نيۋ-يورك پوليسياسىندا قىزمەت ەتەتىن قازاق دانيار نۇرتازا ءبىر جىل بۇرىن الەمدىك اقپارات قۇرالدارىنىڭ جۇلدىزى بولدى. ول مەترو ستانساسىندا تولعاق قىسقان امەريكاندىق ايەلدى تۋعىزىپ العان ەدى. الەمگە ايگىلى بولعان سول قانداسىمىز جاقىندا esquire.kz جۋرنالىنا سۇحبات بەردى.

اقش-قا قالاي كەلگەنىن، وعان دەيىن نەمەن اينالىسقانىن ايتقان دانيار العاشقى ۋاقىتتا جات جەردە ءبىرشاما قيىندىق كورگەنىن ايتادى.

«ءبىز مۇندا 13 جىل بۇرىن، 2002 جىلى كەلدىك. مەن 20 جاستا، ءىنىم 17-دە ەدى. ءىنىم وسىندا، كولۋمبيا ۋنيۆەرسيتەتىندە ءبىلىم العىسى كەلدىك. بارلىعىمىز سول ءۇشىن وسىندا بىرگە كوشىپ كەلدىك. مەن ول كەزدە اعىلشىن ءتىلىن بىلمەيتىن ەدىم. بارىنەن دە جاسى كەلىپ قالعان اكە-شەشەمىزگە اۋىر سوقتى. انامىز بىرنەشە جىل قينالىپ ءجۇردى»، - دەيدى ول.

دانيار اقش-قا بارعان بەتتە اتا-انالارىمەن بىرگە ءتىل ۇيرەنگەندەرىن، نامىستانباي قارا جۇمىس تا ىستەگەندەرىن ايتادى.

«ەكى بولمەلى پاتەر جالداپ تۇردىق. ءبىر بولمەسىندە اتا-انامىز، ەكىنشىسىندە ءىنىم ەكەۋمىز تۇردىق. پاتەر ورنالاسقان اۋدان دا كەرەمەت اۋدان بولدى دەپ ايتا المايمىز. ءقاۋىپسىز دە ەمەس ەدى»،-دەگەن ول امەريكادا تۇراقتاپ قالۋلارى اكە-شەشەسىنىڭ ارقاسى ەكەنىن جاسىرمايدى.

«ءىنىم ءقازىر وتىزعا كەلدى، ۋنيۆەرسيتەتتى اياقتادى. ءىرى بانكتە قارجىلىق ساراپشى بولىپ قىزمەت ەتەدى. كەشكە ەكى امەريكاندىق ۋنيۆەرسيتەتتە ستاتيستيكا، ماتەماتيكا، ميكروەكونوميكا جانە تاۋەكەلدى-مەنەدجمەنتتەن دارىستەر وقيدى»، - دەيدى د. نۇرتازا.

داياشى، اۋدارماشى، ساتۋشى بولىپ ءجۇرىپ پوليسياعا ورنالاسۋدىڭ دا وڭاي بولماعانىن ايتادى.

«مۇندا ورنالاسۋ ءۇشىن 4 جىل جۇگىردىم. الدىمەن ەسكە ساقتاۋ قابىلەتىن، بايقاۋ قابىلەتىن انىقتايتىن جانە پسيحولوگيالىق تەستتەر تاپسىردىم. ودان جاقسى وتكەسىن دەنە دايىندىعىنان سىنالدىم. ءبىراز سالماق تاستاۋعا تۋرا كەلدى. بىرەۋمەن كەلىسۋ، سىناقتان اقشامەن ءوتۋ دەگەن مۇلدەم مۇمكىن ەمەس ەكەن. قىزمەتكە قابىلدانعان سوڭ 6 ايلىق پوليسيا اكادەمياسىنا جىبەرەدى. ول جاققا دا باسەكەلەستىك كۇشتى. ءبىر ورىنعا 15 ادامنان كەلەدى»، - دەيدى ول.

سوعان قاراماستان، پوليسيانىڭ قىزمەتى اقش-تا ەڭبەكاقىسى جوعارى قىزمەت بولىپ سانالمايتىنىن، مۇندا ازاماتتىق ومىرگە بەيىمدەلە الماي جۇرگەن بۇرىنعى اسكەريلەر كوپتەپ كەلەتىنىن ايتادى.

اقش ازاماتى بولعانىمەن قازاقستان ءۇشىن جانكۇيەر بولاتىنىن ايتقان دانيار: «مەن-قازاقپىن. قازاق بولىپ تۋدىم، قازاق بولىپ قالامىن. قايدا جۇرمەسەك تە مەن ءوزىمنىڭ قايدا تۋعانىمدى، قايدا وسكەنىمدى ۇمىتپايمىن»،- دەيدى.