بۇگىن قارۋلى كۇشتەردىڭ «وڭتۇستىك» وڭىرلىك قولباسشىلىعىندا وڭتۇستىك قازاقستان، جامبىل جانە قىزىلوردا وبلىستارىنىڭ اۋماعىندا ورنالاسقان اسكەرلەردىڭ جاۋىنگەرلىك ازىرلىگىن كەنەتتەن تەكسەرۋدىڭ ءبىرىنشى كەزەڭى باستالدى، - دەپ حابارلايدى «قامشى» پورتالى قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.

«وڭتۇستىك» وڭىرلىك قولباسشىلىعىنىڭ بولىمدەرى مەن قىزىلوردا وبلىسىنىڭ قورعانىس ىستەرى جونىندەگى دەپارتامەنتى دابىل بويىنشا كوتەرىلدى.

اسكەرلەر وقۋ-جاتتىعۋ تاپسىرمالارىن پىسىقتاپ، وقۋ-جاتتىعۋ پوليگوندارىنا شىعا وتىرىپ، 5 شاقىرىم قاشىقتىققا قۇرامداستىرىلعان تاسىلمەن مارش جاسادى. 

تارازدان وتارعا شامامەن 160 بىرلىك تەحنيكا جىبەرىلدى. سونداي-اق لۋگوۆوي ستانسياسىنان وتارعا دەيىن ارتيللەريالىق ەشەلونداردى تيەۋ جۇرگىزىلدى. مۇندا جاۋىنگەرلىك وق اتۋلار وتكىزىلەدى. قىزىلوردادا دابىل بويىنشا قىزىلوردا وبلىسىنىڭ قورعانىس ىستەرى جونىندەگى دەپارتامەنتى، قالانىڭ قورعانىس ىستەرى جونىندەگى باسقارماسى جانە وبلىستىڭ قورعانىس ىستەرى جونىندەگى بولىمدەرى كوتەرىلدى. الىنعان بەلگىگە سايكەس، شتاب جانە قۇقىق قورعاۋ، ارنايى ورگانداردىڭ قىزمەتكەرلەرى، سونداي-اق قازاقتەلەكوم مەن قىزىلوردا وبلىسىنىڭ جەرگىلىكتى اتقارۋ ورگاندارىنىڭ قىزمەتكەرلەرى حاباردار ەتىلدى. ال جاڭادان قۇرىلعان ارنايى ماقساتتاعى بولىمشە وقۋ-جاۋىنگەرلىك تاپسىرمالاردلى ورىنداۋ كەزىندە ءىس-قيمىلداردىڭ ۇيلەسىمدىلىگىن پىسىقتادى.

تەكسەرىس شەڭبەرىندە اسكەرلەردى تاڭسىق پوليگوندارعا جونەلتۋ جۇزەگە اسىرىلدى. بۇل جەرلەردە جاقىن كۇندەرى وقۋ-جاتتىعۋلاردىڭ بەلسەندى فازاسى باستالادى. 

تەكسەرىستىڭ نەگىزگى ماقساتى قويىلعان جاۋىنگەرلىك تاپسىرمالاردى ورىنداۋ كەزىندە بولىمشەلەردىڭ ءىس-قيمىلدارىنىڭ ۇيلەسىمدىلىگىن باعالاۋ بولىپ تابىلادى. جاۋىنگەرلىك ازىرلىكتى توسىننان تەكسەرۋ بۇگىنگى كۇنى قارۋلى كۇشتەردىڭ شىنايى جاۋىنگەرلىك ازىرلىگىن ايقىنداۋدىڭ پارمەندى ءارى باتىمدى تاسىلدەرىنىڭ ءبىرى، سونداي-اق اسكەرلەردەگى ىستەردىڭ شىنايى جاي-كۇيىن زەردەلەۋدىڭ ماڭىزدى ۇلگىسى بولىپ تابىلاتىنىن ايتا كەتەيىك.