م.اۋەزوۆ اتىنداعى قازاق مەملەكەتتىك اكادەميالىق دراما تەاترى تاۋەلسىزدىگىمىزدىڭ  25 جىلدىعى مەن قاراشاڭىراق تەاتردىڭ 90 جىلدىعىنا وراي تالدىقورعان مەن تەكەلى قالالارىنا 21-22 ءساۋىر كۇندەرى گاسترولدىك ساپارمەن بارىپ، ي.ساپاربايدىڭ «سىعان سەرەناداسى» سپەكتاكلىن قويىپ قايتتى،-دەپ حابارلايدى Qamshy.kz.

«تاۋەلسىزدىگىمىزدىڭ 25 جىلدىعى مەن تەاترىمىزدىڭ 90 جىلدىعى تۇسپا-تۇس كەلىپ، مەرەيلى مەرەكەلەر بىر-بىرىمەن ۇشتاسىپ جاتقان ساتتە رەسپۋبليكا كولەمىندە سپەكتاكلدەر قويۋداعى ماقساتىمىز - قالىڭ جۇرتشىلىقتى تاۋەلسىزدىگىمىزدىڭ 25 جىلدىعىمەن قۇتتىقتاۋ جانە تەاترىمىزدىڭ بۇگىنگى تىنىس-تىرشىلىگىمەن تانىستىرۋ. جەرى شۇرايلى، ءشوبى شۇيگىن جەتىسۋ جەرىنەن باستالعان گاسترولىمىز ەلىمىزدىڭ وزگە دە ايماقتارىندا جالعاسىن تاباتىن بولادى»، - دەيدى تەاتر ديرەكتورى، ق ر ەڭبەك سىڭىرگەن قايراتكەرى ەرلان ءبىلال.

الماتى وبلىستىق بيكەن ريموۆا اتىنداعى دراما تەاترىنىڭ ۇجىمى وبلىس وڭىرىنە گاسترولدىك ساپارمەن بارعان م.اۋەزوۆ تەاترىن قازاقي داستۇرمەن الدىنان اق الىپ شىعىپ، دامنەن اۋىز تيگىزىپ، اق باتاسىن بەرىپ، قۇشاق جايا قارسى الدى. جاقسى نيەت، جىلى قاباق، اق پەيىلدەرىمەن كۇتىپ العان تالدىقورعاندىقتاردىڭ ىقىلاسى قويىلىم توبىن ءبىر مارقايتىپ تاستادى. ال ب.ريموۆا تەاترىنا بەت تۇزەگەن ۇجىمىمىزدى الماتى وبلىسى اكىمىنىڭ ورىنباسارى باقتيار ونەربايەۆ قارسى الدى. ول: «قۇرمەتتى جەتىسۋلىقتار، بۇگىن قازاق ونەرىنىڭ بيىك شىڭىنان ورىن العان م.اۋەزوۆ تەاترىنىڭ كسرو حالىق ءارتيسى ءاسانالى ءاشىموۆ پەن تەاتر ديرەكتورى، ق ر ەڭبەك سىڭىرگەن قايراتكەرى ەرلان ءبىلال باستاعان ۇجىم الماتى وبلىسىنىڭ اكىمى ا.باتالوۆتىڭ ۇيىمداستىرۋىمەن گاسترولدىك ساپارمەن كەلىپ وتىر. بيىل ەلباسى ن.نازاربايەۆتىڭ رۇقساتىمەن ا.باتالوۆتىڭ باستاۋىمەن تالدىقورعان قالاسىندا تەاتر سالىنباقشى. سوندا ا.ءاشىموۆ باستاعان ونەر مايتالماندارى كەلىپ تۇساۋىن كەسەدى. سول سەبەپتى، ب.ريموۆا اتىنداعى تەاتر مەن اكەمتەاتر قويان-قولتىق جۇمىس ىستەپ، شىعارماشىلىق بايلانىستا بولادى دەپ ويلايمىن»، - دەپ ءسوزىن قورتىندىلادى.

ەي، تاكاپپار دۇنيە!

ماعان دا ءبىر قاراشى.

