ەسىمىمىز تىزىمدەر مەن تويلاردان،
كورىنبەدى، ۇمىتىلدىق تىرىدەي...
مەنسىنبەدى تويعا تويعان اعالار!..
ەلسىرەدىم ەل ىشىندە اعالار؟..
قىر سوڭىمنان ەرگەن وسەك ءزارى اققان،
جالالارى قاساقانا تاراتقان،
قايدا بارسام مەنەن بۇرىن ۇلگەرىپ،
قارسى الدىمدا كۇتىپ تۇردى ىرجاقتاپ.
ال، جۇرەكتە جانىپ جاتتى جىر مازداپ...
ەشبىر قىلمىس جاساماي-اق،عاجابى،
استاڭ-كەستەڭ سىلكىمەي –اق، قوعامدى،
جىرلاماي-اق اجالدى،
ءتورت قابىرعا ورتاسىندا سەندەلتىپ،
قايران نارداي حاس تالابىم قامالدى:
بىرەۋلەردىڭ تىنشۋى ءۇشىن ۇرەيى،
اۋىرماۋى ءۇشىن جانە جۇرەگى،
اتپال مىسىم باسىپ تۇرار قاشاندا،
قالماۋى ءۇشىن شاۋقارعالار تاسامدا،
...تارتتىم مەن دە تارتپاي بولماس «جازامدى!»
2016
***
لاس كوشە...ساسىق اۋا...كىل توبىر،
وڭ-تۇسىنەن ايىرىلعان اسپان دا،
شاڭعا بوككەن تەرەزەمدىسۇرتەمىن،
ار جاعىندا سول باياعى تاس قالا.
سول باياعى...اسفالتسىز جول، شۋ،ماسا،
ەسكى داڭعىل،قيسىق بۇرىش،ارام جاي،
ءۇي دەگەنى ۇقسامايدى ۇيگە اسا،
كۇن دەگەنى قىلعىپ جۇتىپ الارداي،
جىر دەگەنى يەن قالعان ارالداي،
قازاق ىزدەپ جەر تۇبىنەن ورالعام،
پانا بولىپ جارىماعان ورمان بار.
الماتىنىڭ –
اتى بۇگىن –
ات ەمەس،
التى الاشتى ارمانداتقان زاتى ەلەس،
اتتاپ باسساڭ جات جانارلار،
جات جەرلەس،
وبىپ جاتقان جانتالاسىپ جان-جاقتان،
كىلەڭ كىرمە،
كىلەڭ ۇرى،
جات وڭەش.
جاسىرىنىپ ارانىنا اشىلعان،
جەمقورلىققا باتقان سايىن مالشىنعان،
ەسىكتەردىڭ ار جاعىندا «قاشقىن» بار،
بەر جاعىندا قانتالاعان جانارى،
حالىق اتتى كەك كەرنەگەن اشۋ بار.
وزگەرۋدەن كوز اشپاعان الەمدە،
وزگەرمەگەن بار قالادا،
بار ەلدە،
سىرتى-عاجاپ،
ءىشى-ازاپ الماتى،
مەن –
جانە دە!
2009
***
الاڭ دۇنيە...
كۇللى جۇرت
الاڭ
بۇگىن!
يەڭ مەنمىن!
اناڭ دا،
بالاڭ مەنمىن!
ورالعانمىن–
سەن ءۇشىن
قارا ورمانىم!
مەن سونبەيمىن،
سەن ءۇشىن
جانام بۇگىن.
الاش اتى ۇرانىم،
قۇرانىم دا،
نە جەتەدى شىنىندا تۇرانىما،
قازاق اتىن قورلاعان
قىلمىستاردان
جاۋاپ الماي تىنبايمىن سۇراعىما.
الاڭ دۇنيە،
كۇللى الاش الاڭ بۇگىن،
يەڭ مەنمىن،
اناڭ دا،
بالاڭ مەنمىن.
ازابىمداي تىزىلگەن القا-مونشاق،
اجارىمدى اشار دەپ تاعام بۇگىن.
2008
***
كوركەي، گۇلدەن!
وركەندەي ءتۇس وتانىم،
ات توبەلى توپتىڭ قامى، باعى ءۇشىن!
