2016 jylǵy 1 qańtardan bastap ádettegi zeınetaqy tólemi 9%-ǵa, múgedektik, asyraýshysynan aıyrylý jaǵdaıy boıynsha jáne jasyna baılanysty memlekettik áleýmettik járdemaqylar mólsheri 7%-ǵa ulǵaıtylatyn bolady, dep habarlaıdy «Qamshy» portaly baq.kz-ke silteme jasap.
Qazaqstan Respýblıkasynyń zeınetaqy júıesin odan ári jańǵyrtýdyń 2030 jylǵa deıingi tujyrymdamasynda yntymaqty zeınetaqy tólemi mólsheriniń jyl saıyn ınflásıa deńgeıinen eki paıyzǵa ilgerilep, ındekstelýi qarastyrylady. Aǵymdaǵy jylǵy 29 tamyzdaǵy Respýblıkalyq búdjettik komısıanyń otyrysynda maquldanǵan áleýmettik-ekonomıkalyq damý boljamyna sáıkes, tutyný baǵasynyń ındeksi 6-8%-dy qurady. Sol sebepti kelesi jyldyń qańtar aıynan bastap yntymaqty zeınetaqy tóleminiń mólsheri 9%-ǵa artatyn bolady (7% - ınflásıanyń ortasha deńgeıi jáne 2% - ilgerileý).
Sonymen qatar, bazalyq zeınetaqy tólemi «2016-2018 jyldarǵa arnalǵan respýblıkalyq búdjet týraly» QR Zańymen 11 965 teńge kóleminde belgilendi, eń tómengi zeınetaqy mólsheri – 25 824 teńge boldy. Osylaısha, 2016 jyly zeınetaqy tóleminiń tómengi mólsheri (eń tómengi zeınetaqy men bazalyq zeınetaqyny qosqanda) 37 789 teńge bolady. Memlekettik áleýmettik járdemaqy mólsheri múgedektik boıynsha onyń sebebi men tobyna baılanysty eń tómengi kúnkóris deńgeıine (tıisti qarjy jylyna arnalǵan «Respýblıkalyq búdjet týraly» QR Zańymen belgilenedi); asyraýshysynan aıyrylý jaǵdaıy boıynsha – qaraýyndaǵy jandardyń sany men eń tómengi kúnkóris deńgeıine; jasyna qaraı – tek eń tómengi kúnkóris deńgeıine táýeldi bolady. 2016 jyldyń 1 qańtarynan bastap múgedektik, asyraýshysynan aıyrylý jaǵdaıy boıynsha jáne jasyna baılanysty memlekettik áleýmettik járdemaqylar mólsheri eń tómengi kúnkóris deńgeıiniń ózgerýine baılanysty 7%-ǵa ulǵaıatyn bolady.
Sondaı-aq, Qazaqstan Respýblıkasynyń Prezıdenti Nursultan Nazarbaevtyń 2014 jylǵy 17 qańtardaǵy «Qazaqstan joly – 2050: Bir maqsat, bir múdde, bir bolashaq» atty Qazaqstan halqyna Joldaýyndaǵy tapsyrmalardy oryndaý maqsatynda múgedektik pen asyraýshysynan aıyrylý jaǵdaıy boıynsha memlekettik áleýmettik járdemaqylar mólsheri 2016 jyldyń 1 qańtarynan bastap taǵy 25%-ǵa ósedi. Eńbekke jaramsyzdyq pen asyraýshysynan aıyrylý jaǵdaıy boıynsha Memlekettik áleýmettik saqtandyrý qorynan tólenetin áleýmettik tólemderdiń kólemi 7%-ǵa artatyn bolady. №1 jáne №2 tizim boıynsha arnaıy memlekettik járdemaqy mólsheri aılyq eseptik kórsetkishtiń artýyna baılanysty ulǵaıatyn bolady. 2016 jylǵy AEK 2121 teńgeni qurap otyr (2015 jyly – 1982 teńge). Esterińizge sala keteıik, Qazaqstanda aǵymdaǵy jylǵy 1 jeltoqsandaǵy málimetterge sáıkes 1,9 mln-ǵa jýyq zeınetkerler bar, sondaı-aq, shamamen 664,6 myń azamat járdemaqy alyp keledi.
