ءال-فارابي اتىنداعى قازۇۋ كىتاپحاناسىندا ادولف ارسيشيەۆسكييدىڭ "بيگەلدى گابدۋللين: پراۆو نا يسپوۆەد" اتتى كىتابىنىڭ ەكىنشى باسىلىمى تانىستىرىلدى، - دەپ حابارلايدى «قامشى» پورتالى ۋنيۆەرسيتەتتىڭ باسپا ءسوز قىزمەتىنە سىلتەمە جاساپ.
دەرەكتى رومان-ەسسە «ۆەليكوە كوچيەۆە» كىتابىنىڭ اۆتورى، پۋبليسيست بيگەلدى ءعابدۋلليننىڭ – ءومىر جولىنا ارنالعان. بيگەلدى عابدۋللين – بەلگىلى جازۋشى، جۋرناليست، باس رەداكتور جانە «نوۆوە پوكولەنيە»، «XXI ۆەك»، «Central Asia Monitor» سياقتى رەسپۋبليكالىق گازەتتەرىنىڭ شىعارۋشىسى. قازاق پەن-كلۋبىنىڭ پرەزيدەنتى. «ۆەليكوە كوچيەۆە» كىتابىنىڭ اۆتورى.
ادولف ارسيشيەۆسكيي – بەلگىلى اقىن، قازاقستاندىق العاشقى «پەرەكرەستوك» سەريالىنىڭ باس رەداكتورى، جازۋشىلار وداعىنىڭ مۇشەسى. ول نەلىكتەن ءوزىن ءدال وسى تاقىرىپ قىزىقتىرعانىن، ناقتىراق ايتقاندا ادام ەركى مەن زامانداسىنىڭ العا دەگەن ۇمتىلىسى جايلى ايتىپ بەردى. ومىردە ءارقاشان ءوز ورنى بار – سەنىم، دوستىق جانە ماحاببات تۋرالى دا ءسوز قوزعادى.
«بيگەلدى عابدۋللين مەن ادولف ارسيشيەۆسكييدىڭ شىعارماشىلىعى زامانداستارىمىزدىڭ ءومىرى جانە جۋرناليستيكانىڭ قيىندىقتار مەن قاۋىپ-قاتەرگە تولى ماماندىق ەكەنىن تانۋعا مۇمكىندىك بەردى. اتالمىش كىتاپ جاس بۋىنعا ۇلكەن ۇلگى بولادى دەپ بىلەمىن. كىتاپتى مەن دە اسقان قىزىعۋشىلىقپەن وقىپ شىقتىم»، – دەدى كەش تىزگىنىن ۇستاعان ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عالىم مۇتانوۆ.
كىتاپتىڭ تىلدىك ەرەكشەلىكتەرىنە قاتىستى قازۇۋ پروفەسسورى، ف.ع.د. اسلان جاقسىلىقوۆ: «اۆتوردىڭ كوپ تومدى ارحيۆ بەتتەرىن زەرتتەگەنى كورىنىپ اق تۇر. كىتاپ سىرلى سەزىمگە تولى. كوكشەتاۋدىڭ سۇلۋلىعى اسقان شەبەرلىكپەن سۋرەتتەلگەن. اۆتوردىڭ وزىندىك ەرەكشەلىگى كىتاپتىڭ تىلدىك جەڭىلدىگىمەن، ەنسيكلوپەديالىق ناقتىلىعىمەن سيپاتتالادى»، - دەگەن پىكىر ءبىلدىردى.
كەزدەسۋ بارىسىندا بيگەلدى عابدۋللينگە ءسوز كەزەگى كەلگەندە كىتاپتىڭ باس كەيىپكەرى ستۋدەنتتەر مەن كەش قوناقتارىنىڭ ومىرلىك تاجىريبەگە، قىزمەتىنە، ءجۋرناليستىڭ كاسىبي ەتيكاسىنا بايلانىستى ءبىرقاتار سۇراقتارىنا جاۋاپ بەردى. سۇراق قويۋ بارىسىندا وسكەلەڭ ۇرپاقتىڭ بەلسەندىلىگى بايقالدى. ءال-فارابي كىتاپحاناسى وسى كەشتە عىلىمي زيالى قاۋىمدى، وقىتۋشى-پروفەسسورلىق قۇرامدى، ستۋدەنتتەردى، قوعام قايراتكەرلەرى مەن جۋرناليستەردى ءبىر شاڭىراق استىنا جينادى.
پىكىر قالدىرۋ