ميۋنحەندە ءوتىپ جاتقان قاۋىپسىزدىك جونىندەگى كونفەرەنسيادا ءسوز العان رف پرەمەرى دميتريي مەدۆەديەۆ ناتو ەلدەرى مەن رەسەي اراسىنداعى قارىم-قاتىناستىڭ شيەلەنىسكەنىن، جاعدايدىڭ قىرعي-قاباق سوعىس كەزىندەنى احۋالعا قايتا شەگىنگەنىن ايتتى، - دەپ حابارلايدى «قامشى» پورتالى.
«ءبىرتۇتاس ەۋروپا اقىرى بولمادى، ءبىزدىڭ ەكونوميكالارىمىز وتە باياۋ وسۋدە. تاياۋ شىعىس ەلدەرىندە، سولتۇستىك افريكادا جاعداي ۋشىقتى. ميگراسيالىق كوللاپس ورىن الۋدا. ەۋرووداق پەن رەسەي قارىم-قاتىناسى بۇزىلدى، ۋكراينادا ازاماتتىق سوعىس بولۋدا»، - دەگەن د. مەدۆەديەۆ ناتو مەن رف قارىم-قاتىناسىنا قاتىستى دا ويىن ءبىلدىردى.
«كۇن سايى ءبىزدى بىرەسە ناتو ءۇشىن، بىرەسە جەكە ەۋروپا ءۇشىن، ەندى بىردە امەريكا، تاعى باسقا ەلدەر ءۇشىن ۇلكەن ءقاۋىپ دەپ جاريالاپ جاتادى. ورىستار يادرولىق سوعىس باستايتىنى تۋرالى قورقىنىشتى فيلمدەر تۇسىرىلۋدە. كەيدە مەن «ءبىز 2016 جىلدا ءجۇرمىز بە، جوق الدە 1962 جىلدامىز با؟» دەگەن ويعا قالامىن»، - دەدى ول.
الايدا، رەسەيمەن سوعىساتىنداي ناتو جىندى ەمەس دەگەن ناتو باس حاتشىسى يەنس ستولتەنبەرگتىڭ جاۋابى مەدۆەديەۆتى مازاق قىلعانداي ءسوز بولدى.
«كەيبىرەۋلەر ناتو رەسەيمەن سوعىسۋعا قۇشتار ايكەزبە (لۋناتيك – رەد.) دەپ الاڭدايدى. مەن بۇل الاڭداۋشىلىقتى تۇسىنەمىن، ءبىراق ونىمەن كەلىسە المايمىن»، - دەگەن يەنس ستولتەنبەرگ اسكەري ۇيىمنىڭ ماسكەۋمەن كونسترۋكتيۆتى ديالوگ جۇرگىزۋگە قابىلەتتى ەكەنىن جەتكىزدى.
گەرمانيانىڭ سىرتقى ىستەر ءمينيسترى فرانك-ۆالتەر شتاينمايەر دە Suddeutsche Zeitung نەمىس گازەتىنە قىرعي-قاباق سوعىستىڭ اۋىلى الىس ەكەنىن ايتقان.
«ءبىز مۇلدەم قىرعي-قاباق سوعىس جاعدايىندا ەمەسپىز. مەن ونىڭ ءسوزىن ءبىز قىرعي-قاباق سوعىسى كەزەڭىنە قايتا كەلمەۋگە تىرىسايىق دەپ ءتۇسىندىم»، - دەگەن گەرمانيا سىرتقى ىستەر ءمينيسترى.
مەدۆەديەۆتىڭ بۇل بايانداماسىنان ۇققانىمىز، تەكە-تىرەس قاجىتقان رەسەي بيلىگى ەۋروپا مەن باسقا دا وركەنيەتتى ەلدەرگە باستاپقى نيەتىنەن اينىعانىن، كيكىلجىڭدى ىمىرالاسا شەشۋگە مۇددەلى ەكەنىن ەمەۋرىنمەن بىلدىرگىسى كەلەتىن سياقتى. ول ەمەۋرىندى جانە ورىس باسشىسى ءوزى ەمەس، وسى ۋاقىتقا دەيىن جەر-كوككە كۇلكى بولىپ بىتكەن سىرتقى ىستەر ءمينيسترى سەرگەي لاۆروۆتىڭ ەمەس، الەمدىك قاۋىمداستىق الدىندا ساياساتكەر رەتىندە ءالى دە سۇيكىمى سارقىلا قويماعان دميتريي مەدۆەديەۆتىڭ اۋزىمەن ايتقىزىپ وتىر.
دارحان مۇقان