وقىماڭدار،
ولەڭ دەگەن اتپال مۇڭ،
ءبىر ءۇزىم نان زار قىلعانىن ايتقانىن.
التىن وردا
مىنا ءبىزدى تۋعان ەل،
ايبىندى ەلدىڭ مۇراگەرى –
مىنا مەن،
ويىندار كوپ،
قارق قىلعان كۇلكىگە،
ويىنشىق بوپ جات قولىندا،
جىلاما ەل؟!
شەت ەل اسقان بولاشاعىن ارمانداپ،
جاستار قايتا ورالاتىن كۇن كەلەر،
قۇلاقتارعا تىعىندالعان ايعايلاپ،
جەل ىشىنەن قاجىپ شىققان كىل ەرلەر.
بابالاردىڭ اماناتىن ەسكە الىپ،
ءوز ءناسىبىن سۇراسا دا كىنالى،
وڭاشادا سىرلاساتىن كەش تاۋىپ،
بىرەۋ مۇڭىن جىرلاسا دا كىنالى.
تاريح مەنى جەتكىلىكتى جىلاتقان،
ەندى قايتا تارتقىزبا اللا ازاپتى؟
قازاق دەگەن حالىقپىن مەن جۇماققا،
اينالدىرا بىلگەن نەبىر توزاقتى.
قازاق دەگەن حالىقپىن مەن،
تابىتتىڭ،
استىنان دا كورە بىلگەن جارىق كۇن،
تۇرمەدە دە قۇلاپ جاتىپ قان قۇسىپ،
جۇلىپ الىپ لاقتىرعان قامىتىن.
كارىنە دە،
بارىنە دە توزگەنبىز!
قۋعىندالىپ،
جارتى الەمدى كەزگەنبىز،
سونىڭ ءبارىن كورىپ-كەشىپ وتكەن سوڭ،
قايتا ەگەر باستالسا وتار-زوبالاڭ،
كىم بولساڭ دا
تىعا الامىز كورگە ءبىز.
الاش ءۇشىن ۇيىقتاماعان تاعىندا،
ابىلايدىڭ قانى بار بۇل قانىمدا،
ءبارىمىزدىڭ
حاقىمىز بار!
اقىمىز!
ءبارىمىزدىڭ
ورنىمىز بار مۇندا!
2011
***
جۇرەك بار مەندە، جۇرەگىڭ مەندەي بولسا ادال،
وزىمدەي سەنى ءمىناجاتىما قوسا الام.
ادىلەت مەنىڭ قورعانىم بولماعانىڭمەن،
مەن جالعىز وتكەن اسۋلار مەنەن بەلدەردە،
ومىرىممەنەن قورعانىڭ بولار جول سالعام.
كوتەرتتىڭ ءبارىن:
كۇناسىن،
وسەك،
جالاسىن،
ءتۇسىنتتىڭ ءبارىن:
اقىماعىن دا، داناسىن،
ءسۇيىنشى سۇراپ،
قۋانىشتاردىڭ سىڭعىرى،
قارسى الىپ جاتتى،
الدىمنان مەنى دارا شىڭ.
اقىندارىن ارقالانبايدى قاي حالىق؟
اققۋلارىن اتادى قالاي قانداتىپ ؟
مىڭ جۇرەكتى ءبىر جۇرەككە سىيدىرىپ،
مەن كۇلىپ تۇرمىن ەڭىرەپ،
باقىتتان باسىم اينالىپ!
بويىمدى تۇگەل قايعى الىپ.
***
ۇيىقتار ەدىڭ،
ول –داعى،
ۇشتى-كۇيلى جوعالدى،
كۇلەر ەدىڭ،
كۇلۋگە،
ۇقسامادى ول-داعى.
...ءال-قۋاتىڭ شىنىمەن،
وسىمەنەن ءبىتتى مە؟
جانارتاۋداي شاعىڭدا،
نەگە قاۋساپ قۇلادىڭ؟
قولقاڭا جاس تىعىلىپ،
نەگە ەڭكىلدەپ جىلادىڭ؟
ءولىپ تۇردىڭ سەن بۇگىن،
جەرىپ تۇردىڭ بارىنەن...
