اتىراۋلىق بەلسەندىلەر جەر ساتۋعا قارسى يساتاي-ماحامبەت الاڭىندا بەيبىت شەرۋ وتكىزۋگە قالا باسشىلىعىنان رۇقسات سۇراعان. 24 ءساۋىر كۇنى ءوتۋى ءتيىس ميتينگكە اتىراۋ باسشىلىعى رۇقسات بەرمەگەن. قالا تۇرعىندارى سوعان قاراماستان ەرەۋىلگە شىعۋ نيەتىنەن باس تارتپاعان، - دەپ حابارلايدى «قامشى» پورتالى 31-ارناعا سىلتەمە جاساپ.
قازاقتىڭ كەڭ-بايتاق جەرى ساتىلىمعا شىعارىلىپ، تالان-تاراجعا تۇسەدى دەگەنگە قارسىلىق بىلدىرگەن اتىراۋ حالقى 24ء-شى ءساۋىر كۇنى جاپپاي جينالىپ، ميتينگكە شىقپاقشى. ءتىپتى بەلسەندىلەر الدىن-الا قالالىق اكىمدىككە حات جازىپ، يساتاي مەن ماحامبەت الاڭىن بەرۋدى سۇراعان. بەلسەندى توپ جوسپارلارىنىڭ بارلىعىن الەۋمەتتىك جەلىدەگى پاراقشالارىنا جازعان.
اسەل نۇرعازييەۆا، قۇقىق قورعاۋشى:
-ەندى بىزدەر جەرىمىزدى ءوزىمىز الا الماي ءجۇرمىز. ءوز باسىما كەلسەك، 12 جىل بويى ءبىر قۇيتاقانداي ءوزىم جەرىمدى ءوزىم الا الماي ءجۇرمىن. بىزدەر ەندى ونى شەتەلگە ساتامىز دەگەندە سوندا قازاقتارىمىزعا نە قالادى؟
الايدا جەردىڭ ساتىلۋىنا قارسىلىق بىلدىرمەك نيەتتە ارنايى جيىن وتكىزبەك بولعان بەلسەندىلەرگە قالالىق اكىمدىك رۇقسات بەرمەدى. ناقتىسى، يساتاي مەن ماحامبەت الاڭى ميتينگكە ارنالماعاندىقتان، رۇقسات بەرە المايمىز دەگەن. ال بەلسەندىلەر بەيبىت ميتينگ وتكىزۋگە باسقا جەر بەرۋ تۋرالى ۇسىنىس تاستادى، بولماسا قالاداعى باس الاڭعا شىعامىز دەپ وتىر.
ال، اتىراۋ ماڭىندا كوزگە تۇسكەن اسكەري تەحنيكالار ميتينگ جوسپارلاپ وتىرعان ءوڭىر حالقىن ءبىراز شوشىتتى. مۇنى جۇرت، بەيبىت ميتينگ وتكىزبەك بولعانداردى ساباسىنا ءتۇسىرۋ ءۇشىن اكەلىندى دەپ جوبالادى. الايدا، جەرگىلىكتى باسىلىمداردىڭ بىرىنە جاۋاپ بەرگەن باتىس وڭىرلىك اسكەري پروكۋرورىنىڭ ورىنباسارى دۋمان ابەۋوۆ: «اتىراۋ وبلىسىنىڭ اۋماعىندا ورنالاسقان اسكەري بولىمدەردىڭ اسكەري قىزمەتشىلەرى ماڭعىستاۋ وبلىسىندا 18-24 ءساۋىر ارالىعىندا وتەتىن «قاراتاۋ-2016» تاكتيكالىق-ساپتىق جاتتىعۋلارعا شىققان بولاتىن. وقۋ-جاتتىعۋدا اسكەرلەردىڭ لاڭكەستىك قاۋىپتەرگە قارسى بىرىككەن ءىس-قيمىلدارى پىسىقتالاتىن بولادى»، - دەپ تۇسىنىكتەمە بەرىپتى.
