Birneshe jyldan beri «Qazaqstan», «Habar», «Tań» telearnalarynan «Altyn taǵa», «Bıngo», «Sýper Loto» lotereıalyq oıyndary úzdiksiz oınatylyp, kórsetilip keledi. Sońǵy kezde qarapaıym halyqtyń lotereıa oıyndaryna degen qyzyǵýshylyǵy artqan. Turaqty túrde oınap, biraz qarjysyn osyǵan jumsap júrgen azamattarymyz jeterlik eken. Máselen, ár senbi kúni termınal arqyly birneshe lotereıa satyp alyp júrgen jigitti syrtynan únemi baıqap júretinmin. Jasy otyzdan asqan jas jigitpen áńgimelesýdiń sáti tústi.
–Aty-jónim – Temir Hasenov, jasym 32-de. Lotereıanyń túrleri kóp. Men kezinde barlyq lotereıa oıyndaryn oınaǵanmyn. Qazir tek «Sýper Loto» degen bir túrin satyp alyp júrmin. Bul oıyn basqalarǵa qaraǵanda ózindik ereksheligimen qyzyq. Máselen, «Sýper Lotonyń» 6/35, 5/36 jáne 5/30 degen úsh túri bar. Sonyń ishinde 6/35 degen oıynnyń djek-pottyq utys kólemi qomaqty. «Sýper Lotomen» oınaǵanyma 4 jyl boldy. Alaıda áli kúnge sheıin djek-pot utqan joqpyn. Jylqy jyly qazaqqa tabysty jyl dep jatady ǵoı, sondyqtan bıyl bas báıgeni utyp qalarmyn dep úmittenemin. Qudaı buıyrtsa, eger osyndaı sáttilik kelse nesıelerimdi jaýyp, úı salýdy jón kórip otyrmyn. Iá, rasynda da Temir sıaqtylar aramyzda kóp. Bir qyzyǵy, lotereıa oıyndaryna ózge ulttyń qarttary kóbirek qyzyǵady. Máselen, 2010 jyly «Sýper Lotonyń» kezekti oıynynda Almaty qalasynyń bir qart turǵyny 155 mıllıon 791 myń 260 teńge kólemindegi djek-pottyq utystyń ıegeri atanypty. Termınalǵa kelip satyp alǵan bıletterin tekserip qana qoımaı, jańadan bılet alyp jatqan jasy seksenge taıap qalǵan orys kempirimen tildesýdiń sáti tústi. – Esimim – Anastasıa Vereshnıkova. Bul oıyndy ermek úshin oınaımyn. Eshqandaı materıaldyq qıynshylyqqa tap bolǵan joqpyn. 60000 teńge kóleminde zeınetaqy alamyn. Bir qyzym Germanıada turady, al ekinshi qyzym bank salasynda jumys isteıdi. Kishi qyzym Marına maǵan osy oıyndy oınaýdy úıretti. Bir baıqaǵanym «Sýper Lotoda» sáttilikti adam óz qolymen jasaıdy eken. Óıtkeni baqytty 6 sandy taýyp alý óz qolyńyzda ekenin umytpaǵanyńyz jón. Alatyn zeınetaqymnyń 10 paıyzyn lotereıa oınaýǵa arnaımyn. Keleshekte djek-pot utyp alsam, jınalǵan somanyń kóbin depozıtke salýdy kózdep otyrmyn. Shetelge shyǵyp qydyrýdy da jón sanaımyn. Shyndyǵynda da, bul oılanatyn nárse eken. Lotereıany turaqty oınaıtyn adamdardyń kóksegeni qaıtken kúnde de djek-pot utyp alý ekendigi belgili. Eger oıynshynyń armany oryndalsa, jeńip alǵan somasyn qaıda jumsaıtynynyń ózi jumbaq bolyp keletini jasyryn emes. Áıtse de, qarakóz qandastarymyzdyń armany oryndalsa kóbisi nesıe jabýdy, úı salýdy ne bolmasa toı jasaýǵa jumsaıtyny anyq. Bir baıqaǵanym, ózge ult ókilderiniń kóksegeni basqasha bolyp shyqty. Olardyń deni depozıtke salýdy