قاسارىسىپ باقساڭ دا،
تاعدىرىڭنان امالسىز،
ءبىرىنشى رەت جەڭىلدىڭ.
ءجۇزىنشى رەت شەگىندىڭ.
الدىڭدا ءالى مىڭ اتىس،
شىدادىڭ با، شىداي ءتۇس.
***
تاۋ باسىنان ءبىر سۇلبا،
قارايعانداي بولادى،
ىمىرت شاقتىڭ تۇسىندا،
كورىندى دە جوعالدى.
قىر استىنان زار يلەپ،
شىڭعىرادى ءبىر داۋىس،
«مەن ءتىرىمىن،بارمىن»- دەپ،
شۋلاتىپ ساي جىڭعىلدى.
ءالسىز جۇرەك شەرمەندە،
الدەكىمدى كۇتەدى،
اسپاننان دا، جەردەن دە،
ىزدەپ، وكسىپ بىتەدى.
ارمانىمداي اقىرعى،
جان بىتكەنگە جار سالىپ،
الاسۇرىپ شاقىردى،
جاعى تالماي قاقسانىپ.
ماحابباتتىڭ شارتى ما؟
ءوتۋ، اڭساپ تابا الماي؟
قارايلاتپاي ارتىڭا،
جانۇشىرتقان جالعان-اي!
2002
***
جولىم بولىپ كورگەن جوق، تەگىن،تەگىس،
شىقتىڭ ەكەن مايدانعا جەڭىلمەڭىز،
تەرىم مەنەن شەرىمنىڭ وتەۋىنە،
قول جەتكەنشە ءبارىبىر شەگىنبەيمىز!
شەگىنبە ءىز! بەرىلمە ساي-جىراعا...
ەرىمە مۇز! ەرىسىن قايعى عانا...
جەڭىلمە قۇز! جەڭىلسىن جاۋىڭ عانا...
ەگىلمە قىز! ەگىلەر شاعىڭ الدا...
2004
***
بىرەۋ كەلەدى...
بۇگىن...
سەزەمىن،
اسىعىپ ەنەدى ەسىكتەن،
قارس ايىرىلعان وزەگىم،
وكسيمىن مەن قۋانىشتان ەركەلەپ،
وتكىزەمىز تىلسىم شاقتى وت قۇشىپ،
تانىس تەر ءسىڭىپ،
دۇنيەنى ءورت تەربەپ.
بىرەۋ كەلەدى!..
كوزىمە مولدىرەپ جاس ەنەدى،
الدەقايدان سوعاتىنداي جەل لەبى.
تۋعان جەردىڭ ءانىن،ءدانىن ارقالاپ،
كەلە جاتىر قۇتقارۋعا ول جانىمدى،
جالعىزدىقتى جوق قىلادى ول تالقانداپ.
ات تۇياعى دۇبىرلەتكەن دالانى،
تۇسىمە ىلعي تاۋ ەنەدى.
كەلەدى ءبىر جان...تاۋداي الەم كەلەدى،
كەۋدەمدى كەنەت شارلاي اۋەن كەرنەدى،
جاراتقان يەم،
كىم بولساڭ دا،كەل ەندى،
بىرەۋ كەلەدى...كەلەدى...
كەل؟!
1999
***
...راحمەت!
...تاۋقىمەت!
مەندەي بوپ ازاپتىڭ،
اۋىرىن تارتىپ ءوت.
مەن سەنى ولە ءىشتىم،
باسىپپىن جەر ءۇستىن.
كيەم بار ۇمايداي،
جەردە ەدىم...
قۇدايداي!
بەزۋگە تىرمىسىپ،
باقسام دا،
بەزبەدىڭ،
جولىڭدا قان –ءسولسىز،
دەمىگىپ، سەندەلدىم.
2004
***
قۇداي مەنى
قورعاي الساڭ، قورعارسىڭ،
ورىنىمنان تۇرعىزارسىڭ،
وڭدارسىڭ،
قانتالاپاي تاعدىر كەشتىم،قايتەيىن،
سەنەمىن عوي،
اتىڭ قۇداي بولعاسىن.
