بۇگىن كەشكى بەستەر شاماسىندا استاناداعى «حان شاتىر» ويىن ساۋىق-ساۋدا ورتالىعىنداعى مەيرامحانالاردىڭ بىرىندە ءورت تۇتانىپ، ورتالىققا كەلۋشىلەر تۇگەلدەي سىرتقا شىعارىلعان، - دەپ حابارلايدى «قامشى» پورتالى.

وقيعا تۋرالى كۋاگەرلەر الەۋمەتتىك جەلىدە جارىسا جازۋدا. ولاردىڭ ايتۋىنشا، ورتالىقتىڭ ءۇشىنشى قاباتىنداعى مەيرامحانالاردىڭ بىرىندە ءورت شىققان. سودان شىققان ءتۇتىن بۇكىل ورتالىقتىڭ ىشىنە جايىلعان.

استانا قالالىق توتەنشە جاعدايلار دەپارتامەنتى تاراتقان حابارلامادا، ءورت تۋرالى حابار ارنايى قىزمەتكە ساعات 16.45-تە تۇسكەن. وقيعا ورنىنا ءورت سوندىرۋشىلەر التى مينۋتتا جەتىپتى. دەپارتامەنت ءورتتىڭ ورتالىقتاعى «حارديس» ءدامحاناسىنىڭ اس دايىندايتىن بولمەسىنەن شىققانىن ايتىپ وتىر. ءورت سوندىرۋشىلەر ەلەكترجەلىسىنەن شىققان ءورتتى ءسوندىرىپ، قۇتقارۋشىلار ورتالىق ىشىندەگى ادامداردى سىرتقا شىعارعان.

وقيعادان قازا بولعاندار مەن باسقا دا زارداپ شەككەندەر جوق.