kózdeıdi. Elimizde «Sýper Loto» oıynyna qumartqan azamattardyń sanynyń artýyna da sebep joq emes. Birinshiden, bul lotereıada adam óziniń sáttiligin ózi jasap alady deıdi mamandar. Ekinshiden, 2009 jyly jaryqqa shyqqan «Sýper Loto» satyp alýshylarǵa tıimdi bolyp otyr. Qazirgi kúnde elimizdiń 15 qalasynda 1300 termınal halyqqa qyzmet etedi eken. Ásirese, bul lotereıa túrin Almaty, Astana, Qaraǵandy, Shymkent, Aqtóbe qalalarynyń turǵyndary óte kóp oınaıtyny anyqtaldy. Djek-potty jeńip alyp, qomaqty qarjyǵa ıe bolyp jatqandar da osy qaladan jıi kezdesedi. Úshinshiden, jarnamasy óte myqty. «Baqytqa kenelgen» adamdardyń qansha aqsha utyp alǵandyǵy jóninde jarnamalar beriledi. Áıtse de, utysqa kenelgen adamnyń atyn kompanıa ókilderi jasyryn túrde ustaıdy eken. Tipti taıaýda ǵana elimizde birneshe adam teńge boıynsha mıllıoner atanyp úlgeripti. Máselen, ótken qańtar aıynda Almatynyń bir turǵyny 2 963 440 teńge utyp alypty. Al byltyrǵy jyldyń qazan aıynda Astananyń bir turǵyny 87 795 175 teńgeni quraıtyn eń basty 1-dáreje boıynsha djek-pottyq utystyń ıegeri atandy. Jalpy, bul lotereıada aksıa oıyndary jıi uıymdastyrylady. Sondyqtan oıynshylardyń sany jyldan-jylǵa artyp keledi. «Sýper Bıngo» oınap baıyǵan azamattar da joq emes. Bul lotereıada utys sommasy birneshe márte kóbeıtilgen stavka boıynsha sheshiledi. Sondyqtan táýekeldilikten júreksinbeı oınap ári baǵyńyz ashylsa, aıaq astynan aqshaly bolýyńyz ǵajap emes. «Altyn Taǵa», «Qazloto» jáne t.b. lotereıa túrlerine úmit artyp oınaıtyndar jeterlik. Bul lotereıalar boıynsha da qomaqty qarjyǵa kenelgender barshylyq. Áıtse de, mol qarjyǵa kenelgender saýsaqpen sanarlyqtaı bolatyny jasyryn emes. Sondyqtan lotereıany oınaǵan adamdardyń kóbisi utylady. Lotereıany turaqty túrde oınaǵan adamda lýdomanıa, ıaǵnı oıynǵa táýeldilik aýrýy paıda bolady. Osydan-aq adamnyń júıkesine kúsh túsetini belgili. Oıynnyń aty – oıyn. Keıde utady, kóbine utylady. Mundaı kezde adamnyń júıke júıesi buzylyp, ashý-yzaǵa jol beredi. Negizinen, oıynǵa qumar adamdardy eki topqa bólýge bolady: birinshisi – qoǵamnyń áleýmettik qorǵalmaǵan kedeı tobynan shyqqandar, olar úlken utysqa qol jetkizip, baılyqqa birden kenelgisi keledi. Ekinshileri – shendi-shekpendi, aqshasyn qaıda jumsaryn bilmeı, erikken baılar. Olar ýaqyt óltiremin dep júrip, oıynǵa qumarlanyp, «aýrýlar» qataryna qosylady. Sondyqtan lotereıa oıynshysy bolsańyz, shekten asyrmaı az oınaǵanyńyz durys. Utysqa kenelmeseńiz taýyńyz shaǵylmasyn. Óıtkeni sátsizdikterdiń ózi aınalyp kelip bir kúni sáttilikke alyp keledi emes pe?! Úmitsiz shaıtan degen ǵoı. Eshqashan da úmitińiz úzilmesin. Bálkim bir kúni siz de qaltaly azamattardyń birine aınalyp qalarsyz.
Saltanat JASBATYRQYZY
