بىلتىر 24 قازان كۇنى تاراز قالاسىنداعى «نۇر وتان» پارتياسىنىڭ عيماراتىندا ءوزىن-وزى ورتەپ جىبەرگەن 20 جاستاعى ەرلان بەكتىبايەۆتىڭ قىلمىسقا قاتىسى جوقتىعى دالەلدەندى، - دەپ حابارلايدى «قامشى» پورتالى nur.kz – كە سىلتەمە جاساپ.

بۇعان دەيىن تەرگەۋ ورگاندارى ە. بەكتىبايەۆ دانيار رايمبايەۆ ەسىمدى ازاماتتىڭ ولىمىنە قاتىسى بار دەپ كۇدىكتەنگەن بولاتىن.

جان تۇرشىكتىرەرلىك قايعىلى وقيعادان سوڭ جالعاسقان ىزدەستىرۋ، تەرگەۋ جۇمىستارى د. رايمبايەۆتىڭ ولىمىنە قاتىسى بار شىن قىلمىسكەردى انىقتادى. ونىڭ قىلمىسقا قاتىسىن دالەلدەۋ ءۇشىن پوليسەيلەر ءتىپتى تالاس وزەنىنىڭ سۋىن اعىزىپ جىبەرىپ، استىنان ايعاق زاتتاردى ىزدەۋگە دەيىن بارعان.

ادام ولتىرگەن رۋسلان يسرايلوۆتىڭ قىلمىسى دالەلدەنىپ، ول قىلمىستىق كودەكستىڭ ءۇش بىردەي بابى بويىنشا كىنالى دەپ تانىلعان. سوت وعان 18،5 جىل باس بوستاندىعىنان ايىرۋ جازاسىن كەستى.

ەندى قۇقىققورعاۋ ورگاندارى كىناسىز جىگىتتى ايىپتاپ، ءوزىن-وزى ولتىرۋگە يتەرمەلەگەن پوليسيا قىزمەتكەرىمەن اينالىساتىن بولادى.