ەلىمىزدىڭ سىرتقى ىستەر ءمينيسترى ەرلان ىدىرىسوۆ استانادا ءوتىپ جاتقان ەۋرازيالىق مەديا فورۋم جۇمىسى بارىسىندا قازاقستان حالقىن قىرىمداعى دەمالىس ورىندارىنا بارۋدى قويا تۇرۋعا شاقىردى. مينيستر وسىنداي مالىمدەمە جاساي وتىرىپ، «ءبىر-بىرىن اياماعان باۋىرلاس ەكى ەل قازاقتى ءقايتسىن!» دەگەندى استارلاپ بولسا دا جەتكىزىپ وتىر. تۇسىنگەن ادامعا، ارينە.
«ءبىزدىڭ ازاماتتار بىر-بىرىنە قاراما-قايشى باۋىرلاس ەكى ەلدىڭ ءبىرىن جاقتايتىن شەشىم قابىلداۋعا ءماجبۇر بولادى. جاز ايلارىندا ولار دەمالۋ ءۇشىن باسقا جاعراپيالىق نۇكتەلەردى تاڭداعانى دۇرىس سياقتى. ەگەر كىمدە-كىم قىرىمعا بارام دەپ تابانداپ تۇرىپ السا، ول جەرگە جەتۋدىڭ باعىتىن بۇل ماڭىزدى ماسەلەدەگى ەكى تاراپتىڭ دا پوزيسياسىن ەسكەرە وتىرىپ تاڭداۋى قاجەت. بۇعان سالماقتى تۇردە، جان-جاقتى ويلانىپ قاراۋ كەرەك. قىرىم اۋماعىنا بارعاندا ەشقانداي قيىندىق تۋماۋىن ويلاستىرۋ قاجەت»، - دەيدى ەرلان ىدىرىسوۆ مىرزا.
مينيستر مەديا فورۋمداعى بايانداماسىندا قازاقستاننىڭ ەكى باۋىرلاس ەل رەسەي مەن ۋكراينا اراسىنداعى اقپاراتتىق قاقتىعىستىڭ نىسانىنا اينالعانىن اتاپ ءوتتى.
«ءبىزدىڭ قوعام تۇسىنىكسىز جاعدايدا قالدى جانە نە ىستەۋ كەرەكتىگىن بىلمەيدى. ءبىر جاعىنان رەسەي بارلىق قاجەتتى جاعدايلار جاسالعانىن ايتىپ وتىر. ەكىنشى جاعىنان ۋكراينا قىرىم اۋماعىنا رەسەي جاقتان كىرۋ مەملەكەتتىڭ ساياساتىنا قارسى دەپ مالىمدەۋدە. ءبىز ەلىمىزدىڭ اۋماعى باۋىرلاس ەكى حالىق پەن مەملەكەتتىڭ اراسىنداعى اقپاراتتىق باسەكەلەستىڭتىڭ نىسانىنا اينالعانىن وكىنىشپەن مالىمدەيمىز. بۇل ماسەلەدە قانداي دا ءبىر كەڭەس بەرۋ قيىن. قىرىم ماسەلەسى حالىقارالىق تۇرعىدا قاراپايىم ماسەلە ەمەس، ونىڭ حالىقارالىق قۇقىققا قاتىستى استارى بار. ول ماسەلەنى جانە قازاقستان شەشپەۋى كەرەك. بۇل تىعىرىقتان شىعۋدىڭ باسقا دا فورماتتارى بار. ءبىز وسىعان بايلانىستى رەسەيلىك ۇستانىمدى دا بىلەمىز، ۋكراينانىڭ دا نە ايتىپ جاتقانىن ەستىپ وتىرمىز. ءبىز وسى ەكى ەل حالىقارالىق قۇقىق اياسىندا وسى تاريحي جانە ساياسي كۇردەلى ماسەلەنى شەشۋى كەرەك دەپ سانايمىز»، - دەگەن مينيستر قازاقستاننىڭ بۇل ماسەلەدە بەيتاراپتىلىق تانىتاتىنىن اڭعارتتى.
بۇعان دەيىن ۋكراينا تاراپى رەسەي ارقىلى قىرىمعا كىرەتىندەردى زاڭسىز شەكارا بۇزدى دەپ ايىپتاپ، جاۋاپقا تارتاتىندارىن حابارلاعان ەدى. وسى ماقساتتا ەلدەگى تۋريستىك فيرمالارعا قىرىمعا جولداما ساتۋدى دوعارۋ تۋرالى تالاپ تا قويدى.
رەسەيلىك ديپلوماتتار ۋكرايندىق ارىپتەستەرىنىڭ بۇل تالاپتارىن اقپاراتتىق شابۋىل دەپ باعالاسا، تۋريستىك فيرمالاردىڭ باسشىلىعى قىرىمعا كىمگە تيەسىلى ەكەنى وزدەرىن قاتتى قىزىقتىرمايتىنىن ءبىر-اق ايتتى. پايدا تابۋدى كوزدەيتىن تۋريستىك فيرمالار ءۇشىن مۇنداي تاريحي، ساياسي سيپاتى بار ماسەلەلەر ماڭىزدى ەمەس، ارينە. الايدا، جاز شىعا سالا تەڭىز جاعالاپ كەتەتىن حالىقتىڭ قاۋىپسىزدىگى مەن ەلدىڭ حالىقارالىق قاۋىمداستىقتاعى بەدەلى سىرتقى ىستەر ۆەدومستۆو باسشىسىن بەي-جاي قالدىرمايتىنى انىق. ەرلان ىدىرىسوۆ مىرزانىڭ بۇعىپ جاتىپ الماي، وسى داۋلى ماسەلەگە قانداي بولسا دا پىكىر بىلدىرگەنى، ونىڭ ۇستىنە، ەل ازاماتتارىن ساقتاندىرعانى قۇپتارلىق ءىس ەكەنى داۋسىز.
پىكىر قالدىرۋ