استانادا جاۋىزدىقپەن ولتىرىلگەن ستۋدەنت ەراسىل اۋباكىروۆ ولىمىنە قاتىسى بار دەپ قاماۋعا الىنعان كۇدىكتىلەردىڭ ءبىرى عالامتوردان وققاعاردىڭ جۇىمىسىن ىزدەگەن، - دەپ حابارلايدى «قامشى» پورتالى YK-news.kz-كە سىلتەمە جاساپ.

قىلمىستىق ىسكە قاتىستى قاماۋعا الىنعان ۆيتاليي شەرستەنيەۆ استانادا تۇرعانىمەن وڭتۇستىك قازاقستان وبلىسىنىڭ تۋماسى كورىنەدى. 28 جاستاعى كۇدىكتى قۇرىلىس كومپانيالارىنىڭ بىرىندە جۇرگىزۋشى بولىپ جۇمىس ىستەگەن. قايعىلى وقيعادان بۇرىن ول جۇمىسىنان شىعىپ كەتكەن. ۆ. شەرستەنيەۆتى تۇتقىنداۋ تۋرالى سوت قاۋلىسىندا ول جۇمىسسىز رەتىندە كورسەتىلگەن.

الايدا، ونىڭ وLح.kz سايتى ارقىلى جۇمىس ىزدەگەنى بەلگىلى بولىپ وتىر. سايتقا بەرگەن حابارلاندىرۋىندا ول ءوزىنىڭ وققاعار («تەلوحرانيتەل») رەتىندە نەمەسە جۇرگىزۋشى بولىپ جۇمىسقا ورنالاسۋعا ءازىر ەكەنىن جازعان. جارناما اۆتورى ءوزىنىڭ دەنە سيپاتتارى مەن توزىمدىلىگىن ايتىپ، پرەمەر-كلاستاعى كولىكتەر ايداعانىن العا تارتقان.

سونداي-اق، ول ۇيگە بارىپ ماسساج جاسايتىن دا «ونەرى» بارىن ەسكەرتكەن كورىنەدى. 

وسى جەردە ە. اۋباكىروۆ ولىمىنە قاتىستى تۇتقىندالعان تاعى ءبىر كۇدىكتى 31 جاستاعى اندرەي تيحونەنكو دا جۇمىسسىز ەكەنىن ايتا كەتۋ كەرەك. الايدا، كەي اقپارات قۇرالدارى ول ۆ. شەرستەنيەۆ ەكەۋى وسى ىستەگى ءۇشىنشى كۇدىكتى ايان مەيىربايەۆتىڭ كۇزەتشىلەرى قىزمەتىن اتقاردى دەگەن دە اقپارات تاراتۋدا.

ەستەرىڭىزگە سالساق، 10 اقپان كۇنى استانا قالاسىنىڭ سىرتىنان ازاپتاپ ولتىرىلگەن ستۋدەنت ەراسىل اۋباكىروۆتىڭ مۇردەسى تابىلدى. مارقۇمدى ازاپتاپ جاتقان ءسات تۇسىرىلگەن ۆيدەو دا الەۋمەتتىك جەلىلەردە تاراتىلدى.