جول اپاتىن جاساپ 4 بىردەي ادامدى ولتىرگەن شىمكەنتتىك مۇرات تانكەيەۆكە قاتىستى سوت ۇكىم شىعاردى، - دەپ حابارلايدى «قامشى» پورتالى SN.KZ-كە سىلتەمە جاساپ.

بۇگىن شىمكەنت قالاسى ءال-فارابي اۋداندىق سوتى م.تانكەيەۆكە 9 جىل باس بوستاندىعىنان ايىرۋ تۋرالى ۇكىم شىعاردى. الايدا، قىلمىسكەر جازاسىن ادەتتەگى تۇزەۋ مەكەمەسىندە ەمەس، قونىس كولونياسىندا وتەيتىن بولادى. ايىپتى سونداي-اق، 4 جىلعا كولىك جۇرگىزۋ قۇقىعىنان دا ايرىلىپ وتىر. ال، سۋديا جابىرلەنۋشى تاراپتىڭ شاعىمىندا كورسەتىلگەن ماتەريالدىق شىعىندى وتەۋ تالابىن قاناعاتتاندىرعان جوق. تەك مورالدىق شىعىن ءۇشىن تانكەيەۆتىڭ تۋىستارى 1،5 ميلليون تەڭگە تولەيتىن بولىپ شەشىلدى.

ەستەرىڭىزگە سالايىق، وتكەن جىلدىڭ 22 قاراشاسى كۇنى مۇرات تانكەيەۆ "لەكسۋس" كولىگىمەن جولدىڭ قارسى باعىتىنا شىعىپ، جوعارى جىلدامدىقپەن "اۋدي 80" كولىگىنە سوقتىعىسقان بولاتىن. سالدارىنان "اۋديدە" بولعان ءتورت ادام كوز جۇمدى. ولاردىڭ اراسىندا 1 جانە 5 جاستاعى ەكى ءسابي دە بار ەدى، مارقۇمداردىڭ بارلىعى ءبىر وتباسىنىڭ مۇشەلەرى.

وقيعادان كەيىن جۇرگىزىلگەن سوت-مەديسينالىق ساراپتاما مۇرات تانكەيەۆتىڭ كولىكتى ماس كۇيدە جۇرگىزگەندىگىن انىقتادى.

بۇگىن تاڭەرتەڭ وتكەن سوت وتىرىسىندا پروكۋرور سۋديادان ايىپتىنى 9 جىلعا باس بوستاندىعىنان ايىرۋدى، جازاسىن جالپى رەجيمدەگى كولونيادا وتەۋىن سۇراعان بولاتىن. الايدا، تۇستەن كەيىن وتكەن سوڭعى وتىرىستا سۋديا م. تانكەيەۆكە "جەڭىلدىك جاساپ"، ونى تولىقتاي باس بوستاندىعىنان ايىرعان جوق، ياعني 9 جىلدىق جازاسىن قونىس كولونياسىندا وتەۋگە ۇكىم شىعاردى.

سوتتىڭ بۇل شەشىمىمەن جابىرلەنۋشى تاراپ كەلىسپەيتىدىگىن ايتىپ وتىر. ولار ەندى جوعارى ينستانسيالارعا ارىزدانباق.