«تەرروريزممەن كۇرەستى ءتيىمدى ەتۋ ءۇشىن بۇرىنعى زاڭنامالاردى قايتا قاراۋ كەرەكپىز» دەگەن ەلباسى سوزىنەن سوڭ زاڭدارعا وزگەرىس ەنگىزۋ، بۇرىن قولدانىستان شىققان جازا تۇرلەرىن «قايتا ءتىرىلتۋ» جايى ءسوز ەتىلە باستادى، - دەپ حابارلايدى Qamshy.kz 31-ارناعا سىلتەمە جاساپ.
سەناتورلار ءولىم جازاسىنا ەنگىزىلگەن ءموراتورييدى الىپ تاستاپ، تەرروريستەردى تۇگەل اتۋدى سۇراپ وتىر. لاڭكەستەرمەن تەك وسىلاي كۇرەسۋ كەرەك دەگەن دەپۋتاتتار ءتىپتى شەتەلدە وقىعانداردى يمام ەتپەۋ كەرەك دەيدى.
ءبىراق، سەناتورلار قىزدى-قىزدىمەن باس ءمۇفتيدىڭ ءوزى مىسىر ەلىندە ءبىلىم العانىن ۇمىتىپ كەتكەن سياقتى. «ساقالى ۇزىن مەن بالاعى قىسقانىڭ» بارلىعى ەكسترەميست ەمەس. اقتوبەدە تەراكت بولماي تۇرىپ وسىلاي دەگەن سەناتور سەرىك اقىلباي بۇگىن دە ايتقانىمنان قايتپايمىن دەپ وتىر. ادام الاسى ىشىندە دەگەن دەپۋتات تەراكتىدەن كەيىن جۇرتتى «ساقال-مۇرتىن» قىرۋعا ماجبۇرلەمەي، قولعا تۇسكەن تەرروريستەردى تۇگەل تەرگەۋ كەرەك دەيدى. ءتىپتى قاندىقول قىلمىسكەرلەر اتىلۋى ءتيىس.
سەرىك اقىلباي، ق ر پارلامەنتى سەناتىنىڭ دەپۋتاتى:
- ولاردى اتۋ جازاسىنا دەيىن بارۋ كەرەك. بىزدە ءقازىر موراتوريي. ونى الۋ كەرەك. تەرروريزم جاساعان، كۇناسىز ادامداردى ولتىرگەندەرگە ءبىر-اق جازا بولۋ كەرەك - اتۋ جازاسى.
كەزىندە سۋديا بولىپ، ءتىپتى، ەكى قىلمىسكەرگە ءولىم جازاسىن كەسكەن سەناتور سالافيزم ىسپەتتى اعىمداردى تەجەۋ ءتاسىلىن دە تاۋىپتى. شەتەلدىڭ ءدىني وقۋ ورىندارىندا ءبىلىم الىپ كەلگەندەردى يمام نەمەسە ءدىني ۇيىم باسشىلىعىنا وتىرعىزباۋ كەرەك دەگەن سەرىك اقىلباي، باسقا جۇزدەگەن يمامداردى ايتپاعاندا، ءدىني باسقارما باسشىسى ءال-ازھار ۋنيۆەرسيتەتىندە وقىعانىنان حابارسىز بولۋى كەرەك.
سەرىك اقىلباي، ق ر پارلامەنتى سەناتىنىڭ دەپۋتاتى:
- ءبىزدىڭ ءدىنباسىلارىمىز، يمامدارىمىز ءوزىمىزدىڭ مەملەكەتتىك ءدىني وقۋ ورىندارىن بىتىرگەندەر بولۋ كەرەك. سىرتتا بىتىرگەندەر، باسقا ەلدە، اعىمدار بىتىرگەندەر يمام بولماۋى كەرەك. ونى مىندەتتى تۇردە ءدىني باسقارما قاراۋى كەرەك.
تەرىس اعىمداردىڭ قانات جايۋىن شەتەلدەن كورگەن جوعارعى پالاتا وكىلدەرى وزگە ەلدە سوعىسقان قازاقستاندىق سودىرلاردى ەلگە قايتا كىرگىزۋگە دە قارسى ەكەن.
ماناپ كوبەنوۆ، ق ر پارلامەنتى سەناتىنىڭ دەپۋتاتى:
- سيريا ىسپەتتى سوعىستىڭ وتى تۇتانىپ جاتقان جەرلەردە قارۋ ۇستاپ كەلگەن قازاقستاندىقتاردى ەلگە قايتا قابىلداپ قاجەتى جوق ەدى. سەبەبى ولار وزدەرىمەن بىرگە، سول جەردە سىڭىرگەن كوزقاراستارى مەن يدەيالارىن ەرتە كەلەدى. ازاماتتىقتان ايىرۋ دا قارالۋى كەرەك.
ءدىني ۇيىمداردىڭ مەشىتتەن باسقا جەردە باسقوسۋىنا دا سەناتورلار قارسى. قاۋىپسىزدىككە جاۋاپتى ورگانداردىڭ ىشكى بارلاۋى ءالسىز دەپ سىناعان ولار قارۋ ساتۋ جاعىن دا قولعا الماق. ەستەرىڭىزدە بولار، پرەزيدەنت ەكى اي ىشىندە تەرروريزم، قارۋ ساتۋ، كوشى-قون زاڭدارىنا ۇسىنىس ەنگىزىڭدەر دەپ ۇكىمەتكە تاپسىرما بەرگەن. سەناتورلار دا باستاماعا وزىمىزشە ءۇن قوسامىز دەپ وتىر.
