سەناتور مۇراتباي جولداسبايەۆتىڭ پىكىرىنشە، پوليسيا قىزمەتكەرلەرى زاڭدى بۇزعان، - دەپ حابارلايدى Qamshy.kz

«زاڭ بۇزۋشىلىق بار. بارلىعى قاتەلەسىپ جاتادى. ءبىراق ولار كەشىرىم سۇراۋ كەرەك.  مەنىڭشە، پوليسيا باستىعى كەشىرىم سۇرادى. مۇنداي جاعدايلاردا تۇسىنىسپەۋشىلىكتەر بولادى. مەن مۇنى قاتەلىك دەپ ەسەپتەيمىن. جۋرناليستەرگە تيىسپەۋ كەرەك. ولار جۇمىستارىن ەمىن-ەركىن ىستەۋى كەرەك. سىزدەردى جابىرلەۋگە بولمايدى. پوليسيا ءتۇسىندىرسىن. ولاي بولمايدى. قوعام ولاردىڭ كىم ەكەنىن، جۋرناليستەردىڭ كىم ەكەنىن ءبىلۋى ءتيىس»، - دەدى سەناتور مۇراتباي جولداسبايەۆ.

ەستەرىڭىزگە سالا كەتەيىك، 21 مامىر كۇنى ونداعان جۋرناليست ۇستالعان ەدى. ەلوردالىق ءىىد ۇستاۋ فاكتىسىن جوققا شىعاردى. الايدا ب ا ق وكىلدەرى اۋداندىق ءىىب بىرىندە بولعاندارى تۋرالى جازدى. بۇل جاعدايعا قاتىستى اقپارات جانە كوممۋنيكاسيا ءمينيسترى داۋرەن ابايەۆ ءوز پىكىرىن بىلدىرگەن بولاتىن.

«ارىپتەستەرىمىزدىڭ ۇستالعانىن جەر رەفورماسى جونىندەگى كوميسسيا وتىرىسىنا كەلە جاتقان كەزدە ءبىلىپ، ىشكى ىستەر مينيسترىمەن بايلانىسقا شىقتىم. ءقازىر تەكسەرىس جۇرگىزىلىپ جاتىر، ولاردىڭ نە سەبەپتى ۇستالعانى انىقتالىپ جاتىر. سونىمەن قاتار، ول جۋرناليستەردىڭ جاقىن ارادا بوستالۋى مۇمكىن ەكەنىن ايتتى»، - دەدى ابايەۆ. 

كەيىن ءبىرشاما ۋاقىتتان سوڭ جۋرناليستەر بوساتىلىپ، مينيستر جۋرناليستەردى قولدايتىنىن جەتكىزىپ، قۇقىق قورعاۋ ورگاندارىنىڭ وكىلدەرىمەن جۇمىس جاسايتىنىن ايتتى.

كەيىنىرەك، جاعدايعا قاتىستى باس پروكۋراتۋرا جاۋاپ بەردى.

«پروكۋراتۋرا ءاردايىم بارلىعىنا قاتىستى شەشىم قابىلدايدى. ول مەيلى پوليسيا، مەيلى باسقا بولسىن، كىم زاڭدى بۇزادى، سوعان قاتىستى شەشىمدەر قابىلدانادى. ال بۇگىنگى ۇستالعاندار جايلى ەشتەڭە ايتا المايمىن، ويتكەنى حابارىم جوق. مەن وسىندا جەر كوميسسياسىنىڭ وتىرىسىندا وتىرمىن، الايدا ارتىنان مىندەتتى تۇردە حابار بەرەتىن بولامىز»، - دەدى باس پروكۋرور اندرەي كراۆچەنكو.