Belgili dintanýshy Murtaza Bulutaıdyń ákesi Júnis qajy Raqısopyulynyń qaıtys bolýyna baılanysty týǵan-týystaryna kóńil aıtamyz. Qazaqtyń "qaraly kóshin" basynan ótkergen qazyna qarttyń jatqan jary jánatta topyraǵy torqa bolsyn!
Marqum aqsaqal týraly az-kem aqparatty Murtaza myrzanyń feısýktegi myna jazbalarynan bile alasyzdar.
Baýyrlar, dostar! Búgin men úshin azaly da qazaly kún, tek men emes Jántekeıdiń Taılaq atasynan taraǵan bir qaýym el jasy úlken qarıasynan aıylyryp otyr, Qazaq halqy kópti kórgen, Altaıdan Anadolyǵa jaıaý barǵan, qyrǵyn men qıynshylyqty bir kisideı kórgen aqsaqalynan aıyrylyp otyr... Ákem Júnis qajy Raqısopyuly 93-jasqa qaraǵan shaǵynda búgin táńerteń Ankarada ómirden ozdy. Sońǵy tórt jyl boıy tósek tartyp, aýyr naýqas bolǵanymen, áketaıym sabyrǵa salyp, óziniń ónegeli ósıetterin aıtyp kelip edi, degenmen dám taýsyldy, Alladan buıryq keldi! Asqar taýym shaǵylǵandaı, báıteregim qulaǵandaı kúı keship otyrmyn. Ómirge shyr etip kóz ashqaly beri osy áketaıymnan estýshi em qazaqtyń burynǵy kóshpeli ómirin, tarıhyn, salt-dástúrin... Barkóldiń Sarshoqysyn, Bısan kólin, Morıdyń qumyn, Shonjynyń Dabanqýyn, Qumyldyń kúngeıin, Býyrshynnyń Shuńqyryn, Qyzyltas pen Qyzylqaıyńyn... Aǵalarymen birge qalaı ańǵa barǵanyn, Qobdanyń bazaryna mal aıdaǵandaryn, Gansý jerin qalaı keshkenderin, qazaqtyń 1937-1941 jyldardaǵy qaraly kóshin, Tıbette marqum bolǵan ákesi men aǵalaryn qalaı jerlegenin, Pákistanda ótken onshaqty jyldaryn... Aqyt qajynyń óleńderin jatqa oqıtyn edi, ózi de óleń jyrlar jazyp, ómirde kórgen-tergenin amanat etip qaldyryp ketti. Qazaqstanǵa sheshemmen birge tórt márte kelip, jarty jyldan turyp, Almaty men basqa da aımaqtardy aralap, týystardy kórip, ábden razy bolǵan edi. Óleńderi men maqalalary «Almaty aqshamy», «Zaman Qazaqstan», «Juldyz» jýrnaly qatarly basylymdarda jarıalandy, qazaq radıosyn ózi taýyp baryp, suhbat berip ketipti jaryqtyq bir kelgeninde, Túrkıada da birtalaı derekti fılmderde keıipker retinde suhbattary berildi, zertteýshiler men til mamandary kelip ákemnen kóp dúnıelerdi jazyp alatuǵyn... Ákem men úshin burynǵy tarıhpen bizderdi jalǵastyryp jatqan altyn kópir ispetti edi, tamyry tereńde jatqan báıterek edi... Birazdan janazaǵa attanamyn, erteń Ankarada máńgilik mekenine shyǵaryp salamyz, sizder de duǵada bolyńyzdar baýyrlar, janyń jánnatta bolsyn asyl Ákem meniń! Jarqyn beıneń, ǵıbratty ómiriń, aıtqan nasıhat sózderiń árqashan da jadymda bolady...
"Qamshy"
