ۇلىستىڭ ۇلى كۇنى مەن حالىقارالىق تەاتر كۇنىندە ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا العاش رەت «التىن ساقا» بالالار سپەكتاكلدەرى فەستيۆالى وتەدى، - دەپ حابارلايدى «قامشى» پورتالى.

«بالا تاربيەسى – بۇل اتا-انالاردىڭ ەرەكشە ازاماتتىق بورىشى» دەپ ن.ءا.نازاربايەۆ ايتقانداي بالا تاربيەسى قاشاندا ماڭىزدى مىندەتتەرىمىزدىڭ ءبىرى بولىپ تابىلادى. ال، ەرتەگىنىڭ تەاتر قويىلىمدارى ارقىلى ساحنادا كورىنىس تابۋى – جاس ۇرپاققا رۋحاني، پاتريوتتىق تاربيە بەرۋدە ماڭىزى وراسان. تەاترىمىزدىڭ 70 جىلدىق مەرەيتويى قارساڭىندا، العاش رەت «التىن ساقا» اتتى بالالار سپەكتاكلدەرىنىڭ فەستيۆالى ۇيىمداستىرىلىپ وتىر»، - دەلىنگەن تەاتر باسپا ءسوز قىزمەتى تاراتقان حابارلامادا.

فەستيۆال قاتىسۋشىلارى ءبايدىلدا قالتايەۆ اتىنداعى «ەڭ ۇزدىك ەر ادام بەينەسى ءۇشىن»، اققاعاز مامبەتوۆا اتىنداعى «ەڭ ۇزدىك ايەل بەينەسى ءۇشىن»، قاسىم جاكىبايەۆ اتىنداعى «ەڭ ۇزدىك قوسالقى رولدەگى ەر ادام بەينەسى ءۇشىن»، ءامينا ءومىرزاقوۆا اتىنداعى «ەڭ ۇزدىك قوسالقى رولدەگى ايەل بەينەسى ءۇشىن»، «ەڭ ۇزدىك ەپيزودتىق ءرول»،  «ەپيزودتىق رولدەگى اكتەرلىق شەبەرلىگى ءۇشىن»، «كورەرمەندەر كوزايىمى»، «ەڭ ۇزدىك دەبيۋت» نوميناسيالارى بويىنشا ماراپاتتالماق.

     فەستيۆالدىڭ اشىلۋىنا وراي باسپا ءسوز ءماسليحاتى 24 ناۋرىز كۇنى ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر          تەاترىندا ساعات 10.00-دە وتەدى.