جەر كوميسسياسىنىڭ وتىرىسىندا ەكونوميست، بولاتحان تايجان قورىنىڭ پرەزيدەنتى مۇحتار تايجان ءسوز الىپ، كوميسسيا الدىنداعى نەگىزگى مىندەتتەر قانداي بولۋ كەرەكتىگىن اتاپ ءوتتى، - دەپ حابارلايدى Qamshy.kz.

«قازاقتى جالقاۋ، ەرىنشەك دەيتىندەرمەن كەلىسپەيمىن. ول – قۇلدىق سانانىڭ كورىنىسى. وسى ءقازىر ءوزىمىز وتىرعان استاناداعى كوپتەگەن عيماراتتار تاۋەلسىزدىك جىلدارى قازاقتىڭ قولىمەن سالىندى. قازاقتى جالقاۋ دەۋ دۇرىس ەمەس. ءوزىم اۋىلشارۋاشىلىق سالاسىندا قىزمەت ەتىپ ءجۇرمىن. شارۋالارىمىزدىڭ دا مۇمكىندىكتەرىمەن تانىسپىن»،-دەگەن ساياساتكەر كوميسسيا الدىندا قىرۋار مىندەت تۇرعانىن ايتتى.

«پرەزيدەنت «حالىققا ۇنامايتىن زاڭ كەرەك ەمەس» دەدى. ءبىز دە سونى ايتامىز. حالىق سوڭعى بىرنەشە اپتادا ءوز ۇستانىمدارىن ءبىلدىردى. ول ۇستانىم بويىنشا حالىق جەردى شەتەلدىكتەرگە ساتۋعا دا، جالعا بەرۋگە دە قارسى ەكەنىن كورىپ وتىرمىز. وسى ستولدىڭ باسىندا وتىرعانداردىڭ كوبى ەل جاقسىلارى، اكادەميكتەر، دەپۋتاتتار، ۇكىمەت وكىلدەرى. ءبىراق، ەشكىم حالىقتان جوعارىمىن دەپ ايتا المايدى. حالىق امالسىزدىقتان، شەنەۋنىكتەر تىڭداماعان سوڭ ميتينگكە شىقتى. ءقازىر وسىنداي مۇمكىندىك بەرىلگەن سوڭ، جەر ماسەلەسىن اقىلمەن، سابىرمەن شەشەتىن ۋاقىت كەلدى. ءبارىن تالقىلاپ، ءبىر شەشىمگە كەلەيىك.

ماسەلەن، ۇلەسىندە 49 پايىز شەتەلدىك اكسياسى بار كومپانيالار جەردى جالعا الا الا ما؟ وسىنى ناقتىلاۋ كەرەكپىز. ويتكەنى، بۇعان حالىق قارسى. 10،25 جىلعا جالعا بەرۋگە دە قارسى. ءبىز بۇل زاڭدى وزگەرتۋ كەرەكپىز. مەن ءوز باسىم ول زاڭعا قاتىستى جۇمىس توبىنا كىرۋگە، سول ءۇشىن استانادا ءۇي جالداپ تۇرۋعا دا ءازىرمىن، - دەدى مۇحتار تايجان.

سونداي-اق، ساياساتكەر جەرگە قاتىستى نارازىلىق اكسيالارىنا قاتىسقان ازاماتتاردىڭ تاعدىرىنا دا الاڭداۋشىلىق ءبىلدىردى.

«حالىق ميتينگكە شىقپاعاندا، ءبىز مىناداي جيىندا وتىرماس ەدىك. سوندىقتان، كوميسسيا ول ميتينگكە شىققان ادامداردىڭ قۋدالانباۋىن قامتاماسىز ەتسىن. نەگىزسىز «روۆد-عا» شاقىرۋدى توقتاتۋ كەرەك»، - دەدى م. تايجان.