قازاقستاننىڭ ەڭبەك سىڭىرگەن قايراتكەرى، مۋزىكانت، "ميۋزيكولا" توبىنىڭ نەگىزىن سالعان بولات سىزدىقوۆپەن قوشتاسۋ ءراسىمى جامبىل اتىنداعى قازاق مەملەكەتتىك فيلارمورنياسىندا ءوتتى.

فيلارمورنيا عيماراتىنىڭ الدىندا ءارتىستىڭ جاقىن دوستارى، ارىپتەستەرى جانە تىڭدارماندارى جينالدى. كوڭىل ايتۋ ءۇشىن تانىمال قايراتكەرلەر، ارتىستەر، انشىلەر كەلدى. اتاپ ايتقاندا، كارينا ابدۋللينا، رەنات گايسين، اسىلبەك ەڭسەپوۆ، ءجاميلا سەركەبايەۆا، پارۆيز نازاروۆ، باۋىرجان شۇكەنوۆ، بولات ءابىلوۆ جانە "دوس-مۇقاسان" توبىنىڭ مۇشەلەرى. سونىمەن قاتار، شاراعا الماتى اكىمى باۋىرجان بايبەك قاتىستى. 

بەلگىلى قازاقستاندىق گيتاراشى، كومپوزيتور جانە "ميۋزيكولا" توبىنىڭ ارانجيرلەۋشىسى، "ا’ستۋديو" توبىنىڭ بۇرىنعى مۇشەسى بولات سىزدىقوۆ قاراعاندىدا 1956 جىلى 21 ماۋسىمدا دۇنيەگە كەلگەن. بالا كەزىنەن مۋزىكامەن اينالىسقان، اتاقتى وقىتۋشى الەكساندر ماجەلياننىڭ دجاز گيتاراسى كۋرسىن بىتىرگەن. 16 جاسىندا بولات قاراعاندىداعى فيلارمونياعا جەكە ءان ورىنداۋشىسى بولىپ قابىلدانادى، سونىمەن قاتار "گاككۋ" ءانسامبلىنىڭ قۇرامىمەن گاسترولدىك ساپارلاردا ءجۇردى.

1976 جىلى بولات رەسپۋبليكالىق "گۇلدەر "جاستار ءانسامبلىنىڭ شاقىرتۋىمەن الماتىعا كەلەدى. بولات اتاقتى روزا رىمبايەۆا جەكە ورىنداۋشى بولعان "اراي" توبىنىڭ گيتاريسى بولادى. 90-جىلداردىڭ باسىندا "الما-اتا" توبى مۇشەلەرىنىڭ اراسىندا بولات تا بولدى. ماسكەۋگە بارا سالىپ، جاڭا توپ تانىمال بولادى. ناتيجەسىندە "الما-اتا" توبىنىڭ اتاۋى "ا`ستۋديو" بولىپ وزگەرەدى. 1992 جىلى بولات سىزدىقوۆ ءوزىنىڭ جەكە جاڭا مۋزىكالىق جوباسىن اشپاق بولادى. ول ءانشى كارينا ابدۋللينامەن بىرلەسىپ، "ميۋزيكولا" توبىن قۇرادى. قازاقستان پرەزيدەنتىنىڭ جارلىعىمەن 2012 جىلدىڭ 5 جەلتوقسانىندا بولات سىزدىقوۆقا قازاقستان رەسپۋبليكاسىنىڭ ەڭبەك سىڭىرگەن ونەر قايراتكەرى اتاعى بەرىلدى.

بولات سىزدىقوۆ الماتىدا 2016 جىلدىڭ 7 مامىرىندا 60-قا قاراعان جاسىندا قايتىس بولدى. ونىڭ ولىمىنە قاننىڭ ۇيۋى سەبەپ بولعان.