بۇگىن باۋىرجان بايبەك باسقا قالالاردىڭ اۆتوكولىكتەرىن قالاعا كىرگىزۋدى شەكتەۋ ماسەلەسى قاراستىرىلىپ جاتقانىن مالىمدەدى، - دەپ حابارلايدى Qamshy.kz پورتالى.

باسپا ءسوز ءماسليحاتىن وتكىزگەن باۋىرجان بايبەك قالاداعى اقىلى اۆتوتۇراقتاردىڭ ءتارتىبىن رەتكە كەلتىرۋ كەرەك دەپ وتىر.

«تۇراقتا تۇراتىن كولىكتەردى الىپ تاستايمىز. اۆتوتۇراق ەرەجەسىن بۇزعان جاعدايدا قاتاڭ جازالايمىز. مۇنىڭ بارلىعىن بىرتە-بىرتە جاسايمىز، ۋاقىتى كەلگەندە قالاعا اقىلى كىرۋ ماسەلەسى شەشىلەدى»، -  دەيدى قالا باسشىسى.

اكىمنىڭ مالىمەتىنشە، قالادا بۇگىندە 570 مىڭ اۆتوكولىك تىركەلگەن، تاعى 250-270 مىڭ اۆتوكولىك كۇن سايىن مەگاپوليسكە سىرتتان كىرەتىن كورىنەدى.

قالا باسشىسىنىڭ ايتۋىنشا، بۇگىندە تۇرعىندارعا جەكە كولىكتى ەمەس، قوعامدىق كولىكتى پايدالانۋعا ىنتالاندىرۋ جۇمىستارى جوسپارلانعان.

«ءبىز تاكسي تۇراقتارىن شارتتى تۇردە ساعاتىنا 100 تەڭگە تولەيتىندەي ەتەمىز. ەگەر ناتيجە شىقپاسا، وندا ساعاتىنا 500 تەڭگەگە دەيىن كوتەرىپ قويامىز. سوندا ادام ءوزى ەسەپتەي باستايدى»،-دەيدى قالا اكىمى.

اكىم بۇل ماسەلەدە الدىمەن ادامداردىڭ ساناسىنا وزگەرىس ەنگىزۋ كەرەك دەپ سانايدى. «بىزگە ەكولوگيا كەرەك پە، الدە ءبارىمىزدىڭ كولىكپەن جۇرگەنىمىز كەرەك پە؟ نە ىستەۋ كەرەك؟ وسىنى انىقتاپ الۋ كەرەك»، - دەيدى باۋىرجان بايبەك.