كەشە الماتىدا جاۋىن جاۋدى. ۇزاق كۇنگى ىستىقتان كەيىنگى جاڭبىرعا جۇرت قۋانسا كەرەك ەدى. قۋانا المادى. قۋانا الماعان سەبەبى قالانىڭ كوممۋنالدىق جۇيەسى جاڭبىر سۋىنا دايىن بولماي شىقتى، - دەپ حابارلايدى Qamshy.kz.

كوشە بويىنداعى ارىقتار ەرنەۋىنەن اسىپ، اياقجولداردى سۋ باستى. ساي-سالا تۇگەل سۋعا تولدى. ءتىپتى مەترو ستانساسىنا دەيىن سۋ كىرىپ، جولاۋشىلارعا قولايسىزدىق تۋدى.

مەملەكەتتىك باعدارلامامەن سالىنعان «العاباس» ىقشاماۋدانىنداعى ۇيلەردىڭ دە جاعدايىن مىنا جاڭبىر اشكەرەلەۋدە. ۇيلەردىڭ توبەسى جاڭبىر سۋىنا توتەپ بەرە المادى. سوڭعى قاباتتا تۇراتىن تۇرعىندار ۇيلەرىنىڭ پاتەرلەرىندە نوسەر جاۋىن بولعانىن ايتۋدا. ينتەرنەتكە جۇكتەلگەن ۆيدەو مەن فوتودا ەسەپ جوق.

«العاباستان» بولەك قالانىڭ «شاڭىراق»، «وجەت»، «دارحان» سىندى جەر ۇيلەر دە جاڭبىر سۋىنىڭ قۇرساۋىندا قالىپ وتىر.  

ال، سينوپتيكتەر جاۋىننىڭ ءازىر توقتامايتىنىن ايتۋدا...