ق ر مەملەكەتتىك سىيلىعىنىڭ لاۋرەاتى ءسابيت دوسانوۆ قازۇۋ ستۋدەنتتەرىمەن كەزدەستى، - دەپ حابارلايدى Qamshy.kz.

بۇرىن م.شولوحوۆ اتىنداعى حالىقارالىق سىيلىقتىڭ لاۋرەاتى، سەرگەي ەسەنين اتىنداعى «زولوتايا وسەن» ديپلومى مەن وردەنىمەن، ۆاسيليي شۋكشين مەدالىمەن ماراپاتتالعان، قازاقستاننىڭ ەڭبەك سىڭىرگەن قايراتكەرى، ق ر مەملەكەتتىك سىيلىعىنىڭ لاۋرەاتى، قازاقتىڭ ماڭدايىنا بىتكەن ءبىرتۋار ۇلى – ءسابيت دوسانوۆ ءوزى تۇلەپ ۇشقان قارا شاڭىراعى – ءال-فارابي اتىنداعى قازاق ۇلتتىق ۋنيۆەرسيتەتىندە تاعى ءبىر زور ماراپاتقا يە بولدى. «شىنار» جۋرنالىنىڭ باس رەداكتورى، ماحمۇد قاشقاري اتىنداعى قور پرەزيدەنتى، ءازىربايجاننىڭ كورنەكتى اقىنى ەلحان زال كاراحان ءسابيت دوسانوۆقا «اق ارۋانا» شىعارماسى ءۇشىن ماحمۇد قاشقاري اتىنداعى حالىقارالىق سىيلىقتى تابىستاي وتىرىپ، تۇركى الەمىندەگى قازاق حالقىنىڭ ورنىن، ەكى ەل اراسىنداعى تۋىستىقتى «ءازىربايجان مەن قازاقستان» ولەڭى ارقىلى اتاپ ءوتتى. سونىمەن قاتار، ەلحان زال كاراحان «شىنار» جۋرنالىنىڭ باستى بەتىن ءسابيت دوسانوۆقا ارناپ، ونىڭ «اق ارۋانا» كىتابىن ءازىربايجان تىلىنە اۋدارعان.

ماحمۇد قاشقاري اتىنداعى قور جۇمىسىنىڭ باستى ماقساتى – تۇرىك حالىقتارىنىڭ مادەنيەتى مەن ادەبيەتىن بۇكىل الەمگە تاراتۋ، جەر بەتىندەگى بارلىق حالىقتار اراسىنداعى قارىم-قاتىناستى نىعايتۋ. ماحمۇد قاشقاري اتىنداعى سىيلىق وسى ماقساتقا جەتۋگە ءوز شىعارمالارى مەن ەڭبەكتەرى ارقىلى قول ۇشىن بەرىپ جۇرگەن ازاماتتارعا، ادەبيەت، عىلىم مەن ونەر سالاسىندا ەلەۋلى ەڭبەك ەتىپ جۇرگەن جاندارعا بەرىلەدى. مۇنداي بەدەلدى سىيلىقپەن بۇدان بۇرىن اقىلبەك شاياحمەت، ولجاس سۇلەيمەنوۆ سىندى ازاماتتار ماراپاتتالعان.

ءسوز باسىندا ءال-فارابي اتىنداعى قازۇۋ رەكتورى، اكادەميك عالىمقايىر مۇتان ۇلى: «بۇگىنگى كەزدەسۋدىڭ قازاق ادەبيەتىنىڭ كورنەكتى وكىلى، بەلگىلى جازۋشى، دراماتۋرگ ءسابيت دوسانوۆپەن بولۋى كەزدەيسوق ەمەس. ول – ءبىزدىڭ ۋنيۆەرسيتەتتىڭ 1964 جىلعى تۇلەگى. سودان بەرى ول - ءوزى تاڭداعان ءسوز ونەرىندە شىعارماشىلىقتىڭ شىڭىن باعىندىرىپ، ۋنيۆەرسيتەتىمىزدىڭ اتىن تەك جاقسى جاعىنان شىعارىپ جۇرگەن قازاق حالقىنىڭ دارىندى تۇلعاسى» - دەدى.

جازۋشى، دراماتۋرگ ءسابيت دوسانوۆپەن كەزدەسۋگە، ونىڭ قۋانىشىمەن ورتاقتاسۋعا تانىمال اقىن-جازۋشىلار: مىڭباي راشيەۆ، دۋلات يسابەكوۆ، عالىم جايلىباي، الماتى قالاسى اكىمدىگىنىڭ ىشكى جاستار ساياسات باسقارماسىنىڭ باسشىسى نۇربولات سىزدىقوۆ، رەسەي قازاقتارىنىڭ اتىنان دامەلى تاسماعانبەتوۆا، كۇيشى-كامپوزيتور ءشامىل ابىلتايەۆ كەلدى.

كەزدەسۋ بارىسىندا دامەلى تاسماعانبەتوۆا جازۋشىنى رەسەيدەگى قازاقتار اتىنان جىلى لەبىزىن ءبىلدىرىپ  قۇتتىقتاسا، دۋلات يسابەكوۆ ونىڭ قيلى تاعدىرىنان سىر شەرتتى. ال، كۇيشى-كومپوزيتور ءشامىل ابىلتايەۆ «سابەڭ سال» اتتى تورەعالي تاشەنوۆتىڭ ولەڭىنە جازىلعان كۇيىمەن كەشتىڭ ءسانىن كەلتىردى. سوڭعى قۇتتىقتاۋ ءسوزدى فيلولوگيا جانە الەم تىلدەرى فاكۋلتەتىنىڭ دەكانى ءومىرحان ءابديمان ۇلى ايتتى. 

ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عالىمقايىر مۇتان ۇلى كەزدەسۋ سوڭىندا ءسابيت دوسانوۆ مىرزاعا ۋنيۆەرسيتەت دامۋىنا ايرىقشا ۇلەس قوسقانى ءۇشىن ءال-فارابي اتىنداعى التىن مەدالىن تابىس ەتتى.