Almatyda KSRO-ny qaıta jańǵyrtýǵa shaqyrǵan «Za SSSR!» gazeti tegin taratylýda. Bul týraly jýrnalıs Toqtar Jaqash óziniń Feısbýk áleýmettik jelisindegi paraqshasynda dabyl qaqty.

Jýrnalısiń aıtýynsha, Máskeýde jaryq kórgen, A 2 formatyndaǵy gazetti belgisiz bireýler Rysqulov-Súıinbaı dańǵyldarynyń qıylysynda tegin taratqan. Gazet «oqyrmandaryn» birneshe ulttyń «tatý-tátti kún keshken, qaıǵysyz-qamsyz» memleket Keńes Odaǵyn qaıta jańǵyrtýǵa shaqyrady.

«Dabyl! Aqparattyq qaýip tóndi! «SSSR-dy» ańsaý asqynyp bara jatyr. Máskeýde shyǵatyn myna kázıt Almatyda tegin taratylýda. Materıaldary men urany - Qazaqstan Respýblıkasynyń Konstıtýsıalyq qurylymyn talqandaý, eldiń egemendigine qol suǵý. Qazaqstan Respýblıkasynyń zańdy jolmen saılanǵan basshylaryn, Úkimetin, depýtattaryn, áskerı qurylymdaryn joıyp, bodandyq qamytty qaıta kıgizýdi kózdegen. Ózderiniń jazýynsha - "baǵyna qoımaǵan SSSR azamattarynyń organy" eken! Qyrym men Ýkraına, Orta Azıadaǵy týystas memleketterdi bizge qarsy qoıatyn maqalardy úıip-tógipti. Buǵan jol bermeý kerek! Osy másele boıynshaAlmaty Qalasynyń Ákimdigi, Almaty polısıasy tergeý-tekserý amaldaryn júrgizip, radıkaldy-ekstremıstik basylymǵa qarsy Qazaqstan Respýblıkasy Qylmystyq jáne Ákimshilik Kodeksteriniń eń qatal talaptary boıynsha shara qoldanady dep úmittenemin», - deıdi Toqtar Jaqash óz jazbasynda.

Atalǵan oqıǵaǵa baılanysty Almaty qalasyndaǵy tıisti memlekettik mekemelerden ázirge eshbir resmı málimdeme taramady.