ÁLDI-ANA

Kirpik ilmeı jatyrsyń nege, anashym?..
Qarańǵy tún. Uıqysyz sen ǵanasyń. 
"Jas terekti" nesine ýaıymdadyń, 
Jel soǵady, áıteýir jel bolǵasyn.

Juldyz bitken jutylyp janaryńa, 
Meıirimge tunshyqty-aý ǵalam myna.
Jer degeniń - pendege bolsa meken, 
Aspandy ákep qoıamyn tabanyńa!

Taýsylmashy... Emes bul janashýym -
Analardyń qashan da baǵasy uly!
Seniń kóziń - Qudaıǵa syıynatyn, 
On segiz myń ǵalamnyń qarashyǵy. 

Kirpik ilmeı jatyrsyń nege, anashym?..
Qarańǵy tún. Uıqysyz sen ǵanasyń. 
"Jas terekti" nesine ýaıymdadyń, 
Sel júredi, áıteýir sel bolǵasyn.

Al, myna tún - ózgermes baıyrǵy tún, 
Qaıyrsyz kim, bilmeımin qaıyrly kim...
Uıyqtashy, anashym, alańdamaı, 
Uıyqtańdar, analar, qaıyrly tún! 

Áldı, Ana...

    KÚLİKTİŃ KÓZ JASY

                                           «Júregim jylqydaı jylaıdy...»

                                                                             B.Qaraǵyzuly

Kúreń belde kisinese bir qulyn,

Beımaza bop ótetindeı bul túnim.

Jas tamǵanyn kórip pe ediń, qalqataı,

Janarynan jylqynyń?

Kórseń etti, kórseń etti muny da,

Janýardyń qanyq bolyp muńyna.

Men sıaqty balaýdy da qoıýshy eń,

Keı adamdy ulyǵa!

Terin alyp, saıyn dala tósinde,

Men taıymmen shabýshy edim kósile.

Solaı jortyp kele jatqan sátte bir,

Súringeni esimde.

Ot tuıaǵy orǵa kirip ketkennen,

Bir aıaǵy synǵandyǵyn dóp kórgem.

(Keıde osylaı súrinedi kisi de,

Ótý úshin ótkelden).

Kúreńime kóringendeı asqar jat,

Jatyr eken kózderinen jas parlap.

Boldy sonda bar nazary attyń tek,

Aq bult júzgen aspan jaq.

...Kel, jarqynym, úrkıdi dep qashpaǵyn,

Onyń muńy – sen kórgennen basqa muń.

Kúlik syndy jylaǵanda sezesiń,

Júregińde tas baryn.

Átteń, átteń, joq bolǵan soń muńdasy,

Jylqy júrek kúrsinedi, tyńdashy.

Ǵumyr boıy pende tókken monshaqtar –

Sáıgúliktiń bir jasy...

       QAIYRSHY

Toqtamaı bir jan óte me?
Qalanyń demi - tym sýyq.
Ol nege jatyr kóshede, 
Ol nege jatyr kúrsinip?..

Qaıǵydan tas bop qalsań da, 
Tursańshy endi, baıǵusym.
Bireýge kúlki bolsań da, 
Men úshin aýyr qaıǵysyń. 

Jibitip kóńil tońyńdy, 
Qaıǵyńdy Kúndeı eritken,
Allaǵa jaıar qolyńdy, 
Adamǵa jaıdyń nelikten?!

Synaqqa keler daıyn kim, 
Ólsheýli mynaý bes kúnde. 
Sharanasynda ýaıymnyń, 
Sharasyz qalǵyp kettiń be? 

Úmittiń otyn jaǵa almaı, 
Muń toldy kóńil-keseme.
Bárimiz - baqyt taba almaı, 
Qańǵyǵan janbyz kóshede...

                        QAR

Qar jaýyp tur... Qalqam, sen kelshi beri, 
Bizdik sezim - júrektiń elshileri. 
Qos erini túıisken ekeýmizge, 
Aqyn-aspan jyr oqyp bersin endi. 

Aıyptasyn, bireýler kinálasyn, 
Kókiregimde onsyz da kúná basym.
Qushaǵynda muz-qardy balqytqan, jer, 
Sezimimdi sen ǵana uǵa alasyń. 

Qyz aldynda dármensiz ekenimdi, 
Kórsetedi myna tún beker úlgi. 
Jalǵyz qalsam, keshirmes jalqy Qudaı, 
Eki dúnıe keshirer eki erindi...

Ǵarshy Iesi jaratqan ekeý qylyp, 
Ǵashyqtardyń qashanda jetegi úmit.
Qar aspannan quldılap túsken saıyn, 
Biz aspanǵa baramyz kóterilip. 

Qar jaýyp tur...

Birjan Ermekuly Ahmer

Shákárim atyndaǵy Semeı memlekettik ýnıversıtetiniń 3-kýrs stýdenti, Qadyr Myrza Álige arnalǵan respýblıkalyq «Ólmes óleń» atty jyr-músháırasynyń 1-oryn ıegeri, Qazaq handyǵynyń 550 jyldyǵyna oraı uıymdastyrylǵan «Máńgilik el – taǵdyrym» atty respýblıkalyq jyr-músháırasynyń 1-oryn ıegeri.