بۇگىن ەلباسى نۇرسۇلتان نازاربايەۆ وتكەن 4 ايداعى الەۋمەتتىك-ەكونوميكالىق دامۋ قورىتىندىلارىنا ارنالعان كەڭەس وتكىزدى، - دەپ حابارلايدى Qamshy.kz.

وعان ورتالىق مەملەكەتتىك ورگان باسشىلارى، وبلىس اكىمدەرى، استانا جانە الماتى قالالارىنىڭ اكىمدەرى قاتىستى.

جيىندا مەملەكەت باسشىسى ەلدىڭ الەۋمەتتىك-ەكونوميكالىق دامۋ كورسەتكىشتەرىنە باعا بەردى.

«ءبىز جۇمىسسىزدىقتىڭ وسۋىنە جول بەرمەدىك. ونىڭ كورسەتكىشىن بۇرىنعى 5 پايىزدىق دەڭگەيدە ساقتاپ قالدىق. بيۋدجەتتىك كىرىستەردىڭ كەمۋىنە قاراماستان بارلىق مەملەكەتتىك الەۋمەتتىك مىندەتتەمەلەردى ساقتاپ قالۋ تۋرالى تاپسىرما بەرگەن بولاتىنمىن. حالىقتىڭ ءال-اۋقاتىن تومەندەتۋگە بولمايدى. بۇل – بارلىق دەڭگەيدەگى مەملەكەتتىك ورگانداردىڭ نەگىزگى مىندەتى. وسى جىلى ءبىز ءبىلىم سالاسىنداعى بيۋدجەتتىك قىزمەتكەرلەردىڭ ەڭبەكاقىسىن 29 پايىزعا، دەنساۋلىق ساقتۋ سالاسىنداعى جۇمىسشىلاردىڭ جالاقىسىن 28 پايىزعا، باسقا سالالارداعىلاردىكىن 40 پايىزعا وسىردىك. شاكىرتاقى كولەمى، مۇگەدەكتەر مەن اسىراۋشىسىنان ايىرىلعاندارعا تولەنەتىن جاردەماقىلار دا 25 پايىزعا ارتتى. مۇنىڭ بارلىعى داعدارىسقا قارسى ءىس-قيمىلداردىڭ ناتيجەسى»، - دەپ اتاپ ءوتتى ەلباسى.

ەلباسى جيىندا جەر رەفورماسى جونىندەگى ءتۇسىندىرۋ جۇمىستارىن بەلسەندى تۇردە جۇرگىزۋدى تاپسىردى. «جەر رەفورماسى جونىندەگى كوميسسيا سايكەس زاڭنامانى جەتىلدىرۋ بويىنشا كەلىسىلگەن ۇستانىمدى جاساپ شىعۋى ءتيىس»، - دەدى ن. نازاربايەۆ.

«ءبىز بىرلىگى بەرەكەلى ەلدىڭ ىرىسى مول بولارىن بىلەمىز. بىرلىگى بولماعاندىقتان، بەرەكەسى كەتكەن، نەشە جىلدىق ەڭبەگى زايا بولىپ، دامۋى كەرى قاشقان قانشاما ەلدەر بار. ءبىز سولاردىڭ قاتەلىگىن قايتالاپ، جۇرتتىڭ تاباسىنا قالماۋعا ءتيىسپىز. الەم الدىندا ۇياتقا قالماي، كۇردەلى ماسەلەنى سىندارلى سۇحباتپەن شەشە الاتىنىمىزدى پاش ەتە ءبىلۋىمىز كەرەك. بيىل تاۋەلسىزدىگىمىزدىڭ 25 جىلدىق مەرەيلى بەلەسى. وسى كەزەڭدە بىزگە سىرتتان كوز تىگىپ، سىناي قاراپ وتىرعاندار كوپ»، - دەدى نازاربايەۆ.

سونىمەن قاتار، پرەزيدەنت مەملەكەتتىك باعدارلامالاردى جۇزەگە اسىرۋ تاقىرىبىن قوزعادى.

«بيزنەستىڭ جول كارتاسى – 2020» جوبالارىنا ارنالعان ينفراقۇرىلىمنىڭ قۇرىلىسىنا بولىنگەن قاراجات يگەرىلمەدى. بيىلعى 4 اي ىشىندە «نۇرلى جول» اياسىندا بولىنگەن جىلدىق بيۋدجەتتىڭ 8 پايىزى عانا يگەرىلگەن»، - دەدى نازاربايەۆ.

ونىڭ ايتۋىنشا، 121 جوبا تۇراقتاپ تۇر، 13 جوبا پروبلەمالىق رەتىندە قاراستىرىلمادى. ەنگىزىلگەن كاسىپورىنداردىڭ بارلىعى جوبالىق قۋاتقا يە بولا المادى. ولاردى ەكونوميكامىزدىڭ قازىرگى جاعدايى قولدادى.

ول يندۋسترياليزاسيانىڭ التى جىلىنىڭ قورىتىندىسى بويىنشا بارلىق وڭىردە شامامەن 900 كاسىپورىننىڭ ىسكە قوسىلعانىن ايتتى. نەگىزگە كاپيتالعا قۇيىلعان ينۆەستيسيالار 15 پايىزعا ءوستى. ەلدىڭ 9 وڭىرىندە ءوندىرىس كولەمىنىڭ ءوسىمى قامتاماسىز ەتىلدى.
جيىندا وبلىس باسشىلارىنا جەر رەفورماسىنا قاتىستى جۇمىستاردى جان-جاقتى ءتۇسىندىرۋ جانە تاۋەلسىزدىكتىڭ 25 جىلدىعىندا ەلدىڭ ءبىرتۇتاستىعى مەن دامۋىن الەمگە پاش ەتۋدىڭ ماڭىزى تۋرالى باسا ايتتى.