تانيسىڭ با، سەن مەنى

مەن - قازاقتىڭ بالاسى! - دەپ قاسىم امانجولوۆتىڭ ولەڭىمەن ءسوزىن باستاپ، جەتىسۋ جۇرتىمەن امانداسقان ءاسانالى ءاشىموۆ: «قۇرمەتتى كورەرمەن قاۋىم، باۋىرلار، ونەر - حالىقتىكى! بيىل بىزگە 90 جىل. 1926 جىلى 13 قاڭتاردا ونەر مايتالماندارى، قاراپايىم حالىقتىڭ اراسىنان جينالعان توپ تەاتر قۇردى. سولاردىڭ ىشىندە ق.قۋانىشبايەۆ، س.قوجامقۇلوۆ، ە.ءومىرزاقوۆ، ءا.قاشاۋبايەۆ، ي.بايزاقوۆ سىندى تەاتر كوريفەيلەرى بولدى. م.اۋەزوۆتىڭ ءوزى ادەبيەت ءبولىمىن باسقارعان. كەيىن قاتارىنا ك.بايسەيىتوۆا، ش.ايمانوۆتار كەلىپ قوسىلدى. سول ۇلى ادامداردىڭ  باستاۋى جۇعىمدى بولىپ، تەاتر اياعىنا تىك تۇرىپ، شاڭىراعىنان وپەرا تەاترىن، فيلارمونيانى ءبولىپ شىعاردى. بۇگىندە قاراشاڭىراق، اكەمتەاتر بولىپ وتىرعان ونەر ورداسى وبلىس باسشىلارىنىڭ تاپسىرماسىمەن رەسپۋبليكا ايماقتارىن ارالاپ سپەكتاكل قويۋعا تالدىقورعان قالاسىنا كەلىپ وتىر.  سىزدەرگە ۇلى ءشامشى قالداياقوۆتىڭ ءومىرى مەن شىعارماشىلىعىنا ارنالعان «سىعان سەرەناداسى» ميۋزيكلىمەن كەلىپ وتىرمىز»، - دەدى.

سپەكتاكلدە ءشامشى ءرولىن ق ر ەڭبەك سىڭىرگەن قايراتكەرى بەكجان تۇرىس، يزولدا ءرولىن شىنار جانىسبەكوۆا وينادى. الەكو رولىنە قازاقستاننىڭ «سەرپەر» جاستار وداعى سىيلىعىنىڭ لاۋرەاتى الماس شاياحمەتوۆ ۆۆود جاسادى. سونىمەن قاتار، بارونەسسا رولىندە ق ر ەڭبەك سىڭىرگەن ءارتيسى عازيزا ابدىنابييەۆا ونەر كورسەتسە، ءشامشىنىڭ اناسىنىڭ ءرولىن تالدىقورعان ءوڭىرىنىڭ تۋماسى، ق ر ەڭبەك سىڭىرگەن ءارتيسى شامشاگۇل مەڭدياروۆا وينادى.

سپەكتاكلدەن كەيىن تۇندەلەتىپ تەكەلى قالاسىنا جول جۇرگەن تەاتر ۇجىمى 22 ءساۋىر كۇنى تەكەلى قالاسىنىڭ مادەنيەت ۇيىندە ونەر كورسەتتى.

قارا ءسوزدىڭ ءقادىرىن بىلەتىن، قازاق ونەرىن قاستەرلەيتىن جەتىسۋ حالقى ءشامشىنىڭ «قۇلاقتان كىرىپ، بويدى الار» اندەرىن سۇيسىنە تىڭداپ، كورگەندەرىن كوكىرەك-كوڭىلدەرىنە ءتۇيىپ، اسقاق الاتاۋدىڭ باۋرايىنا ەركەلەي ورنالاسقان الىپ شاھار الماتىدان كەلگەن ونەرپاز قاۋىمعا العىستارىن جاۋدىرا شىعارىپ سالدى.  ال «جاقسى باستاما - ءىستىڭ جارتىسى» ەكەندىگىن سەزىنگەن ارتيستەردى الدا ءالى تالاي ۇلى دالانىڭ ۇلاعاتتى ۇرپاقتارى كۇتىپ تۇر ەدى.

ءمولدىر بەكجان