3 اقپان كۇنى جوعالىپ، كەشە مۇردەسى تابىلعان استاناداعى مەديسينالىق ۋنۆەرسيتەتتىڭ ستۋدەنتى ەراسىل اۋباكىروۆتى بەلگىسىز ادامداردىڭ ازاپتاپ جاتقان ءساتى تۇسىرىلگەن ۆيدەوسىن كتك تەلەارناسى جاريالادى، - دەپ حابارلايدى «قامشى» پورتالى.

پوليسەيلەر مەن ەرىكتىلەر ءبىر اپتا بويى ىزدەگەن ەراسىلدىڭ مۇردەسى كەشە تاڭەرتەڭ استانانىڭ سىرتىنان تابىلدى. اياق-قولى بايلانعان، اۋزىنا سكوچ جاپسىرىلعان مۇردەنى بەلگىسىز بىرەۋلەر باسىنا پاكەت كيگىزىپ، قارعا كومىپ كەتكەن. وسى ىسكە قاتىسى بار دەپ قاماۋعا الىنعان 3 جىگىتتىڭ بىرەۋىنىڭ اناسى ساۋلە ساتىبالدينا ءوزىنىڭ ۇلى بۇل ىسكە كەزدەيسوق كۋاگەر بولعان دەپ وتىر. ونىڭ ايتۋىنشا ۇلى نۇرجاننىڭ قۇجاتىمەن ءبىر تانىسى كوتتەدج جالعا العان. نۇرجان سول قۇجاتتى الۋعا بارعاندا بەلگىسىز جىگىتتى ازاپتاپ جاتقانداردىڭ ۇستىنەن تۇسەدى. وقيعانى ۆيدەوعا ءتۇسىرىپ الادى.

ۆيدەونى تۇسىرگەن جىگىتتىڭ اناسى ساۋلە ساتىبالدينا: «ءبىر ادامدى بايلاپ قويعان ەكەن. سوسىن ۇلىم سۋرەتكە ءتۇسىرىپ العان دا قاشقان مەنىڭ بالام. قاشقان دالاعا. سوسىن مۇنى ۇستاي الماي قاشىپ كەتەدى. ءبىراق ءىزىن جاسىرعان نۇرجان تەك 2 كۇننەن كەيىن عانا پوليسەيلەرگە حابار بەرگەن. پوليسيا ەش ويلانباستان ونىڭ ءوزىن قاماپ تاستادى»، - دەيدى.  

اقتاۋدان ارنايى كەلگەن ساۋلە ساتىبالدينا ۇلىنىڭ تاعدىرىنا الاڭداۋلى. ايتۋلارىنشا، نۇرجان ەسىمدى جىگىت وسى جانتۇرشىگەرلىك وقيعانىڭ كۋاگەرى. كەزىندە ءتىپتى ۇلدارى كۇدىكتىلەرمەن بىرگە پروكۋراتۋرادا جۇمىس ىستەگەن كورىنەدى. ويلاماعان جەردەن جانتۇرشىگەرلىك وقيعانىڭ كۋاسى بولعان. ەندى كوز جاسى كول بولعان انا بالاسىنىڭ كۋاگەردەن قىلمىسكەرگە اينالىپ كەتەرىنەن قورقادى. ونىڭ ۇستىنە باستى كۇدىكتىنىڭ ءبىرىنىڭ اتا-اناسى وسكەمەندەگى اۋقاتتى وتباسىلار ەكەن.

مارقۇمنىڭ تۋىستارى مەن دوستارى، ۇستازدارى ونىڭ جات قىلىقتاردان ادا ۇلگىلى ستۋدەنت بولعانىن ايتۋدا.