Bıyl belgili rýnolog-ǵalym, kósemsózshi, QazUÝ, jýrnalısıka fakúltetiniń qurmetti ustazy Amanqos Mektep-teginiń 60 jasqa tolyp otyr.
Amanqos Mektep-tegi Qultanuly 1954 jyly Aqtóbe oblysy, Baıǵanın aýdanynda dúnıege kelgen. Fılologıa ǵylymdarynyń kandıdaty, dosent, QR Jýrnalıser odaǵynyń múshesi. 1979 jyly Ál-Farabı atyndaǵy Qazaq ulttyq ýnıversıtetiniń fılologıa fakúltetin bitirgen. 1981-1996 jyldar QR ǴA-nyń A.Baıtúrsynuly atyndaǵy Til bilimi ınstıtýtynyń kishi ǵylymı kyzmetkeri. 1995-1996 jyldary Respýblıkalyq «Jalyn» jýrnaly proza bóliminiń meńgerýshisi. 1996 jyldan beri ál-Farabı atyndaǵy QazUÝ-diń jýrnalısıka fakúltetinde oqytýshylyq qyzmette. Amanqos Mektep-tegi - Álıhan Bókeıhan, Ahmet Baıtúrsynuly, Mirjaqyp Dýlatuly, Halel Dosmuhameduly, Muhamedjan Tynyshbaıuly, Eldes Omaruly, Teljan Shonanuly, Smahan Bókeıhan t.b. murasyn baspasóz betinde alǵashqy nasıhattaýshylardyń biri. Amanqos Mektep-tegi alash taqyrybyna baılanysty zertteý maqalalary merzimdi baspasóz betterinde jáne «Bes arys», «Til taǵlymy», «Alaman», «Halel taǵlymy», «Beket-Ata», «Qazaqtyń tálimdik oı-pikir antoloǵıasy», «Antologıa pedagogıcheskoı myslı Kazahstana», «Halel Dosmuhamedulynyń ómiri jáne onyń shyǵarmashylyǵy», «Ulttyq rýhtyń uly tini», «Aǵartýshy Halel» t.b. monografıalar men ǵylymı-tanymdyq jınaqtarda jarıalanǵan. 
Ǵalymnyń mereıtoıyna arnalyq jazylǵan jýrnalısıka fakúlteti ujymynyń Quttyqtaý hatynda bylaı delingen: "Jýrnalısıka fakúlteti ujymynyń atynan Sizdi 60 jasqa kelgen mereıtoıyńyzben shyn júrekten quttyqtaımyz! Sizdiń sonaý jas kezińizden qalamyńyzdyń qarymdy, parasat-paıymyńyzdyń jan-jaqty, keń, oı-tolǵamdaryńyz tereń, pikirlerińiz tushshymdy ekenine barshaǵa aıǵaq. Almaty qalalyq “Qazaq tili” qoǵamynyń Basqarma múshesi, “Túrki álemi”, “Uly Dala tynysy” aptalyq gazetteriniń jáne “Qyzyqty psıhologıa” Respýblıkalyq ǵylymı-ádistemelik, tanymdyq-psıhologıalyq jýrnaldyń alqa múshesi, Qazaqstan Ulttyq baspasóz klýbynyń múshesisiz. Sol bir 1996 jyldan beri QazUÝ-da shákirt tárbıelep, ádebıet pen ǵylymǵa belsene aralasyp, el úshin eren eńbek etip kelesiz. Ál-Farabı atyndaǵy QazUÝ-diń 2008–2009 oqý jylynyń “Úzdik oqytýshysy” atandyńyz. Siz, 1999 jyly kandıdattyq dısertasıa qorǵap, osy salada ǵylymı izdenisterińizdi bir sátke de umyt qaldyrmaı, ary qaraı damytyp kelesiz. Eńbekterińizdi oqyrman nazaryna usynyp qana qoımaı, onyń qyr-syryn kópshilikke túsindirý mindetin de óz moınyńyzǵa aldyńyz. Sizdi ál-Farabı atyndaǵy Qazaq ulttyq ýnıversıtetiniń jýrnalısıka fakúltetine dáris berýge ıtermelegen osy ıgi murattar ekendigi daýsyz. 2001 jyl Túrkıanyń astanasy Ankara qalasynda ótken Ysmaǵulbek Gaspráliniń týǵanyna 150 jyl tolý mereıtoıyna arnalǵan sımpozıým men Avstrıanyń Vena ýnıversıtetinde ǵylymı konferensıaǵa qatysyp, baıandama jasaýyńyz Respýblıkanyń mádenı ómirindegi eleýli oqıǵa boldy.2010–2011 jyl aralyǵynda QR Prezıdentiniń “Bolashaq” baǵdarlamasy boıynsha Polshanyń Poznan qalasyndaǵy Adam Mıskevıch atyndaǵy ýnıversıtette ǵylymı taǵlymdamadan ótip, Poznan, Slýbısa, Torýn, Varshava qalalarynda ótken ǵylymı-teorıalyq konferensıalarǵa qatysyp, baıandamalar jasadyńyz. Stýdentterge arnap birneshe oqý qural, monografıa jazdyńyz. Siz ǵylym salasynda dál osylaı yjdahattylyq tanytý arqyly Ózińiz tárbıelegen shákirtterińiz ben barsha oqyrmandaryńyzdy ulttyq rýhanı qundylyqtardy baǵalaýǵa úıretip, jas urpaqtyń bilim kókjıegin keńeıtip, qazaq jýrnalısıkasynda ózindik qoltańbańyzdy qaldyra bildińiz!
Qurmetti Amanqos Qultanuly! El múddesi, urpaq muraty úshin atqarǵan abyroıly eńbegińizge sáttilik, ózińizge zor densaýlyq, sharshamas shabyt, taýsylmas talant, otbasyńyzǵa amandyq, uzaq ǵumyr tileımiz! Qazaq Eliniń damýy men gúldenýi jolynda áli de jasaı beretin eńbekterińiz baıandy bolsyn!" delingen quttyqtaý hatta!
"Qamshy" ujymy qazaq túrkologıa ǵylymyna taýdaı úles qosyp, kóne rýna jazýyn búgingi kúni zerttep, jas urpaqqa úıretip júrgeni úshin Amanqos Mekteptegige úlken alǵys bildire otyryp, mereıtoıymen shyn júrekten quttyqtaımyz!
