ۇستىمىزدەگى جىلدىڭ 18-20 مامىر ارالىعى كوكشەتاۋ قالاسىنداعى ش.قۇسايىنوۆ اتىنداعى وبلىستىق قازاق دراما تەاترىندا اقان سەرى اتىنداعى مادەنيەت كوللەدجىنىڭ 60 جىلدىعىنا وراي قازاقستان رەسپۋبليكاسى جانە رەسەي فەدەراسياسى وقۋ ورىندارىنىڭ ستۋدەنتتىك ۇجىمدارى مەن تەاتر جاستارىنىڭ II حالىقارالىق "ديدار" تەاتر ونەرىنىڭ ەكسپەريمەنتالدىق فەستيۆال - لابوراتورياسى ءوتتى، - دەپ حابارلايدى Qamshy.kz.

وعان  اقتوبە قالاسىنان اگۋ تارلان كوللەدجى "AL*ART" ستۋدەنتتىك تەاتر ەۆرەپيد جەلىسى بويىنشا "مەدەيا" جانە ا.پ.چەحوۆ "قاراڭعىلىق"، ا.ۆولودين "ماحابباتتى باعالا"؛ پەتروپاۆل قالاسىنان گۋ شود-ونەر كوللەدج كەشەنى، ۆ.كراسنوگوروۆ "رەجيسسەر ماسسوۆىح زرەليشش"، الماتىدان ت.جۇرگەنوۆ اتىنداعى قازاق ۇلتتىق ونەر اكادەمياسى ۋ.شەكسپير "ماكبەت"، لۋ شۋن "قويانشىقتىڭ قولجازباسى"، ق.قاسەنوۆ "ارمانشىلدار" جانە "الماتى-Musik" تەاترى "جازىعىم نە مەنىڭ، اناشىم؟"، ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى ە.امانشايەۆ "ول" مونوسپەكتاكلى، كوكشەتاۋدان اقان سەرى اتىنداعى مادەنيەت كوللەدجى ر.مۇقانوۆا "ماڭگىلىك بالا بەينە"، ا.س.پۋشكين "موي پۋشكين"، م.چەحوۆ "مەدۆەد"، ۋ.شەكسپير "رومەو مەن دجۋلەتتا"؛ ماريي-ەل رەسپۋبليكاسىنان ي.س.پالانتاي اتىنداعى مادەنيەت جانە ونەر كوللەدجى ە.يسايەۆا "پرو مويۋ مامۋ ي پرو مەنيا" ۇزىندىلەرى مەن ەكسپەريمەنتالدى قويىلىمدار قاتىسىپ، ب ا ق سىناستى.   

فەستيۆالدە باعدارلاما بويىنشا ەكسپەريمەنتالدى قويىلىمدارمەن قاتار ءتۇرلى شەبەرلىك سىنىپتار ۇيىمداستىرىلدى. ياعني، فەستيۆال تەك سپەكتاكل كورسەتۋدى عانا ماقسات تۇتپاعان. ونىڭ باستى نىساناسى - تەاتر ونەرىنىڭ دەڭگەيىن كوتەرىپ، ونى دامىتۋ ءۇشىن  تاجىريبە الماسۋ، پىكىر الىسۋ.     فەستيۆال جاستىقتىڭ جالىن اتقان جاڭا بۋىن جاستاردىڭ قاتىسۋىمەن فورماتتارى بىر-بىرىنە ۇقسامايتىن ءار ءتۇرلى  قويىلىمدارمەن ەرەكشەلەنەدى. سولاردىڭ ىشىندە ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى قويعان ە.امانشايەۆتىڭ "ول" مونوسپەكتاكلى ونەرسۇيەر قاۋىمنىڭ كوزايىمىنا اينالدى. قويىلىمنىڭ كوركەمدىك-يدەيالىق ماقساتى –قازىرگى الەۋمەتتىك قوعامعا ساي سانالى ۇرپاق، ساليقالى تۇلعا قالىپتاستىرۋ. بۇل سپەكتاكلدىڭ كورەرمەنگە رۋحاني ازىق بەرۋدە ماڭىزى وراسان زور ەكەندىگى قويىلىم بارىسىندا ايقىندالدى.   

رەجيسسەر ەرلان كارىبايەۆتىڭ تراكتوۆكاسى بويىنشا جەكە ادامنىڭ سان ءتۇرلى ويلارى مەن ونىڭ ماعىناسىز تاعدىرىنىڭ ءوزى بۇگىنگى زامانداعى الەۋمەتتىك قايشىلىقتاردى كورسەتەدى. باستى رولدەگى اكتەر دانيار بازارقۇلوۆ – "ول" كەيىپكەرىنىڭ ومىردەن ءوز ورنىن ىزدەگەن فيلوسوفيالىق تولعانىسىن، شىنايى شىندىقتىڭ قۇپياسىن جان-جاقتى قاراستىرۋعا ۇمتىلعان ىشتەي تارتىسى فەستيۆال كورەرمەندەرىن تولعاندىردى. ال، جانسۇلۋ تولەگەن ورىنداۋىنداعى قوبىزدىڭ مۇڭلى ءۇنى قويىلىم اتموسفەراسىن جانداندىردى. بۇل سپەكتاكل قازىلار القاسىنىڭ شەشىمىمەن "ەڭ ۇزدىك قويىلىم" جۇلدەسىن جەڭىپ الدى. جالپى، فەcتيۆالگە قاتىسقان ونەر وردالارى مەن جان-جاقتان جينالعان كورەرمەن قاۋىم سپەكتاكلدەردى كورىپ قۋاتتانىپ، رۋحاني ازىق الدى. وسىنداي تاجىريبە ارتتىراتىن ونەر سايىستارى ارى قاراي ءوز جالعاسىن تاباتىنىنىنا سەنىمىمىز مول.