قىتايداعى رەيتينگى ەڭ جوعارى الەۋمەتتىك جەلى wechat.com جەلىسىندە الاياقتىق ارەكەتتەر جيىلەپ كەتكەن، - دەپ حابارلادى قىتايدىڭ قوعامدىق قاۋىپسىزدىك مينيسترلىگىنىڭ باس شتابى.
ۆەدومستۆو تاراتقان شۇعىل حابارلامادا الاياقتاردىڭ بەلگىلى ءبىر ادامنىڭ اتىنان پاراقشا اشىپ، ونىڭ جەلىدەگى تانىستارىنان اقشا سۇراۋ، باسقا دا كومەك سۇراۋ ارەكەتتەرىنىڭ جيىلەپ جاتقانى ايتىلادى.
«Wechat قولدانۋشىلارى ءسىزدىڭ باس فوتوڭىز بەن قولدانعان ەسىمىڭىزدى پايدالانىپ دوستارىڭىزدان، تانىستارىڭىزدان اقشا سۇراۋى مۇمكىن. سول سەبەپتى جەلى قولدانۋشىلارى مۇنداي وتىنىشتەرگە مۇقيات قاراعانى ءجون» دەلىنگەن حابارلامادا.
Wechat ءموبيلدى كوممۋنيكاسيالىق جۇيەسى قىتايدا 2011 جىلدان بەرى جۇمىس ىستەيدى. 2013 جىلى بۇل جەلى قولدانۋشىلارىنىڭ سانى 300 ميلليوننان اسقان. ولاردىڭ 70 ميلليوننان استامى قىتايدان سىرتقارى جەرلەردە تۇراتىن قولدانۋشىلار ەكەن.
بۇل جەلىنىڭ باسقا الەۋمەتتىك جەلىلەردەن ايىرماشىلىعى ءوز ىشىندە اقشا اۋدارىمدارىن جۇزەگە اسىرۋعا مۇمكىندىك بەرەدى. 2016 جىلى جۇڭگو جاڭا جىلىن اتاپ ءوتۋ كەزىندە وسى جەلىمەن اۋدارىلعان قاراجات سوماسى 2015 جىلى paypal قىزمەتى ارقىلى جاسالعان اۋدارىمداردان اسىپ تۇسكەن.
پىكىر قالدىرۋ