الماتىدا نەمەرەسىنەن سوققى جەگەن كەيۋانا كوز جۇمدى، - دەپ حابارلايدى «قامشى» پورتالى قازاقپاراتقا سىلتەمە جاساپ.

قايعىلى وقيعا الماتىداعى مەدەۋ اۋدانىندا ورىن الدى. 14 ساۋىردە تاڭعى 05:30-دا قاريالاردىڭ ۇيىنە 26 جاستاعى نەمەرەسى اقشا سۇراپ كەلگەن.

«بالاسىنىڭ مۇنداي قىلىعىنان شارشاعان قارتتار جىگىتكە ۇرسىپ، سۇراعان سوماسىن بەرمەي قويعان. سول كەزدە اشۋ ۇستىندە نەمەرەسى قارت ادامدى باسىنان بالعامەن ۇرعان. 77 جاستاعى قارت سول جەردە كوز جۇمعان. جانجالعا كيلىككەن اجەسى دە اۋىر سوققى الادى. كوپ ۇزاماي اجەي دە قايتىس بولدى. كۇدىكتى ەكىنشى بولمەدە جاتقان ىنىشەگىنە تيىسپەگەن»، - دەلىنگەن الماتى قالاسى ءىىد تاراتقان باسپا ءسوز حابارلاماسىندا.

ودان سوڭ نەمەرەسى ۇيدەن 300 مىڭ تەڭگە، 6 التىن بۇيىمدى الىپ، وقيعا ورنىنان ءىزىن سۋىتقان.

ايتا كەتۋ كەرەك، قازا بولعان قاريالاردىڭ شاعىن دۇكەنى بولعان. 

مەدەۋ اۋداندىق ءىىب جەدەل ىزدەستىرۋ توبىن قۇرىپ، قىلمىستىق ءىس قوزعادى.

وسى ۋاقىتقا دەيىن تەرگەۋ ورىندارىنان جاسىرىنىپ جۇرگەن 26 جاستاعى ازامات توناۋ ماقساتىمەن شابۋىل جاساعانى ءۇشىن ءقازىر ۋاقىتشا ۇستاۋ وقشاۋلاعىشىنا قامالدى. سوتقا دەيىنگى تەرگەۋ ءىسى باستالدى.