ورال قالاسىندا كۇنى بۇگىن 17144 ءبۇلدىرشىن بالاباقشا كەزەگىندە تۇرسا، سونىڭ 1500ء-ى - 3-6 جاستاعىلار، - دەپ حابارلايدى Qamshy.kz قازاقپاراتقا سىلتەمە جاساپ.

بۇل تۋرالى ورال قالاسىنىڭ اكىمى ناريمان تورەعالييەۆتىڭ توراعالىعىمەن وتكەن مەملەكەتتىك-جەكەمەنشىك ارىپتەستىك اياسىندا مەكتەپكە دەيىندى ءبىلىم بەرۋ جۇيەسىنە ينۆەستيسيا تارتۋ ماسەلەلەرىنە ارنالعان كەڭەستە ايتىلعان.

شاھار باسشىسىنىڭ اتاپ وتكەنىندەي، بالدىرعانداردى مەكتەپكە دەيىنگى تاربيەمەن جانە وقىتۋمەن قامتاماسىز ەتۋ - 2020 جىلعا دەيىنگى ءبىلىم بەرۋدى دامىتۋدىڭ مەملەكەتتىك باعدارلاماسى مەن ورال قالاسى دامۋ باعدارلاماسىنىڭ باستى ينديكاتورلارىنىڭ ءبىرى. ورالدا ەلباسى تاپسىرماسىنا سايكەس «بالاپان» باعدارلاماسى بويىنشا جۇمىستار بەلسەندى جۇرگىزىلىپ جاتقانىمەن، دەموگرافيالىق جاعدايدىڭ جاقسارۋىنا بايلانىستى بالاباقشاعا دەگەن قاجەتتىلىك تە ءوسىپ كەلەدى. مىسالى، قالالىق ءبىلىم بەرۋ ءبولىمىنىڭ مالىمەتىنە سايكەس شاھاردا 2-5 جاس ارالىعىنداعى 11400 بالدىرعان كەزەكتە تۇرسا، ۇلگى جوباداعى 1 بالاباقشا 280 ورىندىق دەپ العاندا، وبلىس ورتالىعىنا ءالى قىرىققا جۋىق مەكتەپكە دەيىنگى ۇيىم كەرەك. اسىرەسە، كەزەكتىڭ كوپتىگى زاشاعان كەنتى مەن قالانىڭ ورتالىعىندا، 5، 6، 7، 9-شاعىناۋداندار مەن «جۇلدىزدا» بايقالادى. سوندىقتان مەملەكەتتىك-جەكەمەنشىك ارىپتەستىكتى پايدالانا وتىرىپ، جەكەمەنشىك بالاباقشالار اشۋعا دا باسا نازار اۋدارۋ قاجەت.

جيىندا «ورال» اكك» ۇك» اق ستراتەگيالىق دامۋ جانە ينۆەستيسيالىق جوبالار دەپارتامەنتىنىڭ ديرەكتورى ارتۋر دوسقالييەۆ، ورال قالالىق ءبىلىم بەرۋ ءبولىمىنىڭ باسشىسى جانسۇلۋ تورەمۇراتوۆا ءوز ۇسىنىس-پىكىرلەرىمەن ءبولىستى.

كەڭەس قورىتىندىسىنا سايكەس قالالىق ساۋلەت جانە قالا قۇرىلىسى بولىمىنە جەكەمەنشىك بالاباقشالار اشۋ ءۇشىن قاجەتتى جەر تەلىمدەرىن ايقىنداۋ تاپسىرىلدى.

ايتا كەتەيىك، ورالدا 92 مەكتەپكە دەيىنگى ۇيىم بولسا، سونىڭ ىشىندە 50ء-ى مەملەكەتتىك، 26-سى مەكتەپ جانىنداعى شاعىن ورتالىق، بىرەۋى مەكتەپ-بالاباقشا كەشەنى، 15ء-ى - جەكە بالاباقشا. بۇلاردا 13232 ءبۇلدىرشىن تاربيەلەنسە، سونىڭ 743ء-ى نەمەسە 6 پايىزى عانا جەكە بالاباقشالاردا.