حالىقارالىق اۋىر اتلەتيكا فەدەراسياسى لوندون وليمپياداسىنىڭ سىنامالارىن قايتا تەكسەرىپ، ناتيجەسىندە 4 قازاقستاندىق چەمپيوننىڭ: يليا يلين، ءزۇلفيا چينشانلو، ماييا مانەزا جانە سۆەتلانا پودوبەدوۆانىڭ قانىنان رۇقسات ەتىلمەگەن پرەپاراتتاردىڭ تابىلعانىن جاريالادى. ولار دوپينگ قولداندى دەگەن ايىپپەن تەرگەۋ اياقتالعانشا جارىستاردان شەتتەتىلگەن ەدى. szh.kz اۋىراتلەتتەر قانىنان تابىلدى دەلىنگەن پرەپاراتتاردىڭ كۇشى قانشالىقتى ەكەنىن زەرتتەپ كورىپتى.

IWF 4 التىن يەگەرى، سۆەتلانا پودوبەدوۆا، يليا يلين، ءزۇلفيا چينشانلو، ماييا مانەزانىڭ قانىنان مىنا پرەپاراتتاردىڭ تابىلعانىن جاريالادى:

يليا يلين – دەگيدروحلورمەتيلتەستوستەرون، ستانوزولول

زۋلفيا چينشانلو – وكساندرولون، ستانوزولول

سۆەتلانا پودوبەدوۆا – ستانوزولول

ماييا مانەزا – ستانوزولول

ستانوزولولدىڭ كۇشى قانداي؟

ستانوزولول — بوديبيلدەرلەر، بوكسشىلار، بالۋاندار، جەڭىل جانە اۋىراتلەتتەرى ەڭ ءجيى قولداناتىن، سپورتتا رۇقسات ەتىلمەگەن پرەپارات. ونى — 1962 جىلى Winthrop Laboratories كومپانياسى ۆەتەريناريا سالاسىنا قاتىستى جاساپ شىعارعان. اسىرەسە، جىلقى مالىنىڭ جۇيرىكتىگىن ارتتىراتىن جانە وزگە دە ەمدىك ماقساتتا قولدانىلاتىن پرەپارات بولىپ ەسەپتەلگەن. كەيىنەن سپورتشىلار كۇش بەرەتىن پرەپارات رەتىندە قولدانا باستاعان. سونداي-اق، ول كادىمگى ستەرويدتار رەتىندە اعزاداعى زات الماسۋ پروسەسىن جىلدامداتادى، بۇلشىقەت پەن ونىڭ بەدەرلىگىنە ىقپال ەتەدى. سۇيەكتەن كالسييدىڭ ءبولىنىپ شىعۋىنا بولىسادى، اعزادا فوسفور، ازوت، كۇكىرتتى ساقتاپ تۇرادى.   ءۆيريليزمدى دامىتۋىنا قاراماستان، سالىستىرمالى تۇردە ءقاۋپى از پرەپارات ەسەبىندە ونى سپورتتاعى ايەلدەر دە ءجيى قولدانادى.

ستەرويد اسەرىنەن شاش ءتۇسىپ، بەزەۋ، بورتپە پايدا بولۋى مۇمكىن جانە باۋىر قىزمەتىنە كەرى اسەرىن تيگىزۋى دە ىقتيمال.

قازاقستاندىق جەڭىل اتلەت ولگا شيشيگينا اتالمىش پرەپاراتتى قولدانعانى ءۇشىن 1996-1998 جىلدار ارالىعىندا سپورتتان شەتتەتىلگەن.

دەگيدروحلورمەتيلتەستوستەرون 

سالماق دارەجەسى ەسكەرىلەتىن سپورت تۇرلەرىنە قاتىستى ءجيى قولدانىلاتىن پرەپارات. ي. يليننەن بۇرىن ا. وتەشيەۆ، ج. قىدىربايەۆ، ە. ءومىرتاي دەگيدروحلورمەتيلتەستوستەرون قولداندى دەگەن ايىپپەن سپورتتان شەتتەتىلگەن ەدى. پرەپاراتتىڭ نەگىزگى اسەرى: بۇلشىقەتتىڭ جىلدام جەتىلۋىنە، ارتىق كۇش الۋعا مۇمكىندىك بەرەدى، سۇيەكتىڭ مايىسىپ كەتۋىنىڭ الدىن الادى.

يليا – پەكين، لوندون وليمپيادالارىندا 94 كەلىدە ب ا ق سىناعان، كەيىنەن 105 كەلىگە اۋىسقان سپورتشى. 

وكساندرولون

ريو وليمپياداسىنان دا التىنعا ءۇمىتتى زۋلفيا چينشانلو قانىنان تابىلدى دەگەن وكساندرولون پرەپاراتى بۇلشىقەت ماسساسىن ونى جوعالتقان كەزدە ارتتىرۋ ماقساتىندا، سونداي-اق ۆيچ/سپيد-تەن ەمدەلۋ كەزىندە پايدالانىلادى. وكساندرولون – جىلدامدىق ماڭىزدى ءرول اتقاراتىن سپورت تۇرلەرىمەن اينالىساتىن اتلەتتەر اراسىندا ءجيى قولدانىلاتىن پرەپارات بولىپ سانالادى.

مادەنيەت جانە سپورت مينيسترلىگى حالىقارالىق وليمپيادا كوميتەتى (حوك) دوپينگ داۋىنا ىلىككەن قازاقستاندىق اۋىر اتلەتتەردى جۇلدەلەرىنەن ايىرىپ، ريو-دە-جانەيرو وليمپياداسىنا قاتىسۋىنا تىيىم سالسا، وعان شاعىمداناتىنىن مالىمدەدى. بۇل تۋرالى مادەنيەت جانە سپورت ۆيسە-مينيسترى ساكەن مۇسايبەكوۆكە سىلتەمە جاساعان جەرگىلىكتى اگەنتتىكتەر حابارلادى.

ەسكە سالايىق، ماۋسىم ايىنىڭ باسىندا شەتەلدىك اقپارات قۇرالدارى قازاقستاندىق اۋىراتلەتتەردىڭ قانىنان دوپينگ تابىلعانى جونىندە حابارلاعان بولاتىن. ولاردىڭ مالىمەتىنشە، يليا يلين مەن ءزۇلفيا چينشانلو الداعى وليمپيادا ويىندارىنا قاتىسا الماۋى مۇمكىن.