بۇگىن استاناداعى ورتالىق كوممۋنيكاسيالار قىزمەتىندە ءبىرىنشى ۆيسە-پرەمەر باقىتجان ساعىنتايەۆتىڭ ءتوراعالىق ەتۋىمەن بريفينگ وتۋدە، - دەپ حابارلايدى Qamshy.kz.

بريفينگتە باقىتجان ساعىنتايەۆ وتكەن سەنبىدەگى جەر كوميسسياسىنىڭ العاشقى وتىرىسىنىڭ قورىتىندىلارىن جاريالادى. ونىڭ ايتۋىنشا، كوميسسيا وتىرىسىندا دا، ودان تىس 1434 ءنومىرى بويىنشا اشىلعان شۇعىل جەلىگە دە كوپتەگەن ۇسىنىستار تۇسكەن.

«اۋىلشارۋاشىلىعى مينيسترلىگى جانىنان شتاب قۇردىق. كوميسسيانىڭ حاتشىلىعى جۇمىس ىستەۋدە. وسىندا كوميسسيا مۇشەلەرىنىڭ دە، باسقا ازاماتتاردىڭ دا بارلىق ۇسىنىستارى جيناقتالاتىن بولادى»، - دەگەن ب. ساعىنتايەۆ ءاربىر ۇسىنىس، پىكىردىڭ ساراپتالاتىنىن باسا ايتتى.

«ءبىز وسى جەر ماسەلەسىندە بارلىق ازاماتتاردىڭ جۇمىلدىرىلعانىنا مۇددەلىمىز. ءقازىر ءبىز باق-تا، الەۋمەتتىك جەلىلەردە ايتىلىپ جاتقان بارلىق ۇسىنىستاردى قاراپ وتىرمىز. ولاردىڭ بارلىعى تالداناتىن بولادى. ياعني، ەلباسى ايتقانداي، جەرگە بايلانىستى سارى ۋايىمعا سالىنىپ جۇرگەندەردىڭ بارلىعى دا ويلارىن ورتاعا سالۋى كەرەك»، - دەدى ول.

ەستەرىڭىزگە سالساق، وتكەن سەنبى كۇنى جەر كوميسسياسىنىڭ العاشقى وتىرىسى وتكەن بولاتىن. ونىڭ قۇرامىنا 75 ادام قابىلدانعانىمەن، بۇگىندە بىرنەشە ازامات كوميسسيا جۇمىسىنا قاتىسۋدان باس تارتتى.