ءتۇنىڭدى دە جارقىراتىپ،
كۇن ەتكەن،
مۇڭىڭدى دا شاشىپ، تەۋىپ
كۇل ەتكەن،
تاس-تالقان عىپ قاسىرەتتى باسىنعان،
مەن ەمەس پە ەم،
ۇشىپ شىققان تۇنەكتەن؟
كوككە ىنتىق،
حاس كۇشى بار قانىندا،
جارالى قۇس ۇشا الادى تاعى دا...
اسپان مەن تاۋ،
جانىم اڭساپ سەندەردى،
ۇشىپ شىقتىم،
قونۋ ءۇشىن تاعىما،
قۇلاۋ ءۇشىن تاعى دا،
سورىم مەنەن باعىما...
2009
***
راس، ونى سۇيگەنىمە وكىنەم،
داۋسىڭ قانداي زارلى ەدى جەتىگەن؟
مەنىڭ وعان كەزدەسۋگە اسىققان،
ءبىر ءسوزىم بار...سەن جەتكىزشى، وتىنەم؟
جار سالار ەم، قالسام-داعى كۇلكى بوپ،
ءبىزدىڭ ۇلتتىڭ ونداي اشىق عۇرپى جوق.
مەنى وسىلاي ءوزى وتقا سالعان جان،
وتتان ەندى قۇتقارۋعا قۇلقى جوق.
جۇرەگىمىز جولىققان سوڭ، ءان تىلەپ،
اي وزىڭمەن كەتكەن ەدىم جاقىن بوپ.
مەن ەرىكتى بولسام دا ونى سۇيۋگە،
ونىمەنەن جولىعۋعا حاقىم جوق.
جەتىگەن-اۋ، ءتۇندى جارىپ سالشى اۋەن،
جاۋىن بولىپ بۇلتتى جارىپ بارشى،ولەڭ،
مەنى وعان جولىقتىرعان ءومىر دە،
ەندى ونىمەن كەزدەسۋگە قارسى ەكەن.
تولماعان اي...
سولماعان اي...تولىقشى؟
مەن ويىنعا جارالماعام سونى ۇقشى.
مەنى وعان اپاراتىن جول شالعاي،
جەتە المايمىن،
جەتىگەن-اۋ،
جەتىگەن،
ايتا المايتىن ءانىم بار ەد،
قۇپيا،
سول ءانىمدى ءتۇندى جارىپ شىرقىراپ،
مەن بولىپ سەن جولىقشى؟
تولماعان اي...
تولعانىڭ ءجون...تولىقشى؟!
شىن سۇيۋگە جارالعان ەم، سونى ۇقشى؟
2005
***
وسىنىڭ بارىنەن جالىقتىم،
جۇرەگىم سوعىپ تۇر نە ءۇشىن؟
الدىنا اپارىپ تابىتتىڭ،
قايتادان قايتاردىڭ نە ءۇشىن؟
ءبىز ءۇشىن مىنا ءومىر بۇگىندە،
اجالدىڭ جۇزىنەن جىلى ەمەس،
سوڭىندا سول بولسا تىنار جەر،
ولىمنەن باسقا جىر جىر ەمەس.
قۇنىققان،
دانىككەن،
بىلىققان،
رۋحسىز عاسىردان شارشادىم،
تىم ەرتە توڭدىرعان سۋىقتان،
قالدى ەكەن ءالى دە قانشا ءالىم؟
كوز جاسىن ساۋدالاپ توبىردىڭ،
اشىققان ارمانداي تويلا ادام!
وڭەشى بىتەلمەس جەمىردىڭ،
تۇگىمەن جۇتساڭ دا تويما ادام!
مەرگەنىم،
ءمۇلت كەتپەي، دالدەشى؟
تەك شويىن كەۋدەمنەن وتەر مە؟
ءتاڭىردىڭ بولساق جاي اۋرەسى،
وسىنىڭ ءبارى دە بەكەر مە؟
2002
***
كەشپەيتىن كەگىڭ بار مەندە،
ءحالىمدى مەنىڭ حال دەمە!
