وڭتۇستىك قازاقستان وبلىسى سايرام اۋدانىنىڭ قارابۇلاق اۋلىندا بۇرىن ەل ەستىمەگەن جاعداي ورىن الدى. اۋىلعا وزبەكستاننان كوشىپ كەلگەن 25 جاستاعى ازاماتشا وتكەن جىلى ءبىر عانا تامىز ايىندا اۋىلدىڭ 92 ەركەگى ءوزىن زورلاعانىن ايتقان، - دەپ حابارلايدى «قامشى» پورتالى «ۆرەميا» باسىلىمىنا سىلتەمە جاساپ.

وسى ماسەلەگە وراي باسىلىم اۋىلدىڭ ەكىگە جارىلعانىن جازادى. ءبىرىنشى توپ، ايەل زورلادى دەگەن ايىپ تاعىلعاندار بولسا، ەكىنشى توپ – ءبىرىنشى توپقا كەز-كەلگەن ۋاقىتتا قوسىلىپ كەتۋى مۇمكىن وزگە ەركەكتەر. شاعىمدانۋشى سونداي-اق، اۋىل ەركەكتەرىنەن جىنىستىق اۋرۋ جۇقتىرعانىنا دا شاعىمدانعان.

وزبەك كەلىنشەكتىڭ «قارماعىنا» تۇسكەندەردىڭ ەڭ ۇلكەنى 78 جاستا كورىنەدى. ودان بولەك جاسى 70-تەن اسقان بىرنەشە قاريا دا كۇدىكتىلەر قاتارىنا ىلىككەن.

جاعا ۇستاتارلىق قىلمىستىڭ ءمان-جايىن انىقتاۋ ءۇشىن پوليسيا «كۇدىكتىلەردى» ەكى اۆتوبۋسقا (!) تيەپ، تەرى-ۆەنەرولوگيالىق ديسپانسەر زەرتحاناسىنا اپارعان. ابىروي بولعاندا، 92 كۇدىكتىنىڭ قانىنان شاعىمدانۋشى جۇقتىرعان اۋرۋ بەلگىلەرى تابىلماعان. ەسەسىنە سايرام اۋداندىق ءىىب تەكسەرىپ جاتقان ءىستى وقو ءىىد الدىرتىپ، زەرتتەگەن. وبلىستىق پوليسەيلەر 28 جاستاعى وزبەكستان ازاماتشاسىنىڭ ازاماتتىق نەكەدەگى كۇيەۋىمەن بىرگە وسىنداي ارىز جازىپ، ەر ازاماتتاردان اقشا بوپسالاپ كەلگەنى انىقتالعان.