بۇگىن ياعني مامىردىڭ 19 كۇنى ءال-فارابي اتىنداعى قازۇۋ بيولوگيا جانە بيوتەحنولوگيا فاكۋلتەتىنىڭ بيوفيزيكا جانە بيومەديسينا كافەدراسى «G-Global» ينتەراكتيۆتى الاڭىنىڭ ۆيرتۋالدى جوباسى بويىنشا شەتەلدىك ۋنيۆەرسيتەتتەر مەن عىلىمي ورتالىقتاردىڭ عالىمدارى، ماماندارىمەن زاماناۋي بيومەديسينانىڭ وزەكتى ماسەلەلەرىن تالقىلاۋ ماقساتىندا «بيومەديسينانىڭ ماسەلەلەرى» تاقىرىبىندا ونلاين ۆيدەوكونفەرەنسياسىن وتكىدى، - دەپ حابارلايدى Qamshy.kz.

اتالمىش ۆيدەوكونفەرەنسيادا گەرونتولوگيانىڭ قازىرگى ماسەلەلەرى، فيتوتەراپيا ماسەلەلەرى، حرونومەديسينا ماسەلەلەرى، قاتەرلى ىسىك دياگنوستيكاسى جانە ەمدەۋدىڭ بيوفيزيكالىق ادىستەرى باعىتتارى بويىنشا ماسەلەلەر قاراستىرىلدى. 

ونلاين ۆيدەوكونفەرەنسياعا حرونومەديسينا جانە بيومەديسينا سالاسىندا ەڭبەك ەتىپ جۇرگەن وتاندىق عالىمدار مەن قاتار شەتەلدىك عالىمداردا قاتىستى.

بيوفيزيكا جانە بيومەديسينا كافەدراسىنىڭ مەڭگەرۋشىسى، بيولوگيا عىلىمدارىنىڭ دوكتورى، پروفەسسور سۇلتان تولەۋحانوۆ ءسوز كەزەگىندە «قازاقستانداعى حرونومەديسينانىڭ تاريحى، بۇگىنگى جاعدايى جانە بيومەديسينانىڭ قازىرگى جەتىستىكتەرى جايلى» ايتىپ ءوتتى. ال ۇلىبريتانيانىڭ ولستەر ۋنيۆەرسيتەتىنەن  عىلىمي زەرتتەۋشى انار احمەتجان قىزى «ەۋروپا ەلدەرىندەگى فيتوتەراپيانىڭ وزەكتى ماسەلەلەرى» تۋرالى قىسقاشا بايانداما جاساسا، رعا ءسىبىر بولىمشەسىنىڭ سيتولوگيا جانە گەنەتيكا ينستيتۋتىنىڭ پروفەسسورى كولوسوۆا ناتاليا حانىم «رەسەيدەگى قازىرگى فيتوپرەپاراتتار مەن حرونومەديسينانىڭ باعىتتارى جانە كەيبىر قوردالانعان ماسەلەلەرى» توڭىرەگىندە وي قوزعادى. جاپونيا جۋنتەندو ۋنيۆەرسيتەتىنىڭ قاۋىمداسقان پروفەسسورى، مەديسينا عىلىمدارى بويىنشا PhD. ابدىبەك قاليبەك ۇلى «شىعىس ازيا ەلدەرىندەگى فيتوتەراپيا مەن بيومەديسينانىڭ قازىرگى جاعدايى» جونىندە ءوز ءقوزقاراسىن ءبىلدىردى. ءوزارا پىكىر الماسىپ، ورتاق عىلىمي تالقى وتكىزگەن عالىمداردى قىزىقتىرعان تاعى ءبىر تاقىرىپ «قازاق مەديسيناسى» بولدى. الايدا قازاق مەديسيناسى سالاسىندا ۇلكەن جەتىستىكتەرگە جەتكەن قىتايداعى قانداس-ارىپتەستەرىمىزدىڭ تەحنيكالىق سەبەپتەردەن بايلانىسقا شىعا الماۋى بۇل باعىتتىڭ قازىرگى وزەكتى ماسەلەلەرىن قوزعاۋعا ءبىرشاما كەدەرگى بولدى.

ونلاين ۆيدەوكونفەرەنسيانىڭ سوڭىندا ۇيىمداستىرۋ ءتوراعاسى پروفەسسور سۇلتان تولەۋحانوۆ قاتىسۋشلاردى «كەڭەسىپ پىشكەن ءتون كەلتە بولمايدى» دەگەندەي، بولاشاقتا بىرلىكتە جۇمىس جاساۋعا شاقىردى. اسىرەسە شەتەلدە عىلىم سالاسىندا جۇرگەن قانداستارمىزدى ەلگە كەلىپ قىزمەت جاساۋعا، نە بولماسا دامىعان ەلدەردەگى تاماشا مۇمكىندىكتەردى پايدالانىپ قازاق عىلىمىن قولداۋعا ۇندەدى.

ونلاين ۆيدەوكونفەرەنسيانىڭ قىسقاشا بارىسىن تومەندەگى سىلتەمەدەن كورە الاسىزدار.

https://www.youtube.com/watch؟v=gKsy3LnM7q8

الىبەك ىدىرىس

ءال-فارابي اتىنداعى قازۇۋ بيوفيزيكا جانە بيومەديسينا كافەدراسى