KÓZAIYM-KÓŃİL
Jaqynnyń qadiri
Aıaýly anashym Aıman Janpeıisqyzynyń,
Qadirli qaıyn enem Hanıza Temirovanyń,
Asyl jarym Qymbat Joldyǵulqyzynyń
týylǵan kúnderine jyr-shashý!
...Tún tilgilep sanany,
Kún qysqaryp barady...
Eńse basyp, janshydy,
Teńgeniń satpaq balaǵy...
«Shyqpa, janym, shydashy...»
Kete kórme «tún asyp»...
Qalaı qıam jaqyndy,
Bári, bári shyn asyl...
Shyn janashyr anashym,
Peıili pák balasyń...
Sensiz meniń ómirim,
Taba almaıdy jarasym!
Bilmegende jóndi biz,
Qamqor, qalqan boldyńyz.
Ystyqqa da kúıdińiz,
Sýyqqa da tońdyńyz.
Uıqysyz tań atyrǵan,
«Qulynym!» dep shaqyrǵan.
Aınalaıyn anashym,
«AIMAN» degen atyńnan!
Batyr qyzy atandyń,
Janpeıisteı atamnyń.
Arqaladyń anashym,
Salmaq-júgin atannyń...
Ulyń úshin qýandyń,
Órge shyqsa tasy myń.
Aýyrmashy ana-jan,
Myń jasashy, asylym!
******* ******* *******
...Túbine tústim tunyqtyń,
Ómirdiń mánin shyn uqtym.
Taǵdyrymen tel ósken,
Úsh jurty bar jigittiń...
Óz jurtyń – kúnshil, som almas...
Barlyǵyńdy – kóre almas,
Joqtyǵyńa – bere almas,
Jaqsy bolsań – kúndegen,
Jaman bolsań – júndegen...
Qalady súlder, qur deneń...
Synshyl jurtyń – naǵashyń,
Atyńa taqqan taǵa shyn,
Baryńdy berip jaǵasyń...
Kisi bolsań – súıengen,
Kishi bolsań – kúıingen.
Baǵa men synyń – kúıińnen...
Minshil jurtyń – qaıynyń,
Shamasyn tany jaıynyń,
Keregi – qoldyń uzyny,
Bedeliń – jaǵań qyzyly,
Asyrsań ǵana – jaǵarsyń,
Jasyrsań – daýǵa qalarsyń...
Sal-seri, kerbez sylqymdar,
Sezimniń shoǵyn julqyńdar!
Súıenish, qorǵan, tileýqor,
Janashyr úshem jurtym bar...
...Taǵdyrdyń talaı talasy,
Pendeniń – ıman panasy.
Er jigittiń bolady –
ÚSH JURTY, EKİ ANASY...
Qamqorshy peıil, dara úndi,
Qaıyrym boıǵa taraldy.
Hanymnan kem kórmeımin,
HANIZAdaı anamdy!
Anama aıtsam bazyna,
«Anashym» degen taza ún, á?!
Hanıza – arab tilinde,
Qymbat baılyq, qazyna!
Bir dińgektiń tezimiz,
Sezimimizdi – sezińiz...
Meıirimine shomylǵan,
Qazynamyz – Ózińiz!
Anany syılaý – ulǵa syn,
Anany aqyn jyrlasyn.
Kóshirmeńiz sekildi,
Ómirlik jarym QYMBATym!
Syndarmen biter syralǵy is,
Sútpenen sińgen turar kúsh...
Janyma meniń nur quıǵan,
QYMBATym úshin myń alǵys!
******* ******* *******
QYMBATym meniń, serigim,
Ózimdeı súıer seni kim?!.
Daýylda meni qulatpas,
Sezimiń menen senimiń!
Jalǵanda jalǵyz - jarymsyń,
Keshimsiń, túnim, tańymsyń...
Jaratqan Iem buıyrtqan,
Baǵymsyń, taǵym, barymsyń!
Ómirdiń tatqan kermegin,
Qýanysh, úmit, sengenim...
Erteńge birge umtylǵan,
Syńarymsyń sen meniń!..
******* ******* *******
Úsh asylym, úsh aıym,
Shabytty qalaı tusaıyn?!.
Qos anam men jarymdy,
Qushaǵyma qysaıyn!
Sendermen shyńǵa teńdesem,
Qıyndyqtarmen beldesem...
Bar armanym – jalǵanda,
Muńdaryńdy kórmesem...
Júrektiń jaqqan jalynyn,
Asyl jandarym – darynym...
Kemite kórme Jaratqan,
Jaqyndarymnyń qadirin!
Qajymuqan ǴABDOLLA