جوعىمدا مەنىڭ جىلاما،
بارىمدا مەنىڭ ەلەمە!
ءزىلماۋىر ويدان بوساتپاي،
قايعىمنىڭ ءوزى زىلدەي-دى،
سوندا دا سەنەن باس تارتپاي،
جاڭبىرسىز كەشتە كۇلگەم-دى.
مىسىمدى باسىپ تۇراتىن،
زارپىڭنىڭ سونشا باسقانى-اي،
استىندا قالسام سىناقتىڭ،
توگىلمەي شىدار جاس قالاي؟
ۇشا الماي قالدىم، جەر تىرەپ،
قارا جەر سەنەن قاشا الماي،
قۇس ەدىم اپپاق قاناتتى،
ادام عىپ نەگە جاراتتى؟
قۇس بولىپ كەتپەك بولىپ ەم،
انا جەر تارتىپ باراتتى.
شاتتىقتان باسىم اينالىپ،
ۇرەيدەن بوساپ،جايلانىپ،
قوش ايتىپ تۇنەك،تۇمانعا،
جارىققا شىعار كۇن بار ما-اي؟
قايعىسىز، قامسىز بۇلاڭداپ،
جۇرەتىن سول ءبىر كۇن قايدا-اي؟
***
تۋعان ەل ءبىزدى ۇمىتتى،
تۋعان جەر ءبىزدى ۇمىتتى،
اكەمنىڭ نەنى كورگەنىن،
بىلەمىن نەدەن ولگەنىن.
جار سالدىم مەن دە جاھانعا،
الەمگە،ەلگە،وتانعا،
ايبارىم جاسقاپ جاسىندى،
بەزىندى زاۋال، زاھار دا!
سارعايىپ تاڭدار اتقاندا.
قىزارىپ كۇندەر باتقاندا،
ادىلەت ءۇشىن ولگەندەر،
تۇرەگەلىڭدەر كورلەردەن.
اتويلاپ شىعام دەپ سەنگەم،
بوراعان جاۋعا بەلسەنگەن،
ەسەمدى الام مەن سەنەن،
ءوشىمدى الام شەر سەنەن.
وزەگىم ءورت پە، نالا ما؟
نالا ما، الدە، جارا ما؟
سەنە السام ءولىم بارىنا،
سەنەيىن قالاي جالعانعا؟
2011
***
بۇرا تارتقىش جاقىنعا،
تەك سەنىكى ماقۇل ما؟
قاراماي رۋ،جەرىمە،
مەنىكىن دە ماقۇلدا.
ۇلتسىز قوعام،قوعام با؟
بىرلىگىمدى توناما،
سويىلىڭدى جات جۇرتقا،
بىرگە ارنايىق ونان دا.
تاڭىرسىنەر دالاعا،
تاۋ سەنىكى عانا ما؟
سالقىنداتپاس ارانى،
سەزىم كەرەك ساناعا.
وتان اتتى پانامىز،
توي تويلاتپا الاۋىز،
وگەي تۋعان جوق شىعار،
قازاق اتتى انامىز؟
مىڭ تۇسسە دە تابىتقا،
ءبىر تۇسپەيتىن قالىپقا،
قايتسەم پەرزەنت بولا الام،
ەسەيمەيتىن حالقىما؟!
2002
***
جۇرەكتەردى جىلاتا الار سەن عانا،
جىلاتىپ اپ جۇباتا الار سەن عانا،
جۇباتىپ اپ جىلاتار دا سەن عانا.
بەزىندىرىپ مىنا جالعان دۇنيەدەن،
ءولىم بولىپ تىڭداتاتىن سەن عانا،
ءولتىرىپ اپ قايتا اكەلىپ دۇنيەگە،
ءومىر بولىپ ءۇن قاتاتىن سەن عانا!
سونىڭ ءبارىن كوتەرەتىن جەر عانا،
سونىڭ ءبارىن ۇقتىراتىن شەر عانا،
تىڭداپ تۇرىپ زارلى ءۇنىڭدى سوناردا،
جىلاپ تۇرىپ، كۇلە الاتىن مەن عانا!
...قوبىز!
