امەريكاندىق Washington Post گازەتى تۇركيانىڭ ساياساتىنا قاتىستى ساراپشىلاردىڭ پىكىرىن جاريالادى، - دەپ حابارلايدى «قامشى» پورتالى.

وندا ەرەجەپ ەردوعاننىڭ ساياساتى تۇركيانى تىعىرىققا تىرەدى جانە ودان شىعۋ ەندىگى ۋاقىتتا وڭاي ەمەس دەگەن پىكىرلەر ايتىلادى.

ءقازىر تۇرىك پرەزيدەنتى سيرياعا اسكەري وپەراسيا باستاپ، حالقىنىڭ دا، الەمدىك قاۋىمداستىقتىڭ دا، ءتىپتى، اسكەريلەردىڭ دە نارازىلىعىن تۋعىزىپ وتىرعانىن ايتادى باسىلىم. ەردوعاننىڭ ءوز مۇمكىندىكتەرىن اسىرا باعالاپ، سيرياعا قاتىستى ساياساتتاعى كوپتەگەن فاكتورلاردى ەسكەرمەگەنى ءسوز بولادى.

«ەردوعان سىرتقى ساياساتتى ءوزىنىڭ مەنمەندىگىنەن اقساتىپ الدى. ول 2010 جىلى تۇركيانىڭ جاعدايىنا ماستانىپ قالدى. ونىڭ مىندەتىنە كىرمەيتىن دە ماسەلەلەر بار. ءبىراق، ولاردىڭ ورىندالۋىنا جاۋاپ بەرەتىن - پرەزيدەنت»، - دەيدى تۇركيا جونىندەگى ساراپشى گەنري بەيكەر.

وسى اپتادا تۇركيانى باستى وداقتاسى اقش سيريالىق كۇردتەر ماسەلەسىندە قولدامايتىنى بەلگىلى بولدى.

باسىلىم «سوندىقتان، تۇركيا پروبلەمالار لابيرينتىندە اداسىپ قالدى. ول پروبلەمالاردىڭ كوبىنە تۇركيا ءوزى كىنالى»، - دەگەن كادير حاس (ىستامبۇل) ۋنيۆەرسيتەتىنىڭ پروفەسسورى سولي وزەلىڭ پىكىرىن كەلتىرەدى.

«تۇركيا اينالاسىمەن قارىم-قاتىناستى بۇزعانى سونشا، ەشكىمگە وزىنە پايدالى بىردەڭە جاساۋعا ۇسىنىس ايتاتىن حالدە ەمەس. بۇل ەلدىڭ ءسوزى ءقازىر ەش سالماقسىز بولىپ قالدى. تۇركيا ءوز ۋادەلەرىن ورىندامايتىن بولدى. ول ءوزىنىڭ باستى مۇددەلەرىن قورعاي الماي وتىر جانە بارلىق وداقتاستارىمەن كيكىلجىڭ تۋعىزۋدا. وسىعان دەيىن ايماقتىق دەرجاۆا اتالىپ كەلگەن ەل ءۇشىن بۇل – قاسىرەت»، - دەيدى س. وزەل.

اقش قولداۋىنان ايرىلعان سوڭ، تۇركيا شەكاراسىنا رەسەي جاقىنداپ كەلەدى. سيريا مەن ارمەنيادا رەسەيلىك كۇشتەردىڭ بولۋى، سيريادان اعىلعان بوسقىندار تۇركيالىق  ازاماتتارعا ۇرەي تۋعىزۋدا، ەكونوميكا دەپرەسسياعا ۇشىرادى، ال، ەل ىشىندە كۇردتەرمەن قاقتىعىستار قارقىن الۋدا»، - دەلىنگەن ماقالادا.

سونداي-اق، يپەك (انكارا) ۋنيۆەرسيتەتىنىڭ پروفەسسورى گوكحان باسيك تۇركيا جاعدايىنا قاتىستى: «تۇركيا كوپ جوسپارلى اپاتقا تاپ بولدى. بۇرىن دا كوپ پروبلەمالاردى باستان كەشكەن ەلدىڭ بۇگىنگى قيىندىقتارىنىڭ اۋقىمى ەلدىڭ مۇمكىندىكتەرىنەن الدەقايدا اسىپ تۇسەدى»، - دەيدى.

اقش-قا ارقا سۇيەپ رەسەيمەن كيكىلجىڭگە بارعان تۇركياعا ءبىر عانا سيريا ماسەلەسىنىڭ ءوزى وڭايعا سوقپايتىن سياقتى. ويتكەنى، اقش سيريالىق كۇردتەرگە قاتىستى تۇركياعا جاقپايتىن ۇستانىم ءبىلدىردى. ونىڭ ۇستىنە، ەلدە ورىن العان سوڭعى لاڭكەستىك ارەكەت تە ەردوعاننىڭ ەندىگى ساياساتىنا ءبىرشاما «وزگەرىس» جاساۋى مۇمكىن.