اقتاۋ اۋەجايىنا قونعالى جاتقان ۇشاق ۇشقىشىنىڭ كوزىنە لازەر تۇسىرىلگەن، - دەپ حابارلايدى «قامشى» پورتالى Tengrinews.kz– كە سىلتەمە جاساپ.

«اقتاۋ حالىقارالىق اۋەجايى» اق اتقارۋشى ديرەكتورى ەرعازى جولداسوۆتىڭ ايتۋىنشا، مۇنداي وقيعا اۋەجايدا ەكى رەت بولعان. سوڭعى وقيعا 13 ءساۋىر كۇنى ورىن العان كورىنەدى.

ۇشاق قونۋ جولاعىنا تۇسكەندە ەير استانا كومپانياسىنا تيەسىلى كس-313 اۋە كەمەسىنىڭ ۇشقىشى جاسىل ءتۇستى لازەرمەن كوزىنىڭ تۇمشالانعانىن حابارلاعان. «ۇشقىشتىڭ ايتۋىنشا، اۋەجاي سىرتىنداعى دالادان تۇسىرىلگەن لازەردىڭ اسەر ەتۋ كۇشى وتە جوعارى بولعان. بۇل ءقاۋىپتى ارەكەت. ويتكەنى، لازەر تۇسكەن سوڭ ۇشقىش اينالاسىن بىرنەشە سەكۋندقا دەيىن باعدارلاي الماي قالادى. ۇشاقتىڭ قونۋ، ۇشۋ ساتىندە بۇل سەكۋندتار وتە ماڭىزدى. سوعان وراي، ءبىز اۋەجاي ايماعىنداعى تۇرعىنداردىڭ جاقسىلاپ ويلانۋىن سۇرايمىز»، - دەيدى ەرعازى جولداسوۆ.

ەستەرىڭىزگە سالساق، ءبىر جىل بۇرىن اقتاۋ اۋەجايىندا تاعى ءبىر وسىنداي وقيعا بولعان. وندا دا ەير استانا كومپانياسىنىڭ ۇشاعىنا لازەر تۇسىرىلگەن. اۋەجاي باسشىلىعى پوليسياعا ارىز جازعانمەن، بۇزاقى تابىلماعان كورىنەدى.