2002
***
جاقسىعا جار شاعىم،
قۇشاقتاپ زار ساعىم،
جازىقسىز تالانىپ،
مەن اعا،شارشادىم.
سەزىممىن ەگىلگەن،
ءتوزىممىن جەلىنگەن،
جەڭىلدىم سەنىمنەن،
ءبولىندىم ەلىمنەن.
كىرمەمىن نالىعان،
تۇرمەمىن جابىلعان،
اياقپىن قاڭعىعان،
باسىنان شابىلعان.
اۋىرمىن ومىردەن،
كەسىلگەن بەلىنەن،
ءتاۋىرمىن ولىدەن،
ءارىمىن ولىمنەن.
ازاپپىن وزىمە،
عاجاپپىن سەزىمدە،
التىنمىن كومىلگەن،
مازاقپىن جەزىنە.
دالامىن اڭىرعان،
الاڭمىن سان ۇرعان،
قورعانسىز، ورمانسىز،
بالامىن قاڭعىرعان.
كۇن بۇلتتى،
اي ىقتا،
اينالماي عايىپقا،
تالپىنسام ايىپ پا؟
ايتشى اعا، وسى ءومىر،
ماعان، راس، لايىق پا؟
2002،2008،2010.
***
مەرەيىمنىڭ ۇستەمدىگىن سۇراعان،
مەنى قۇپتاپ جۇرەتۇعىن ءبىر ادام،
قارىز بولماي قالا الامىن مەن قالاي؟
باعىڭ ءوسىپ،قايعىڭ كەمىپ،ءجۇر امان.
قانىپەزەر كەز العاندا القىمعا،
قاڭسىراسام سايالاتىپ سالقىنعا،
مەن دەگەندە قۇراق ۇشىپ جۇرەتىن،
باسىمدى يەم ادىلەتتى قالپىڭا!
جيىرىلىپ، يتكوزدەنىپ،جان-جاعىم،
باتقان شاقتا جازىعى جوق ارعا مۇڭ،
مەيىرىمىن قورعانىش قىپ سىرتىمنان،
جۇرگەن جاننىڭ كەڭدىگىنە تاڭعالام.
جىرتىق-جاماۋ كوڭىلىمدى قۇراعان،
سەنىڭ ارقاڭ امان قالسام قۇلاۋدان،
مەندەيلەردىڭ جەبەپ ءجۇرسىن العىسى،
مىڭ ناداننان قۇنى ارتىق ءبىر ادام!
2003
***
سەنى كورۋ قانداي قيىن،قانداي ب ا ق،
ءومىر دە ەمەس، ءولىم دە ەمەس بار ساعىم،
قاسىرەتىمدى تۇسىنبەيتىن جاندى ويلاپ،
زايا بولدىم قانشاما كۇن،قانشا ءتۇن.
سەنى كورۋ: نەتكەن اۋرە،نەتكەن سور،
توپەلەتىپ تاس توبەمنەن توكپە قار.
ءبارى كەنەت بىتكەن كۇنى سەن مەنى،
تاپسىرىپ كەت كۇيگەن كۇنگە شولدەگى؟
2002
***
جان الاۋىن جاقتىم قايتا كونەرگەن،
ءتان قامالىن بۇزدىم قايتا كەزەرگەن،
ورىنىمدى بەرەر ەدىم قيتىقسىز،
لايىق بولا المايسىڭ-اۋ، ولەرمەن؟
كەشىرمەيتىن سوقتىققاندى سورىپ قان،
مەن وزىمنەن بالا كەزدەن قورىققام،
جىگىتتەردىڭ شالا جانعان وتىنا،
تۇسپەي جاتىپ سونەتىنىم سوندىقتان.
قۇشاعىنا وراي كەتسە الىپ مۇڭ،
قارسى بىتكەن بولمىسىما جاۋىقتىڭ.
الدامشى ويعا ەلىكتىرمەك كوزدەرگە،
جاقىنداماي جاتىپ بىردەن جالىقتىم...
2005
***
وتقا شومىپ،باتىپ كەتتى انە كۇن،
قولىم بۇلعاپ قالا بەردىم مەن تاعى،
كەش تۇسە ساپ،جالعادى ەسكى ادەتىن،
قىر سوڭىمنان قالماي ەرگەن الدەكىم.
