الماتىنىڭ باس كوشەسى – ءال-فارابي داڭعىلى سۋ استىندا قالدى، - دەپ حابارلايدى Qamshy.kz.

تۇرعىندار مەن جۇرگىزۋشىلەر داڭعىل بويىنداعى جاعداي تۇسىرىلگەن ۆيدەولار مەن فوتوماتەريالداردى ينتەرنەت پەن الەۋمەتتىك جەلىلەرگە جاريالاۋدا. ول سۋرەت، ۆيدەولاردان تەك ءال-فارابي داڭعىلى عانا ەمەس،  اباي، دوستىق، فۋرمانوۆ بويىندا دا جاڭبىر سۋىنىڭ مول جينالىپ قالۋىنان كولىكتەردىڭ توقتاپ تۇرعانىن كورۋگە بولادى.

قالالىق توتەنشە جاعدايلار دەپارتامەنتىنىڭ حابارلاۋىنشا، كەشە تۇرعىنداردان اۋلالاردى سۋ باستى دەگەن ەلۋ شاقتى حابارلاما تۇسكەن. ونىڭ 25ء-ى راستالعان.

«زارداپ شەككەندەردىڭ كوبى الاتاۋ اۋدانىندا. سۋ باسقان جەرلەردە اكىمدىك، تجد، قۇتقارۋ قىزمەتتەرى ماماندارى جۇمىس ىستەۋدە»، - دەلىنگەن تجد باسپا ءسوز قىزمەتى تاراتقان حابارلامادا.

بۇعان دەيىن الماتىداعى مەترونىڭ «الاتاۋ» ستانساسىن سۋ باسقانىن جانە «العاباس» ىقشام اۋدانىنداعى تۇرعىن ءۇيدىڭ ءبىرىنىڭ توبەسىنەن سۋ ساۋلاعانىن جازعان بولاتىنبىز.

ەستەرىڭىزگە سالساق، كەشەدەن بەرى الماتى قالاسىندا تولاسسىز جاۋىن جاۋۋدا. 112 قىزمەتى تۇرعىندارعا تەلەفون ارقىلى «16-17 ماۋسىم كۇندەرى الماتى وزەندەرىندە سۋ تاسۋ ءقاۋپى بار» دەگەن حابارلاما تاراتۋدا.

ال، قازگيدرومەت ماماندارى 18-20 ماۋسىم كۇندەرى قازاقستاننىڭ ءبىراز اۋماعىندا جاۋىن-شاشىن بولاتىنىن حابارلادى.