes, jetkizý qyzmetteri men elektrondy saýda operatorlary júrgizedi.

Bul tártip EAEO-ǵa kirmeıtin elderden (mysaly, Qytaı, AQSH, Eýropa elderi) keletin tapsyrystarǵa qatysty qoldanylady. Odaq ishindegi marketpleısterden alǵan taýarlarǵa jańa talap júrmeıdi.

Qaı taýarlar jeńildetilgen tártipke kirmeıdi?

Jeke paıdalanýǵa jatpaıtyn buıymdar jeńildetilgen elektrondy deklarasıamen rásimdelmeıdi. Olardyń ishinde solárıı jabdyqtary, ishten janatyn qozǵaltqyshtar, medısınalyq jıhaz, oıyn avtomattary bar.

Ruqsat tártibimen ákelinetin jáne áketiletin taýarlar jeke kórsetildi: qarý-jaraq pen oq-dári, janýardyń qazba súıekteri, qaýipti qaldyqtar.

Alkogól men temeki ónimderine, qolma-qol aqshaǵa, áýe jáne sý kólikterine, sondaı-aq jekelegen kólik túrleri men olardyń shasıine jeńildik júrmeıdi.

Qashan kúshine enedi?

Syrtqy elektrondy saýda arqyly keletin taýarlardy ákelýdiń jańa tártibi 2026 jylǵy 1 shildeden bastap kúshine enedi.

Nege mundaı qadam jasaldy?

Buǵan deıin shetelden onlaın alynǵan taýarlar jeke paıdalaný zatyna teńestirilip keldi. Osyny paıdalanyp, keıbiri ónimdi toptap ákelip, salyq tólemeı qaıta satýmen aınalysty. Búdjet kirisi azaıdy, ishki satýshylar sheteldik platformalarmen teń jaǵdaıda básekelese almady.

Jańa tártip «elektrondy saýda taýarlary» degen bólek sanat engizip, erejeni aıqyndaıdy: 200 eýroǵa deıin — bajsyz, odan joǵary — baj ben QQS tolyq qunnan. Maqsat — jeke satyp alýdy komersıalyq ákelimnen aıyryp, «kóleńkeli» ımport úlesin qysqartý jáne naryqtaǵy básekeni teńestirý.

Bul týraly Qamshy.kz aqparat agenttigi habarlaıdy.