مەملەكەت باسشىسى نۇرسۇلتان نازاربايەۆ قازاقستاننىڭ حالىق ءارتىسى ءسابيت ورازبايەۆتى قابىلدادى، - دەپ حابارلايدى Qamshy اقوردا سايتىنا سىلتەمە جاساپ.

كەزدەسۋ بارىسىندا ەلباسى ونىڭ م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا 50 جىلدان اسا جۇمىس ىستەگەنىن، وسى ۋاقىت ىشىندە 100-دەن استام ءرولدى سومداعانىن اتاپ ءوتتى.

مەملەكەت باسشىسى حالىق ءارتىسىنىڭ قازاق تەاترىنىڭ دامۋىنا كۋا بولىپ، ق.بادىروۆ، س.قوجامقۇلوۆ، ق.قۋانىشبايەۆ سىندى ساحنا ساڭلاقتارىمەن بىرگە ونەر كورسەتكەنىنە نازار اۋداردى.

كەزدەسۋ بارىسىندا قازاقستان پرەزيدەنتى وتاندىق تەاتر ونەرىنىڭ دامۋىنا قوسقان ەلەۋلى ۇلەسى، بەيبىتشىلىكتى، دوستىق پەن قوعامدىق كەلىسىمدى نىعايتۋعا سىڭىرگەن ەڭبەگى ءۇشىن س.ورازبايەۆتى ءى دارەجەلى «دوستىق» وردەنىمەن ماراپاتتادى.

س.ورازبايەۆ ماراپات ءۇشىن، سونداي-اق م.اۋەزوۆ اتىنداعى تەاتردى جانە جالپى تەاتر ونەرىن دامىتۋعا كوڭىل ءبولىپ وتىرعانى ءۇشىن نۇرسۇلتان  نازاربايەۆقا العىس ايتتى.