الدەكىمنەن سۇراعىم كەپ جۇرەدى،
قاي سوققاننىڭ جاندايشابى ەكەنىن،
جاسىرىلعان قولىندا تاس كۇرەگى،
بىرەۋ ءۇنسىز تۋ سىرتىمدا تۇر ەدى...
2003
***
ءبىر جاناشىر قالماعان با،شىنىمەن،
قالاي عانا بايقاماعام مۇنى مەن،
ۇعىسپاۋى مۇمكىن ەمەس ەشكىمنىڭ،
ءومىر زارىن مەندەي كەشكەن مۇڭلىمەن...
ءسال جىلۋلىق جەتەر ەدى ءسال عانا،
كەرەگى نە!
كەرەگى جوق ءدال باعا!
جۋاندار ءجۇر كوتەرە الماي قوڭ مايىن،
قارشاداي قىز قابىلداسا ءنان نالا.
ءبىر از عانا...تۇرا تۇرسام كۇن كورىپ،
رازىمىن جىرلاپ السام ۇلگەرىپ،
قورىقساڭدار وزدەرىڭنەن ءجون ەدى،
قورىقپاڭدار كەتىپ قالام تۇنگە ەرىپ...
2003
***
سور ىزدەسەڭ سامساپ تۇرعان سور دا بار،
سوردان قاشساڭ سامساپ تۇرعان ويعا بار،
وڭ جاعىمدا سۇلاپ جاتقان جولدار بار،
سول جاعىمدا سىبىرگە ايدار ورمان بار.
قولا عۇرلى كورمەسە دە، امال نە،
ءقادىرى جوق التىن ەدىك قولدا بار.
***
تاتتىدەن دە، اششىدان دا اينىدىم،
بار جيعانىم قۇنارلانعان قايعىمىن،
سەندىك بايلىق امان قالماس ءبىر جۇتتان،
مەنىڭ رۋحىم- مەنىڭ ۇلى بايلىعىم.
سول بايلىقتىڭ كەنىن قازدىم كوز ىلمەي،
حاس باتىرعا بىتكەن قايىس توزىمدەي،
توڭىرەكتى تىك تۇرعىزدىم پاتشاداي،
ءھام سەزىنىپ كۇشىمدى باس ۋازىردەي.
جانا الماساڭ، ويناماعىن جاسىنمەن،
مىنە جۇرەك!
قۇشاعىڭا ال، اسىل ەل؟
ارمانىم جوق،
الاش كەشكەن ازاپتى،
تاريح مەنىڭ جۋىپ تۇرسا جاسىممەن!
2002
***
سەن جاراتتىڭ!
سەن ءوسىردىڭ ءتاڭىرىم!
قۇدىرەت-كۇشىڭ
باس يگىزگەن بارلىعىن.
قۇتقاراتىن جەتتى ەمەس پە،
ۋاقىتىم؟
كور تۇنەكتەن،
بوساپ شىعار تاعدىرىم؟
نەگە قانداس ەتتىڭ ەكەن كەر ەلگە،
نەدەن مۇنشا قارعىستى ەدىڭ قازاعىم؟
ەلىم بار دەپ سەندىم ەكەن مەن نەگە؟
نەگە وڭىنان تۇسپەدى حاق نازارىڭ؟
نەنى ەكتىم؟
نەگە جەتتىم؟
نە ۇقتىم؟
قانشا ۇمتىلىپ،
قانشا ۇتىلىپ،
نە ۇتتىم؟
قاڭعىپ قالعان،
قالجىراعان جانىممەن،
سەنى ىزدەپ جۇرگەنىمدى ەندى ۇقتىم.
تاعدىرىم بار سارعايىپ كۇن، تاڭى اتقان،
مەن قۇلىڭمىن،
كوز جاسىنان قان اققان،
«ءلا-يللا!»-لاپ،
ۇيىقتاپ كەتسەم، ءبىر كۇنى،
مۇسىلمان دەپ،
قابىل الشى جاراتقان؟
2003،2010
***
اقسۇڭقار اقىنبابا
