10 اقپان كۇنى استانا قالاسىندا ازاپتاپ ولتىرىلگەن ستۋدەنت ەراسىل اۋباكىروۆتىڭ مۇردەسى تابىلدى. وقيعاعا قاتىسى بار دەگەن ءتورت كۇدىكتى قاماۋعا الىنىپ، تەرگەۋ باستالدى. ىشكى ىستەر ورگاندارى بولعان قىلمىستىڭ جاي-جاپسارى مەن وعان سەبەپ بولاتىن جايتتەردى تەرگەۋ قۇپياسىنا بايلانىستى جاريالاماي وتىر. سوعان قاراماستان الەۋمەتتىك جەلىدە تام-تۇمداپ بولسا دا وقيعاعا قاتىستى بولجامدار ايتىلۋدا. سولاردىڭ ىشىندەگى ماڭىزدىسى الەۋمەتتىك جەلى مەن اقپارات قۇرالدارىن شۋلاتقان ۆيدەو بولدى.

وقيعاعا بايلانىستى پىكىرلەردىڭ ىشىندە ەرەكشە اتاپ وتەرلىگى ونى وتكەن جىلدىڭ باستى قىلمىستىق وقيعاسىنىڭ ءبىرى بولعان ءالىبي جۇماعۇلوۆقا قاتىستى ىسكە ۇقساتۋ بولىپ وتىر. 365info.kz سايتى وسى ەكى ءىستىڭ اراسىنا وزىنشە پارالەل جۇرگىزگەن ەكەن. وندا وتكەن جىلعى ءالىبي جۇماعۇلوۆتىڭ اياۋسىز سوققىعا جىعىلۋى مەن ەراسىل اۋباكىروۆتىڭ ازاپتاپ ءولتىرىلۋى اراسىنداعى ءبىراز ۇقساستىقتار انىقتالعان.

ەكى وقيعاعا دا ورتاق باستى ۇقساستىق – جاۋىزدىق. ەكى وقيعادا دا قىلمىسكەرلەر ادام توزگىسىز جاۋىزدىققا بارعان. ەكىنشى ۇقساستىق رەتىندە وقيعاعا قالتالى، ىقپالدى ازاماتتاردىڭ قاتىستى بولۋىن ايتۋعا بولادى. ءبىرىنشى وقيعاداعى قالتالى ازامات – قايرات جامالييەۆ، ەكىنشىسىندە – وسكەمەندىك كاسىپكەر ەسەن مەيىربايەۆ.

ەكى وقيعادا دا قىلمىستىق ارەكەت ورنى رەتىندە بولەك ورنالاسقان تۇرعىن ءۇي تاڭداپ الىنعان.

ەراسىل دا ءالىبي دە قىلمىسكەرلەرمەن كەزدەسۋگە ءوزى بارعان جانە ول تۋرالى ەشكىمگە ەسكەرتپەگەن. ءالىبيدىڭ قىلمىس ورنىنا ءوز اياعىمەن بارعانى باسى اشىق ماسەلە. ال، ەراسىل اۋباكىروۆتىڭ وقيعا ورنىنا قالاي جەتكەنى ازىرگە بولجام كۇيىندە عانا. ءبىراق، ەكى جىگىت تە كەزدەسۋگە كەشكى مەزگىلدە شاقىرىلعان. ياعني، ول كەزدەسۋدىڭ اناۋ ايتقانداي «جىلى جۇزدەسۋ» بولمايتىنىن ءتۇسىنۋ قيىن ەمەس ەدى. سوعان قاراماستان ولار، كەزدەسۋگە جاقىندارىن ەسكەرتپەي بارعان.

ەكى وقيعاداعى جابىرلەنۋشىلەردىڭ دە جاس شامالارى بىردەي. ءالىبي ول كەزدە 24 جاستا بولسا، ەراسىل 23 جاستا ەدى. ەكى جىگىت تە ۇيىمداسقان توپتىڭ شابۋىلىنا تاپ بولدى. ءالىبيدى استانالىق كاسىپكەر قايرات جامالييەۆ پەن ونىڭ سىبايلاستارى سوققىعا جىقسا، ەراسىلدى كەمى ءۇش جىگىت جابىلىپ ولتىرگەن.

ەكى وقيعادا دا قىلمىستىق ارەكەتتەر ۆيدەوعا جازىلعان. ءالىبي وقيعاسىندا ۆيدەوعا تۇسىرۋشىلەر ونىڭ الدەبىر قىلمىستى جاساعان مويىنداۋىن تۇسىرسە، ەراسىلدىڭ ازاپتالۋى ۆيدەو اۆتورى نۇربەك ءاجىمبايدىڭ ايتۋىنشا، كەزدەيسوق تۇسىرىلگەن. بۇل ۆيدەوعا قاتىستى ناقتى شەشىم ءالى شىققان جوق.

ەراسىلدىڭ جوعالۋى مەن ءالىبيدىڭ سوققىعا جىعىلۋى الەۋمەتتىك جەلىدە جاريالانىپ، قىزۋ تالقىلاندى.

ەكى وقيعانىڭ نەگىزگى ۇقساستىقتارى – وسىلار. ال، ايىرماشىلىعى بىرىندە جابىرلەنۋشى سوققىعا جىعىلعانىمەن جانى امان قالدى، ەكىنشىسىندە جابىرلەنۋشى قازا تاپتى. سوڭعى وقيعاعا قاتىسى بار دەگەن 4 كۇدىكتى ءقازىر قاماۋعا الىندى. 

جومارت ابدوللا ۇلى